كەنيادا مۇعالىمنىڭ ءسوزىن ىم-يشارا تىلىنە اۆتوماتتى تۇردە اۋداراتىن روبوت جاسالدى. بۇل يننوۆاتسيا ەستۋ قابىلەتى بۇزىلعان بالالارعا جاراتىلىستانۋ پاندەرىن, سونىڭ ىشىندە فيزيكا مەن حيميانى وڭاي مەڭگەرۋگە مۇمكىندىك بەرەدى, دەپ حابارلايدى Egemen.kz.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە, ەستۋ قابىلەتىنىڭ بۇزىلۋى – بالالار اراسىنداعى مۇگەدەكتىكتىڭ كەڭ تارالعان تۇرلەرىنىڭ ءبىرى. قازىرگى تاڭدا الەمدە 95 ميلليوننان استام مەكتەپ وقۋشىسى وسىنداي قيىندىققا تاپ بولعان. ساراپشىلار 2050 جىلعا قاراي بۇل كورسەتكىشتىڭ ارتۋى مۇمكىن ەكەنىن ايتادى.
كەنيالىق ينجەنەرلەر جاساعان روبوتتالعان قول مۇعالىمنىڭ ايتقان ءسوزىن بىردەن ىم-يشارا تىلىنە اينالدىرادى. جۇيەنى ىسكە قوسۋ ءۇشىن ارنايى سەنسورلى كوستيۋمدەر قولدانىلادى, ولار ادامنىڭ قيمىلىن تىركەپ, دەرەكتەر بازاسىنا ەنگىزەدى. قۇرىلعى قازىرگى ۋاقىتتا ماچاكوس قالاسىنداعى مەكتەپتىڭ بىرىندە سىناقتان وتكىزىلىپ جاتىر.
جوبانىڭ اۆتورى ماكسۆەلل وپوندونىڭ ايتۋىنشا, بۇل جۇيە قاشىقتان وقىتۋعا دا بەيىمدەلگەن. ءبىر جاعىندا مۇعالىمنىڭ باسقارۋ ەكرانى بولسا, ەكىنشى جاعىندا روبوتتالعان قول مەن ەكزوسكەلەت جۇمىس ىستەيدى.
تەننيس ۇستەلىندەگى سەنساتسيا: AI-روبوت كاسىبي ويىنشىلاردى جەڭدى
روبوت 3D-باسىپ شىعارۋ تەحنولوگياسىمەن قايتا وڭدەلگەن پلاستيكتەن جاسالعان جانە ينتەرنەتى ءالسىز ايماقتاردا دا قولدانۋعا مۇمكىندىك بەرەدى. سىناق كەزەڭىنە 500 مىڭنان استام وقۋشى قاتىسقان. قازىر بۇل ءادىس شۆەيتساريادا تەستىلەنىپ جاتىر, ال فرانتسيا مەن ۆەتنام ءوز انالوگتارىن ازىرلەپ جاتىر.
ەسكە سالا كەتەيىك, بۇعان دەيىن جاپونيانىڭ اۋىلدىق ايماقتارىندا ايۋلاردان قورعاۋ ءۇشىن قاسقىر بەينەسىندەگى روبوتتار جاسالىپ شىعارىلعانىن جازعان ەدىك.