1916 جىلى جولدانعان حات 2021 جىلى لوندوننىڭ كريستال پالاس اۋدانىندا تۇراتىن تەاتر رەجيسسەرى فينلي گلەننىڭ پاتەرىنە كەلگەن.
گلەن: «حاتتىڭ 100 جىل بويى ساقتالىپ, ماعان جەتكەنىنە تاڭىم بار», دەيدى. ال ۇلىبريتانيا كورولدىك پوشتاسى حات ورتا جولدا جوعالىپ كەتكەن بولۋى مۇمكىن دەگەن بولجام ايتادى. بريتاندىق پوشتا قىزمەتى تۋرالى زاڭعا سايكەس, باسقا ادامعا جىبەرىلگەن حات-حابارلاردى اشىپ وقۋ قىلمىسقا جاتادى. الايدا گلەن حات 100 جىل بۇرىن جىبەرىلگەندىكتەن, ونى اشۋعا بولادى دەپ شەشكەن. «ەگەر بۇل قىلمىس بولسا, مەن تەك كەشىرىم سۇراي الامىن», دەيدى ول. «قىمباتتى كەتي» دەپ باستالاتىن حاتتى وسۆالد مارش دەگەن ازامات جارىنا جولداعان ەكەن. «بۇل حاتتىڭ ءدال ماعان جەتكەنى قىزىق, ارينە. ەگەر, ول ادامنىڭ تۋىستارى, ۇرپاعى بار بولسا, حاتتى مەنەن الۋىنا بولادى», دەيدى گلەن.
«جۇمىسقا كەلمەيتىن دەپۋتات»
يوسيكادزۋ حيگاسيتاني 2022 جىلى جاپونيانىڭ سەنات دەپۋتاتى بولىپ سايلانعان. الايدا ول جوعارى لاۋازىمعا يە بولعان كۇننەن باستاپ بىردە-ءبىر رەت پارلامەنت وتىرىسىنا قاتىسپاعان.
«جۇمىسقا كەلمەيتىن دەپۋتات» دەگەن لاقاپ اتقا يە بولعان ازامات بىرىككەن اراب امىرلىكتەرىندە تۇرادى. سونداي-اق ول YouTube جەلىسىندە GaaSyy دەگەن اتپەن تانىمال. بلوگەر جۇمىسقا كەلۋدىڭ ورنىنا جەلىدە جۇرگەن-تۇرعانىن سالىپ, وزگە ارىپتەستەرىنىڭ اشۋىنا تيگەن. ول بىرنەشە مارتە ەسكەرتۋ السا دا, قۇلاعىنا ىلمەسە كەرەك. سودان كەيىن سەنات دەپۋتاتتارى ءبىراۋىزدان ونىڭ وكىلەتتىگىن توقتاتۋعا داۋىس بەرگەن. يوسيكادزۋ حيگاسيتاني – جاپونياداعى كەيىنگى 70 جىلدا مانداتىنان ايىرىلعان جالعىز دەپۋتات.
ماسك مارسقا جىبەرەدى
SpaceX كومپانياسىنىڭ نەگىزىن قالاۋشى يلون ماسك الداعى ەكى جىلدا مارسقا بەس ۇشقىشسىز ميسسيانى جىبەرۋدى جوسپارلاپ وتىرعانىن مالىمدەدى.
ونىڭ ايتۋىنشا, ەگەر وسى بەس كەمە ءساتتى قونسا, ادامداردىڭ مارسقا بارۋىنا جول اشىلادى. ال قيىندىق تۋىپ جاتسا جوسپار تاعى ەكى جىلعا كەيىنگە شەگەرىلەدى. ويتكەنى كەمەلەردى جەردەن قىزىل عالامشارعا تەك 2 جىلدا ءبىر رەت جىبەرۋگە بولادى. كاسىپكەر قانداي قيىندىققا تاپ بولسا دا, مارسقا ۇشۋ جيىلىگىن ارتتىرۋدى جوسپارلاپ وتىرعانىن ايتتى. ء«بىز كەز كەلگەن ادامعا عارىشقا ساياحاتتاۋ مۇمكىندىگىن بەرگىمىز كەلەدى», – دەپ جازدى يلون ماسك ءوزىنىڭ تۆيتتەر پاراقشاسىندا.