قازاقستان وقۋشىلارى حالىقارالىق وليمپيادالارداعى جەڭىسى ءۇشىن 5,5 ميلليون تەڭگەدەن سىياقى الادى. بۇل تۋرالى وقۋ-اعارتۋ مينيسترلىگىنەن ءمالىم بولدى, دەپ حابارلايدى Egemen.kz.
الەمدىك توپ-7 بەدەلدى وليمپيادالاردا جۇلدەلى ورىن العان 26 قازاقستان وقۋشىسى قارجىلاي سىياقى الادى. سىياقىنىڭ جالپى سوماسى 77,5 ميلليون تەڭگەدەن اسادى. ايتا كەتسەك, مەملەكەت تاراپىنان وسىنداي بىرجولعى سىياقى پرەزيدەنت تاپسىرماسىمەن 2022 جىلى تاعايىندالعان. 2023-2024 وقۋ جىلىندا ۇلتتىق قۇراما ەڭ بەدەلدى الەمدىك پاندىك وليمپيادالاردا 2 التىن, 12 كۇمىس, 12 قولا مەدال جانە ءبىر ديپلوم يەلەنگەن ەكەن.
التىن مەدال جەڭىپ العان وقۋشى 1500 ايلىق ەسەپتىك كورسەتكىش (اەك) مولشەرىندە, كۇمىس مەدال ءۇشىن – 1000 اەك, قولا مەدالعا – 500 اەك مولشەرىندە اقشالاي سىياقى الادى. ال التىن مەدال يەگەرىن دايىنداعان پەداگوگكە – بازالىق لاۋازىمدىق ايلىقاقى 26,5 ەسەلەنگەن مولشەرىندە; كۇمىس مەدال يەگەرىن دايىنداعان پەداگوگكە – بازالىق لاۋازىمدىق ايلىقاقى 17,5 ەسەلەنگەن مولشەرىندە; قولا مەدال يەگەرىن دايىنداعان پەداگوگكە – بازالىق لاۋازىمدىق ايلىقاقى 8,5 ەسەلەنگەن مولشەرىندە بەرىلەدى. سونىمەن قاتار اتالعان جەڭىمپازدارعا ەلىمىزدەگى جوو-نىڭ كەز-كەلگەنىنە وقۋعا تۇسۋگە ءبىلىم گرانتى بەرىلەتىنى ءمالىم. ەستەرىڭىزگە سالايىق, وتكەن جىلى 23 وقۋشى 65,6 ملن تەڭگە, 20 پەداگوگ جالپى سوماسى 71,4 ملن تەڭگە بىرجولعى سىياقى العان. جالپى 12 ءىرى حالىقارالىق جارىسقا قاتىسقان قازاقستاننىڭ 1218 وقۋشىسىنىڭ 603-ءى مەدال يەگەرى اتانعان, ياعني, ءاربىر ەكىنشى قاتىسۋشى جۇلدەلى ورىنعا يە بولعان.