مەملەكەت باسشىسى قاسىم-جومارت توقاەۆ جولداۋىندا رەسپۋبليكالىق بيۋدجەتتىڭ كىرىس بولىگى ورىندالماي جاتقانىنا توقتالىپ, بولىنگەن قاراجاتتى ءتيىمدى پايدالانۋ مەن ونىڭ شىعىس بولىگىن قاتاڭ باقىلاۋدا ۇستاۋ قاجەت ەكەنىن ايتقان بولاتىن.
پرەزيدەنتتىڭ جۇكتەگەن تاپسىرماسىن ىسكە اسىرۋ ماقساتىندا قارجى مينيسترلىگى سالىق باعىتى مەن كەدەندىك رەتتەۋدە, بيۋدجەتتى جوسپارلاۋ مەن اۋديت ىسىندە تسيفرلى باستامالاردى جوسپارلى تۇردە ىسكە اسىرىپ جاتىر.
ايتالىق, ءبىزدىڭ سالاعا قاراستى ەلەكتروندى قارجى ورتالىعىنىڭ سۇيەمەلدەۋىمەن ەلىمىزدىڭ قارجى جۇيەسىن تسيفرلى ترانسفورماتسيالاۋ باعىتىندا بىرنەشە تىڭ جوبا قولعا الىنىپ, جۇزەگە اسىرىلىپ كەلەدى. سونىڭ ءبىرى – ونلاين بيۋدجەتتىك مونيتورينگ. بيۋدجەت قاراجاتىنىڭ جۇمسالۋىن باقىلاۋدى كۇشەيتۋ ماقساتىندا اۋديتورلار جوسپارلاۋدان باستاپ بيۋدجەتتىڭ ونلاين رەجىمدە اتقارىلۋىنا دەيىنگى بيۋدجەتتىك مونيتورينگ بويىنشا جۇمىستى اتقارىپ جاتىر. بۇعان قارجى مينيسترلىگىنىڭ ءتۇرلى اقپاراتتىق جۇيەلەرىنىڭ دەرەكتەرىن پايدالانۋ ارقىلى قول جەتكىزىلدى.
جوبا بيۋدجەتتىڭ سايكەسسىزدىگىنە بايلانىستى تاۋەكەلدەردى ۋاقتىلى انىقتاپ, حابار بەرۋگە جانە تاۋەكەل پروفيلدەرىن جاساۋعا باعىتتالعان. بۇل جوبا تاۋەكەلدەر بەيىنى بويىنشا كامەرالدى باقىلاۋ جاساپ, بيۋدجەتتى جوسپارلاۋ جانە اتقارۋ كەزىندە سىن-قاتەرگە جەدەل دەن قويۋعا, بيۋدجەت قاراجاتىن ءتيىمسىز يگەرىلۋ تاۋەكەلدەرىنىڭ الدىن الۋعا, سونداي-اق قارجىلىق بۇزۋشىلىقتاردى ازايتۋ مەن مەملەكەتتىك شىعىستاردى باقىلاۋعا سەپتىگىن تيگىزەدى.
ال مەملەكەتتىك جوسپارلاۋدىڭ اقپاراتتىق جۇيەسى بيۋدجەتتىك جوسپارلاۋدى اۆتوماتتاندىرىپ, اقپاراتتىق قولداۋعا ىقپال ەتەدى. ونىڭ بيۋدجەت قاراجاتىن ءتيىمدى ءبولۋ بويىنشا ارتىقشىلىعى كوپ. تاعى ءبىر كەرەمەت جوبا – بىرىڭعاي ساتىپ الۋ پلاتفورماسى. ول پايدالانۋشىلاردىڭ قولايلىلىعى ءۇشىن مونيتورينگ پەن باقىلاۋدى قامتاماسىز ەتە وتىرىپ, مەملەكەتتىك ورگانداردىڭ, كۆازيمەملەكەتتىك سەكتور سۋبەكتىلەرىنىڭ, باسقا دا الاڭداردىڭ ساتىپ الۋ ۇدەرىستەرىن بىرىكتىرە الاتىن مۇمكىندىككە يە. سول سەكىلدى تاۋارلاردىڭ ەلەكتروندى كاتالوگى – تەحنيكالىق سيپاتتامالاردى اۆتوماتتى تۇردە قالىپتاستىرىپ, تاريحي باعالاردى تالداۋعا جانە تاۋار اينالىمىن باقىلاۋعا مۇمكىندىك بەرەتىن دەرەكتەردى ساقتاپ, باسقارۋعا ارنالعان ءونىم. تىزبەكتەي بەرسەك, ادامعا باعدارلانعان جوبالارىمىز بارشىلىق. ولار ءوز جەمىسىن الداعى ۋاقىتتا بەرەدى دەپ سەنەمىز.
اسەت تۇرىسوۆ,
قارجى ۆيتسە-ءمينيسترى