قازاقستان قاجىلىق ميسسياسى جانە قاجىلىق ساپارىن ۇيىمداستىرۋعا رۇقسات العان 14 تۋروپەراتور باسشىلارىنىڭ قاتىسۋىمەن قازاقستان مۇسىلماندارى ءدىني باسقارماسى (قمدب) الاڭىندا ارنايى جيىن ءوتتى. جيىنعا قاتىسۋشىلار 2026 جىلعى قاجىلىق ماۋسىمىن ۇيىمداستىرۋ ماسەلەلەرىن تالقىلادى, دەپ جازادى Egemen.kz.
بيىل قاجىلىق ساپارى 15 مامىر مەن 5 ماۋسىم ارالىعىندا وتەدى. قمدب مالىمەتىنشە, ماۋسىم كەزىندە قاجىلاردى تاسىمالداۋ جۇمىستارىن كونكۋرستىق نەگىزدە Air Astana جانە SCAT, سونداي-اق ساۋديالىق Flyadeal اۋەكومپانيالارى جۇزەگە اسىرادى. الماتى, استانا جانە شىمكەنت قالالارىنان شىققان رەيستەر تىكەلەي دجيددا مەن ءمادينا قالالارىنا باعىتتالادى. قاجىلاردىڭ ەلگە قايتۋ ساپارى دا وسى ەكى قالادان كەزەڭ-كەزەڭىمەن جوسپارلانعان. وسىلايشا, قاجىلىق ماۋسىمىن وتانداستارىمىز ءۇشىن بارىنشا قولايلى, قاۋىپسىز جانە جوعارى دەڭگەيدە ۇيىمداستىرۋ كوزدەلىپ وتىر.
استانادا قاجىلىق ساپاردى جەلەۋ ەتكەن الاياق ۇستالدى
سونداي-اق جيىن بارىسىندا قاجىلاردىڭ قازاقستان اۋماعىنان ءتيىستى تۋركودپەن شىعۋى, ۆاكتسيناتسيا ماسەلەسى, قاجىلىق بارىسىندا ساۋد ارابياسىنىڭ زاڭدارىن ورىنداۋ, قازاقستاندىق كۆوتامەن شەتەل ازاماتتارىن اپارماۋ ماسەلەسى دە تالقىلاندى. اتالعان ماسەلەلەرگە قاتىستى قاجىلىقتى ۇيىمداستىرۋعا رۇقسات العان وتاندىق 14 تۋروپەراتور وكىلدەرى ۇسىنىستارى مەن سۇراقتارىن ورتاعا سالدى.