پرەمەر-مينيستر تەمىرجول ۆوكزالدارىن جاڭعىرتۋ قارقىنىن سىنعا الدى

كولىك سەكتورىنىڭ ءوسىمى جانە نەگىزگى كورسەتكىشتەر

كولىك مينيسترلىگىنىڭ دەرەگىنە سايكەس, 2025 جىلدىڭ قورىتىندىسىندا كولىك جانە قويمالاۋ سالاسىنداعى جالپى ءونىم كولەمى 12,2 ترلن تەڭگەنى قۇرادى. ال بيىلعى قاڭتار-ناۋرىز ارالىعىندا سالاداعى ءوسىم 12,8% بولدى.

وتكەن جىلى ەل ىشىندە اۆتوكولىكپەن 353 ملن توننا جۇك تاسىمالداندى. سونىمەن قاتار جالپى ۇزىندىعى 2 مىڭ شاقىرىمدى قۇرايتىن ءتورت ءىرى اۆتوجول جوباسى – «قالباتاۋ – مايقاپشاعاي», «تالدىقورعان – وسكەمەن», «اتىراۋ – استراحان» جانە «قاراعاندى – الماتى» باعىتتارى اياقتالدى.

قازىرگى ۋاقىتتا «اقتوبە – قىزىلوردا», «بەينەۋ – سەكسەۋىل», «ورتالىق – باتىس», «قاراعاندى – جەزقازعان» جانە سارىاعاش اينالما جولى سەكىلدى باعىتتاردى قامتيتىن ترانزيتتىك دالىزدەر دامىتىلىپ جاتىر. ناتيجەسىندە جول جوندەۋ جۇمىستارىنىڭ جالپى كولەمى 13 000 شاقىرىمعا دەيىن ۇلعايدى.

وتكىزۋ پۋنكتتەرى مەن تەمىرجول تاسىمالى

ەاەو ىشكى شەكارالارىنداعى اۆتوكولىك وتكىزۋ پۋنكتتەرىن جاڭعىرتۋ اياسىندا وتكەن جىلى 2 نىسان اياقتالدى. قازىرگى تاڭدا 37 وتكىزۋ پۋنكتى قۇرىلىس جانە جاڭعىرتۋ جۇمىستارىمەن قامتىلعان, ولاردى تولىق اياقتاۋ 2027 جىلعا جوسپارلانعان.

پرەمەر-مينيستر وتكىزۋ پۋنكتتەرىندەگى جۇمىستاردىڭ باياۋ ءجۇرىپ جاتقانىن سىنعا الىپ, وپەراتسيالىق ۇدەرىستەردى جەدەلدەتۋدى تاپسىردى.

تەمىرجول سالاسىندا دا وڭ ديناميكا بايقالادى. «قازاقستان تەمىر جولى» دەرەگىنە سايكەس, 2025 جىلى ترانزيتتىك تاسىمال كولەمى 33 ملن تونناعا جەتىپ, 2024 جىلمەن سالىستىرعاندا 20% وسكەن. ءترانزيتتىڭ جالپى تاسىمالداعى ۇلەسى 10% بولدى.

2026 جىلعى قاڭتار-ناۋرىز ارالىعىندا ترانزيتتىك تاسىمال تاعى 14% ءوسىپ, 8 ملن توننادان 9 ملن تونناعا دەيىن ارتتى, ال كونتەينەرلىك تاسىمال 6% ۇلعايدى.

ولجاس بەكتەنوۆكە الاكولدى دامىتۋدىڭ كەشەندى جوسپارى تانىستىرىلدى

ترانسكاسپي باعىتى جانە ءىرى جوبالار

كەڭەستە ترانسكاسپي حالىقارالىق كولىك باعىتىن (تحكب) دامىتۋ ماسەلەسى ەرەكشە قارالدى. بۇل باعىتتا جەتكىزۋ مەرزىمدەرىن قىسقارتۋ, «التىنكول – پوتي/باتۋمي» جەلىسىندە وتپەلى تاريفتەر ەنگىزۋ جانە ازەربايجان مەن گرۋزيامەن تسيفرلىق جۇيەلەردى بىرىكتىرۋ جۇمىستارى جۇرگىزىلىپ جاتىر.

قازىرگى تاڭدا جالپى ۇزىندىعى 3,9 مىڭ شاقىرىم تەمىرجولدا ءىرى ينفراقۇرىلىمدىق جوبالار ىسكە اسىرىلىپ وتىر. ولاردىڭ قاتارىندا «مويىنتى – قىزىلجار», «باقتى – اياگوز» جەلىلەرىنىڭ قۇرىلىسى, سونداي-اق «التىنكول – جەتىگەن», «شالقار – بەينەۋ», «بەينەۋ – ماڭعىستاۋ» ۋچاسكەلەرىن جاڭعىرتۋ بار.

الايدا ۇكىمەت باسشىسى «باقتى – اياگوز» جوباسى بويىنشا تەحنيكا مەن جۇمىس كۇشى جەتكىلىكسىز جۇمىلدىرىلعانىن اتاپ ءوتىپ, ءتيىستى شارالار قابىلداۋدى تاپسىردى.

سونىمەن قاتار مەملەكەتارالىق ءتۇيىسۋ پۋنكتتەرىنىڭ وتكىزۋ قابىلەتىن جىلىنا 100 ملن تونناعا دەيىن ارتتىرۋ قاجەتتىگى ايتىلدى. بۇل حالىقارالىق تاسىمالدى جەڭىلدەتۋگە جانە ترانزيتتىك اعىندى كۇشەيتۋگە مۇمكىندىك بەرەدى.

پورتتار مەن تەڭىز لوگيستيكاسى

تەڭىز ينفراقۇرىلىمىن دامىتۋ اياسىندا اقتاۋ جانە قۇرىق پورتتارىنىڭ الەۋەتىن ارتتىرۋ جۇمىستارى جالعاسىپ جاتىر. بيىل اقتاۋ پورتىندا 1,3 ملن تەكشە مەترگە دەيىن ءتۇپ تەرەڭدەتۋ جۇمىستارى جوسپارلانعان.

سونىمەن بىرگە «اقتاۋ – باكۋ» باعىتىنا ارنالعان 6 كونتەينەر تاسىمالداۋشى كەمەنى ساتىپ الۋ راسىمدەرىنىڭ كەشىگۋى سىنعا الىندى. پرەمەر-مينيستر بۇل باعىتتاعى جۇمىستاردى جەدەلدەتۋدى تاپسىردى.

ولجاس بەكتەنوۆ تەمىرجول ۆوكزالدارىن جاڭعىرتۋ قارقىنىنىڭ تومەن ەكەنىن اتاپ ءوتىپ, بيىل بارلىق قۇرىلىس-مونتاج جۇمىستارىن تولىق اياقتاۋدى مىندەتتەدى.

جالپى, كەڭەس قورىتىندىسىندا ۇكىمەت كولىك-ترانزيتتىك جۇيەنى كەشەندى دامىتۋ, ينفراقۇرىلىمدى جاڭارتۋ جانە حالىقارالىق باعىتتارداعى باسەكەگە قابىلەتتىلىكتى ارتتىرۋعا باسىمدىق بەرىپ وتىرعانى اتاپ ءوتىلدى.

اباي وبلىسىنىڭ الەۋەتى: ولجاس بەكتەنوۆ پرەزيدەنت تاپسىرماسىنىڭ ورىندالۋ بارىسىن تەكسەردى