تسيفرلىق دامۋ ءمينيسترى «وتباسى ماسەلەلەرى, ايەلدەر مەن بالالاردىڭ قۇقىقتارىن قورعاۋ جونىندەگى 111 بايلانىس ورتالىعىن انىقتاۋ تۋرالى» بۇيرىقتى بەكىتتى, دەپ حابارلايدى Egemen.kz.
2024 جىلعى 13 قىركۇيەكتە كۇشىنە ەنەتىن بۇيرىققا سايكەس, «ازاماتتارعا ارنالعان ۇكىمەت» مەملەكەتتىك كورپوراتسياسى» كوممەرتسيالىق ەمەس اكتسيونەرلىك قوعامى بايلانىس ورتالىعى بولىپ بەلگىلەنگەن.
«111 بايلانىس ورتالىعى اقپاراتتىق تەحنولوگيالار سالاسىنداعى ۋاكىلەتتى ورگان بەلگىلەيتىن زاڭدى تۇلعا بولىپ سانالادى», دەلىنگەن قۇجاتقا بەرىلگەن تۇسىنىكتەمەدە.
بۇيرىق «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ايەلدەردىڭ قۇقىقتارىن جانە بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىن ىسكە اسىرۋ اياسىندا قابىلداندى.
بۇل زاڭمەن «نەكە (ەرلى-زايىپتىلىق) جانە وتباسى تۋرالى» كودەكسكە وزگەرىستەر مەن تولىقتىرۋلار ەنگىزىلەدى, ونىڭ ىشىندە «111» بايلانىس ورتالىعى ۇعىمى ەنگىزىلەدى.