بۇگىن استانادا اەس سالۋ ماسەلەلەرى بويىنشا كوپشىلىك جاريا تالقىلاۋ ءوتتى. جيىندا ءماجىلىس دەپۋتاتى ەلنۇر بەيسەنباەۆ اەس سالۋ ماسەلەسى بويىنشا رەفەرەندۋم وتكىزۋ «حالىق ۇنىنە قۇلاق اساتىن مەملەكەت» تۇجىرىمداماسىنىڭ قاعيداتتارىن ىسكە اسىرۋ ەكەنىن اتاپ ءوتتى, دەپ جازادى Egemen.kz.
جاقىندا ەلىمىزدە اەس سالۋ بويىنشا رەفەرەندۋم ۇيىمداستىرىلادى. بۇگىنگى جاريا تالقىلاۋدا حالىقتى الاڭداتقان سۇراقتار تالقىلاندى.
«بۇگىنگى قوعامدىق كەڭەستە اەس تۋرالى ءتۇرلى پىكىرلەر ايتىلدى. فۋكۋسيماداعى جانە چەرنوبىلدا بولعان اپاتتى دا تىلگە تيەك ەتتى. بىراق توتەنشە جاعداي بولعانمەن جاپونيا مەن رەسەي اەس سالۋدان باس تارتقان جوق. قازىرگى تاڭدا ەكى ەلدە دە اەس كەمىندە 30 پايىز ەنەرگەتيكالىق تۇراقتىلىقتى ساقتاپ وتىر. ال فرانتسيانى 70 پايىز ەنەرگەتيكالىق تۇراقتىلىقپەن اەس قامتاماسىز ەتىپ وتىر», دەدى ەلنۇر بەيسەنباەۆ.
دەپۋتات قازىر ەلدە ەنەرگيا تاپشىلىعى بار ەكەنىنە توقتالىپ, بۇل 10 جىلدان كەيىن اۋىر زارداپتارعا اكەلۋى مۇمكىن ەكەنىن ەسكەرتتى. سوندىقتان قوعامدىق تالقىلاۋ بارىسىندا بۇل تاقىرىپتى عىلىمي تۇرعىدان قاراستىرۋ ماڭىزدى.
«الەمدە بارلىق مەملەكەت كومىردەن الىناتىن ەنەرگيادان باس تارتىپ جاتىر. ماسەلەن, كورشىلەس قىتاي مەملەكەتىن الايىق. وسىدان 12 جىل بۇرىن بەيجىڭ قالاسىندا بولدىم. ول كەزدە قالا كوشەلەرىندە تازا اۋا بولمايتىن بىراق قازىر ول الەمدەگى تازا ەكولوگيالىق قالالاردىڭ قاتارىنا كىرىپ وتىر. سوندىقتان دا ءبىزدىڭ ەلدە مىندەتتى تۇردە تۇراقتى ەنەرگيانى قامتاماسىز ەتۋ كەرەك. بۇگىنگى تالقىلاۋدا ءتۇرلى وقىس جاعدايلار بولۋى مۇمكىن دەگەن پىكىرلەر ايتىلىپ جاتىر. بۇل ايتىلىپ جاتقان پىكىرلەردىڭ عىلىمي جاعىنا نازار اۋدارۋ قاجەت. وسى كۇنگە دەيىن ەلىمىزدە ءۇش رەفەرەندۋم ءوتتى. ولاردىڭ بارلىعى ساياسي باعىتتا بولدى. قازاقستان ءبىرىنشى رەت الەۋمەتتىك, قوعامدى مازالايتىن رەفەرەندۋمدى وتكىزەيىن دەپ جاتىر. ياعني, بۇل مەملەكەت باسشىسى ايتقان «قۇلاق اساتىن مەملەكەت» قاعيداسىنىڭ ىسكە اسىپ جاتقانىن كورسەتەدى. بۇگىن شىنايى پىكىرتالاس ءوتىپ جاتىر. ءيا راس, وسىندا اەس-ءتى قولداۋشىلاردىڭ قاتارى كوبىرەك. پىكىر ايتۋشى عىلىمي ساراپشىلاردا بار. «امانات» پارتياسى وسى يدەيانىڭ مەيلىنشە شىنايى ىسكە اسۋىنا جانە داۋىس بەرۋدە ادىلەتتىلىكتى ساقتاۋعا كۇش سالادى. ءبىزدىڭ قاتارىمىزدا دا كاسىبي ەنەرگەتيكا ماماندارى بار. سوندىقتان دا بۇل تاقىرىپقا جان-جاقتى قاراۋ قاجەت», دەدى دەپۋتات.