اباي وبلىسىندا ء«دىن ماسەلەلەرى بويىنشا بىلىكتى ماماندار دايارلاۋ» جوباسى اياسىندا اقپاراتتىق-ءتۇسىندىرۋ توپتارىنىڭ مۇشەلەرىنە ارنالعان وقىتۋ سەمينارلار مەن ترەنينگتەر ءوتتى, دەپ جازادى Egemen.kz
وسى جىلدىڭ 13-14 تامىزىندا سەمەي قالاسىنداعى اباي اتىنداعى امبەباپ كىتاپحاناسىندا مادەنيەت جانە اقپارات مينيسترلىگىنىڭ ءدىن ىستەرى كوميتەتىنىڭ قولداۋى, «رۋحاني جاڭعىرۋ» قوعامدىق قورىنىڭ ۇيىمداستىرۋىمەن ءدىن ماسەلەرى بويىنشا بىلىكتى مامانداردى دايارلاۋعا باعىتتالعان ءىس-شارا ءوتتى. شاراعا ء«دىن زەرتتەۋ ورتالىعىنىڭ», مەشىتتەردىڭ, اقپاراتتىق ءتۇسىندىرۋ توبىنىڭ مۇشەلەرى, يمامدار, پسيحولوگتار مەن تەولوگتار قاتىستى. جيىندا ءدىن ماسەلەلەرى بويىنشا ءتۇسىندىرۋ توبىنىڭ مۇشەلەرى – نەيرولينگۆيستيكالىق باعدارلامالاۋ مامانى, پسيحولوگ سەيتقالي ميرزادا شاحمان ۇلى جانە ءدىنتانۋشى مىرزاەۆ بالعابەك ابدىقايىم ۇلى ءدارىس وقىدى.
سەيتقالي ميرزادا شاحمان ۇلى «وراتورسكوە ماستەرستۆو: يسكۋسستۆو پۋبليچنىح ۆىستۋپلەني» تاقىرىبىندا سويلەۋ تەحنيكاسىن مەڭگەرۋدىڭ ءتيىمدى جولدارىن اتاپ ءوتىپ, دۇرىس تىنىس الۋدى, ءۇننىڭ قۇلاققا جاعىمدى, ءسوزدىڭ, بۋىننىڭ اشىق, ايقىن بولۋىنا سەپتىگىن تيگىزەتىن تاسىلدەرمەن ءبولىستى. سونداي-اق, «ناۆىكي ۆىسوكوەففەكتيۆنىح ليۋدەي» تاقىرىبىندا جالپى تەوريالىق اقپارات بەرىپ, قاتىسۋشىلارمەن اقپارتتىق بايلانىس ورناتتى.
مىرزاەۆ بالعابەك ابدىقايىم ۇلى «قازاقستان رەسپۋبليكاسىنداعى راديكالدىق جانە ەكسترەميستىك باعىتتاعى ءدىني اعىمدار جانە ولاردىڭ بەلسەندىلىگى تۋرالى» تاقىرىبى اياسىندا تىڭداۋشىلارعا ءدىني سانانىڭ ەرەكشەلىكتەرىن, دىندارلىقتىڭ قۇرىلىمىن, جەكە تۇلعانىڭ جانە قوعامنىڭ ءدىني دامۋ ايىرماشىلىقتارىن ءتۇسىندىردى. سونداي-اق «زايىرلىلىق جانە ونىڭ ءدىني بىرلەستىكتەرمەن قارىم قاتىناسىنىڭ نەگىزگى پرينتسيپتەرى» تاقىرىبىندا قاتىسۋشىلارعا جاستار اراسىنداعى تاۋەكەل توپتارىن انىقتاۋ ءۇشىن پروفايلينگ تەحنيكاسىن, ياعني, قىلمىس جاساۋعا دايىن تۇرعان تۇلعانىڭ سىرتقى كەلبەتىنە, ميميكاسىنا, ءجۇرىس-تۇرىسىنا قاراپ قالاي انىقتاۋعا بولاتىنىن ءتۇسىندىردى.
سونىمەن قاتار, سەمينار مەن ترەنينگتەر بارىسىندا قاتىسۋشىلار تاراپىنان دارىسكەرلەرگە سۇراقتار قويىلىپ, تۇجىرىمدى جاۋاپتار الىندى.