ينتەرنەت كەڭىستىگى كەڭەيگەن سايىن جاساندى ينتەللەكتىنىڭ مۇمكىندىگى ارتىپ كەلەدى. ونىڭ قارىم-قابىلەتىنىڭ ۇدەرىسىنە قاراپ, ءبىراز مامان الاڭنان شىعىپ قالۋدان قورقاتىنى راس. ونى مەڭگەرىپ, اقىلىنا اقىل قوسقان ماماندار جاڭاشىل دۇنيەدەن ەندىگى جۇرەكسىنبەيتىنىن ايتادى. ويتكەنى جاساندى ينتەللەكت قايتكەندە دە ادام ينتەللەكتىسىمەن قاتار تۇرا المايدى. ماماندار ونى جۇمىس بارىسىن جەڭىلدەتۋگە, ءىستىڭ ونىمدىلىگىن ارتتىرۋعا ارنالعان قۇرال رەتىندە كەڭ قولدانىپ ءجۇر. قاراپايىم ادامدار دا وسىنى تۇسىنۋگە ءتيىس.
ينتەرنەتكە «جاساندى ينتەللەكت» دەپ جازساڭىز, الدىڭىزدان روبوت بەينەسى, ميدىڭ سۋرەتى, كوپ تسيفر مەن تاڭبا شىعا كەلەدى. ءبىزدىڭ سانامىزدا جاساندى ينتەللەكتىنىڭ بەينەسى وسىنداي. «Yandex Qazaqstan» كومپانياسىنىڭ جاساندى ينتەللەكت تەحنولوگيالارىن دامىتۋ جونىندەگى ديرەكتورى الەكساندر كراينوۆتىڭ ايتۋىنشا, نەگىزىندە جاساندى ينتەللەكت «قارا جاشىك» ىسپەتتى. بۇل جاشىكتىڭ ىشىندە كۇردەلى سحەمالار, نەيروندىق جەلىلەر بولادى. ول نەيروندىق جەلىلەر بىرنەشە قاباتتان, قاباتتار نەيرونداردان تۇرادى. نەيرون – قاراپايىم فورمۋلا. مۇندا بىرنەشە مالىمەت ەنگىزىلىپ, ءبىر شەشىم شىعارىلادى.
جاساندى ينتەللەكتىنىڭ وقىتۋ جانە قولدانۋ دەگەن ەكى كەزەڭى بارىن ەسكەرسەك, ادام ازىرلەگەن روبوت وزدىگىمەن ەشتەڭە ۇيرەنە المايدى. ونىڭ باعدارلاماسىنا ءتۇرلى دۇنيەنى ەنگىزەتىن, وقىتاتىن – ادام. قانداي دا ءبىر روبوتتى جاساپ, وزدىگىمەن جىبەرە سالساڭىز, ونىڭ قازىرگى دەڭگەيى مەن 10 جىلدان كەيىنگى دەڭگەيى ءبىر بولادى. ال ادام ميى كۇن سايىن جاڭا مالىمەت قابىلدايدى.
جالپى, جاساندى ينتەللەكت تۋرالى تۇسىنىكتى جەتكىزۋ قيىن. ول تۋرالى ناقتى تۇسىنىك جوق. اركىم ءارتۇرلى پىكىر ايتادى. بىرەۋلەر جاساندى ينتەللەكت ادامعا ءتان قابىلەتتەردى جۇزەگە اسىرا الاتىن ماشينا دەيدى. الەكساندر كراينوۆ ونى ادام شەشە المايتىن ەسەپتەردى شەشۋگە قاۋقارلى قۇرال دەپ وتىر. ماسەلەن, ادام وپ-وڭاي اقۋىز مولەكۋلاسىنىڭ قۇرىلىمىن ايتا المايدى. جاساندى ينتەللەكت ادام ميىنا كىرىپ-شىقپايتىن وسىنداي بولجامداردى بولجاي الادى. بىراق ول بارلىق جاعدايدا شىندىققا جاناسپاۋى مۇمكىن. سەنىمدىلىك ءۇشىن فاكتچەكينگ جاساعان ابزال.
قايتكەندە دە جاساندى ينتەللەكت ءبىزدىڭ ءومىرىمىزدىڭ ءبىر اجىراماس بولىگىنە اينالدى. قازىر جاساندى ينتەللەكتىنىڭ تەحنولوگيالارىن عانا ەمەس, ونىمدەرىن دە ءجيى قولدانىپ ءجۇرمىز. ءبىر قۋانتاتىنى, قازاقتىلدى ونىمدەر دە كوبەيىپ كەلەدى. قازىر «Yandex Qazaqstan» كومپانياسى قازاق تىلىندە جاساندى ينتەللەكت ونىمدەرىن ازىرلەۋگە بەلسەندى تۇردە ينۆەستيتسيا سالىپ جاتىر. بۇل تۋرالى «Qaz.AI» جاساندى ينتەللەكتىنى دامىتۋ قاۋىمداستىعى ۇيىمداستىرعان شەبەرلىك ءدارىس بارىسىندا بەلگىلى بولدى. بۇل قادام ەلىمىزدىڭ جاساندى ينتەللەكت سالاسىنداعى ۇستانىمىن ەداۋىر كۇشەيتۋگە جانە جاڭا تەحنولوگيالاردىڭ دامۋىنا ىقپال ەتۋگە باعىتتالعان.
«Qaz.AI» قاۋىمداستىعى ەلىمىزدەگى تەحنولوگيالىق كومپانيالاردى بىرىكتىرىپ, ءبىلىم مەن تاجىريبە الماسۋ پلاتفورماسى رەتىندە قىزمەت ەتەدى. قاۋىمداستىق قۇرىلعان ساتتەن باستاپ جاساندى ينتەللەكت سالاسىنداعى ۇلتتىق دامۋ مەن وپەراتسيالىق جۇيەلەردەگى وزگەرىستەردى رەتتەۋمەن اينالىسىپ كەلەدى. جاقىندا قاۋىمداستىق شەبەرلىك ءدارىس وتكىزىپ, جاساندى ينتەللەكتىنى قوعامدا قالاي قولدانۋعا بولاتىنىن ءتۇسىندىردى. سونداي-اق وقۋ بارىسىندا قاتىسۋشىلار جاساندى ينتەللەكتىگە بايلانىستى ءتۇرلى ماسەلە مەن مۇمكىندىك تۋرالى تالقىلاپ, بىلىمدەرىن تەرەڭدەتە ءتۇستى.
كەزدەسۋ بارىسىندا «Qaz.AI» جاساندى ينتەللەكتىنى دامىتۋ قاۋىمداستىعى «Yandex Qazaqstan»-نىڭ جاڭا مۇشەسى رەتىندە قوسىلعانىن حابارلادى. باسشىلىقتىڭ ايتۋىنشا, ەلىمىزدە بۇل سەرىكتەستىك جاساندى ينتەللەكتىنى ەنگىزۋدى جىلدامداتادى ءارى بىرگە كوتەرگەن جۇك جەڭىل بولارى انىق.
«Yandex Qazaqstan»-نىڭ قاۋىمداستىققا قوسىلعانىنا قۋانىشتىمىز. تاجىريبەلى, اۋقىمدى ساراپتاماسى بار «Yandex Qazaqstan» سياقتى ءىرى كومپانيانىڭ مۇشەلىك ەتۋى ءبىزدىڭ مۇمكىندىگىمىزدى ايتارلىقتاي ارتتىرادى. يننوۆاتسيالاردى ىلگەرىلەتۋگە جانە ەلىمىز ءۇشىن نەگىزگى باستامالاردى قولداۋعا كومەكتەسە وتىرىپ, ەلىمىزدە ۇلتتىق جاساندى ينتەللەكتىنى دامىتۋ باعىتىندا قىزمەت ەتەمىز», دەدى جاساندى ينتەللەكتىنى دامىتۋ قاۋىمداستىعىنىڭ توراعاسى باقىتجان ەشمۇحامبەتوۆ.