كۇنى كەشە جەڭىل سالماقتىڭ ساڭلاقتارى پاريج وليمپياداسىندا العاشقى كەزدەسۋلەرىن وتكىزدى. 51 كەلىدە ەل نامىسىن قورعايتىن ساكەن بيبوسىنوۆ ەۋروپا چەمپيونى, تۇركيالىق سامەت گۋمۋشتان باسىم ءتۇستى. وسى سالماقتا فاۆروريتتەردىڭ ءبىرى سانالاتىن وزبەك بوكسشىسى حاسانبوي دۋسماتوۆ پۋەرتو-ريكولىق 18 جاستاعى حۋان لوپەستەن ايلاسىن اسىرىپ, كەلەسى كەزەڭگە ءوتتى. ەندى 51 كەلىدە 1/4 فينالدا قازاق-وزبەك بوكسشىلارى ءوزارا مىقتىنى انىقتايدى, دەپ جازادى Egemen.kz.
حاسانبوي دۋسماتوۆ كەشەگى جەڭىسىنەن كەيىن ساكەن بيبوسىنوۆقا قارسى وتەتىن جەكپە-جەككە قاتىستى پىكىر ءبىلدىردى.
«ساكەنمەن كوپتەگەن تۋرنيردە ءجيى كەزدەسكەنبىز. ءبىر-ءبىرىمىزدى جاقسى بىلەمىز. رينگ كورسەتەدى. كىم جاقسى دايىندالعان, كىم اقىلدىراق سول جەڭەدى دەپ ويلايمىن», دەدى وزبەك بوكسشىسى.
Olamsport-قا بەرگەن سۇحباتىندا ول جاسىنا قاتىستى ايتىلىپ جاتقان سىندارعا دا جاۋاپ بەردى.
«قازىر كوردىڭىزدەر 17-18 جاستاعى بوكسىشىنى جەڭدىم. ساكەن بيبوسىنوۆتىڭ بۇگىنگى جەكپە-جەگىن دە نازاردان تىس قالدىرمادىم. ەندى جاتتىقتىرۋشىلارىمىزبەن بىرگە اناليز جاسايمىز. باسقا تاكتيكا ويلاستىرامىز. باسقا جەكپە-جەكتەردەن ايرىقشا بولۋى مۇمكىن. قازىر كورىپ وتىرمىز ساكەننىڭ دە فيزيكالىق دايىندىعى جاقسى, مەن دە سول قاتاردامىن. وزبەكستان - قازاقستان جانكۇيەرلەرى ءۇشىن قىزىق جەكپە-جەك بولادى», دەدى حاسانبوي دۋسماتوۆ.
ايتا كەتەيىك, حاسانبوي دۋسماتوۆ 1993 جىلى 24 ماۋسىمدا وزبەكستاننىڭ انديجون وبلىسىندا دۇنيەگە كەلگەن.