شۋ القابى. قاراسورا ەسىرتكىسى. اۋەدەن باقىلاۋ

شۋ اۋدانىنىڭ قالىڭ قۇمى ىشىندە جاتقان قو­­ر­ا­عاتى سا­يىندا ەسىرتكى جيناۋمەن اينالىسقان ءبىر ازامات ۇستالدى. بۇرىن دا ءبىر مارتە سوتتى بولعان 40 جاستاعى ول 879 كيلو بولاتىن جاڭا ورىلعان ماريحۋا­نانى تاسىمالداۋعا دايىنداپتى. ەكى كۇننەن كەيىن مەركى اۋدانىندا تاعى بىرەۋ قۇرىقتالدى. ول 627 كيلو ماريحۋانا جيناعان. مىنە, وسىلايشا, شۋ القابىنداعى ەسىرتك­ى ساۋ­داسىنىڭ جاڭا ماۋسىمى قۇ­قىق قورعاۋ قىزمەتكەرلەرى ءۇشىن ءا دەگەننەن قاربالاسپەن باستالدى. قۇزىرلى ورگاندار بەرگەن ءما­لىمەتكە سۇيەنسەك, ناۋقان كەزىندە شۋ القابى ارقىلى 100 تونناعا دەيىن ما­ريحۋانا وتەتىن كورىنەدى. بيىل­عى جىلى ەسىرتكى قىلمىسىنا قارسى كۇرەس جانە ەسىرتكى تاسىمالى جولدارىن جابۋ باعىتىندا ۇلكەن تاس جول بويىنان بىرنەشە مو­بيلدى بەكەتتەر قويىلدى. جا­قىن­دا عانا شۋ اۋدانىندا وتكەن «كوك­نار-2015» رەسپۋبليكالىق جەدەل-الدىن الۋ ءىس-شارا­سىنىڭ باس­تى ەرەكشەلىگى – بيىلدان باستاپ ەسىرت­كى زاتتارىن جيناۋشىلاردى ۇستاۋ جانە القاپتى باقىلاپ وتىرۋ ءۇشىن ۇشقىشسىز باسقارىلاتىن ۇشۋ اپپاراتتارى قولدانىلاتىن بولعان. ياعني, ەسىرتكى القابى اۋەدەن دە باقىلانادى. سونداي-اق, مي-2 تىكۇشاعى مەن ان-2 ۇشاعى ەسىرتكى جيناۋشىلاردىڭ ادىمىن اشتىرمايدى دەگەن ءۇمىت بار. – جىل وتكەن سايىن شۋ القا­بىنان ەسىرتكى ساۋداسىمەن اينالىسۋشىلار ادىستەرىن وزگەرتىپ, جەتىلدىرىپ وتىرادى, – دەيدى بىزبەن اڭگىمەسىندە جامبىل وبلىستىق ەسىرتكى بيزنەسىنە قارسى كۇرەس دەپارتامەنتىنىڭ باستىعى, پوليتسيا پولكوۆنيگى شوپىرحان جاپاباەۆ. – ايتەۋىر, پوليتسيا ولاردىڭ, ولار ءبىزدىڭ الدىمىزدى وراپ, سان سوقتىرىپ كەتكىسى كەلەدى. وتكەن جىلى مەركىدە ەسىرتكى ساۋداسىمەن اينالىسقان توپ قۇرىقتالدى. ناتيجەسىندە, توپتىڭ جەتەكشىسى 19 جىلعا سوتتالدى. ۇستالعان التى ادامنىڭ ۇشەۋى – ايەل, ونىڭ بىرەۋى – مۇ­عالىم. كوردىڭىز بە, بۇلار پولي­­تسيانىڭ كۇدىگى از تۇسەتىن نازىك جاندىلاردى جانە كۇندەلىكتى ەلمەن ارالاسىپ, بالا تاربيەلەۋمەن اينالىسىپ جۇرگەن ۇستازدى قاتا­­رىنا تارتقان. ودان بولەك, مۇنداي توپتار سوڭعى جىلدارى جۇيرىك ءارى مىقتى جىلقىلاردى دايىنداۋمەن اينالىسىپ كەلەدى. ءسويتىپ, كولىك جۇرە المايتىن ايدالامەن اتتارمەن ءوتىپ كەتكىسى كەلەدى. بىلتىرعى جىلى ءبىر سالت اتتىنى 45 ءمينوت قۋالاپ ءجۇرىپ, ارەڭ ۇستادىق. 75 كيلو كەپتىرىلگەن ەسىرتكىنى وڭگەرىپ العان كوك اتتى قاشقىن پوليتسيا قىز­مەتكەرلەرىنىڭ جانكەشتى قيمىل-ارەكەتىنىڭ ارقاسىندا قولعا ءتۇستى. ورالحان ءداۋىت, «ەگەمەن قازاقستان». جامبىل وبلىسى.