قاراعاندىداعى سپاسسك ورتالىعىندا ءى رەسپۋبليكالىق «ايبىن» جاستار جيىنى وتۋدە
الدىڭعى كۇنى قاراعاندى وبلىسىنا قاراستى سپاسسك وقۋ-جاتتىعۋ ورتالىعىنىڭ بازاسىندا «ايبىن» رەسپۋبليكالىق اسكەري-پاتريوتتىق جاستار جيىنى باستالدى.
ول قازاقستاندىق بەلسەندى جاستاردىڭ 800-دەن اسا وكىلىنىڭ باسىن قوستى. وعان قاتىسۋشىلار اسكەري-پاتريوتتىق كلۋبتاردىڭ تاربيەلەنۋشىلەرى, اسكەري-قولدانبالى سپورت ءتۇرى بويىنشا وبلىستىق جانە قالالىق جارىستاردىڭ جەڭىمپازدارى. سونداي-اق, الماتى, قاراعاندى, شىمكەنت, سەمەي, پاۆلودار, اقتوبە قالالارىنداعى رەسپۋبليكالىق اسكەري مەكتەپ ينتەرناتتارىنىڭ, «جاس ۇلان» رەسپۋبليكالىق مەكتەبى جانە «ارىستان» ليتسەيىنىڭ ءتاربيەلەنۋشىلەرى.
جيىننىڭ اشىلۋ راسىمىندە قورعانىس ءمينيسترىنىڭ ءبىرىنشى ورىنباسارى – باس شتاب باستىعى گەنەرال-پولكوۆنيك ساكەن جاسۇزاقوۆ قاتىسۋشىلارعا ارناپ قۇتتىقتاۋ ءسوز سويلەدى. «ايبىن» جيىنى 10-13 ماۋسىم ارالىعىندا وتەدى. قاتىسۋشىلاردى مازمۇندى باعدارلاما كۇتىپ تۇر. ونىڭ ىشىندە: بەلتەمىرگە تارتىلۋ, 100 مەترلىك نىسانا كوزدەۋ, اسكەري-مەديتسينالىق دايارلىق بويىنشا جاراقات تاڭۋدى ۇيرەنۋ, پروتيۆوگاز سكافاندرىن كيۋ سياقتى جاتتىعۋلار بار. سپاسسك وقۋ-جاتتىعۋ ورتالىعىنىڭ پوليگونىندا ەل اسكەرىنىڭ جاراعىندا تۇرعان اتىس قارۋىنىڭ ۇلگىلەرى, ۇرىس قۇرالدارى, وپتيكالىق اسپاپتار, 9 مم ماكاروۆ تاپانشاسى, 9 مم اكس تاپانشاسى كورسەتىلدى. ونىڭ ىشىندە «راديوتوسقاۋىل» دابىلداما كەشەنى دە بار. ول كۇزەتىلەتىن ايماقتان 3 شاقىرىم قاشىقتىقتا بايقالعان ءىس-ارەكەتتەردى انىقتاۋعا مۇمكىندىك بەرەدى. جيىنعا قاتىسۋشىلارعا لاڭكەستىككە قارسى كەز كەلگەن كەدەرگىلەردى بۇزىپ وتەتىن «روبوت-بارلاۋشى» جۇيەسى ەرەكشە اسەر قالدىردى. «بىزدە قابىرعانىڭ ارعى بەتىندە تۇرعان قارسىلاستى اشكەرەلەۋگە مۇمكىندىك بەرەتىن راديولوكاتسيالىق ستانسا دا بار. بۇل لاڭكەستىككە قارسى تاپسىرمالار كەزىندە شىعىنسىز ارەكەت ەتۋگە مۇمكىندىك بەرەدى», – دەپ ءتۇسىنىك بەردى جاستارعا اسكەري قىزمەتشىلەر. سول جەردە اسكەري-پاتريوتتىق كلۋب مۇشەلەرىنە ۇشقىشسىز ۇشۋ اپپاراتتارى دا كورسەتىلدى. جيىننىڭ باستى مىندەتى – جاستاردىڭ اسكەري-پاتريوتتىق تاربيەسىن جەتىلدىرۋ, وسى باعىتتاعى كلۋبتاردىڭ ءىس-قيمىلىن ۇيلەستىرۋ, جاستاردى قارۋلى كۇشتەردەگى اسكەري قىزمەتكە دايارلاۋ, ولاردىڭ بويىندا اسكەري قىزمەتتى وتەۋ كەزىندە قاجەت داعدىلار مەن ەپتىلىكتى قالىپتاستىرۋ.
ايقىن نەسىپباي, «ەگەمەن قازاقستان».
قاراعاندى وبلىسى.