ۇلتتىق دومبىرا كۇنى ورال قالاسىندا ەرەكشە دومبىرا مۋزەيى اشىلدى. باتىس قازاقستان وبلىستىق تاريحي-ولكەتانۋ مۋزەيىنىڭ ءبولىمى بولىپ اشىلعان جاڭا مۇراجايدا ۇلتتىق اسپاپتىڭ تاريحى جانە وڭىردەن شىققان مايتالمان كۇيشى-دومبىراشىلار تولىق قامتىلعان.
«دومبىرا – ۇلتتىق رۋح» دەپ اتالعان جاڭا مۋزەيدىڭ اشىلۋ سالتاناتىنا باتىس قازاقستان وبلىسى اكىمىنىڭ ورىنباسارى باقىتجان نارىمبەتوۆ ارنايى كەلىپ, مۋزەي مەيماندارىن ۇلتتىق دومبىرا كۇنىمەن قۇتتىقتادى. «جاڭا مۋزەي زامان كوشىنەن قالمايدى, جاڭا قارقىنمەن, جاڭاشا سەرپىنمەن جۇمىسىن جالعايدى دەپ سەنەمىن», دەدى ءوز سوزىندە باقىتجان حابەر ۇلى.
جيىندا وڭىرگە تانىمال تاريحشى, ولكەتانۋشى, مادەنيەت سالاسىنىڭ ارداگەرى جايساڭ اقباي دا قۇتتىقتاۋ ءسوز سويلەپ, تاريحتىڭ ۇزاق كوشىندە قازاق حالقى تۋدىرعان عاجايىپ كۇي ونەرىنىڭ ەرەكشە باعالى ەكەنىن ايتتى. ون ساۋساعىنان كۇي توگىلگەن كۇيشىنى حالىق ەل بيلەگەن كوسەم, داۋ توقتاتقان شەشەن, اقيىق اقىنمەن قاتار قۇرمەتتەگەنىن باياندادى.
وسى كۇنى مۋزەي قورىنا ايگىلى ىقىلاس دۇكەن ۇلى ۇستاعان قوبىزدىڭ كوشىرمەسىن دينا نۇرپەيىسوۆا اتىنداعى قازاق حالىق اسپاپتارى اكادەميالىق وركەسترىنىڭ سوليست-قوبىزشىسى, ونەرتانۋ كانديداتى, مادەنيەت سالاسىنىڭ ۇزدىگى, ىقىلاس اتامىزدىڭ ۇرپاعى اقنار تاتتىبايقىزى رەسمي تۇردە تابىستاپ, ىقىلاس دۇكەن ۇلىنىڭ «اققۋ» كۇيىن ورىندادى.
جاڭا مۋزەيدىڭ اشىلۋىنا قازاقستاننىڭ ەڭبەك سىڭىرگەن مادەنيەت قىزمەتكەرى, كۇيشى-دومبىراشى ەرمەك قازيەۆ, «ەرەن ەڭبەگى ءۇشىن» مەدالىنىڭ يەگەرى, دومبىراشى-شەبەر ەدىگە نابيەۆ, قازاقستاننىڭ ەڭبەك سىڭىرگەن قايراتكەرى, قۇرمانعازى اتىنداعى ساز كوللەدجىنىڭ ديرەكتورى نۇرجان سەرتەكوۆ, «ورال سازى» فولكلورلىق-ەتنوگرافيالىق ءانسامبلى, باق وكىلدەرى, مۋزەي قىزمەتكەرلەرى قاتىستى.
شىعىس ءستيلى بايقالىپ تۇراتىن كونە عيماراتتا ورنالاسقان دومبىرا مۋزەيى 4 زالدان تۇرادى. ونىڭ العاشقىسى – دومبىرا تاريحى زالى. مۇندا دومبىرانىڭ كونە تۇرلەرى, ءتىپتى التاي تاۋىنىڭ ءبىر ۇڭگىرىنەن تابىلعان, V عاسىرداعى كونە تۇركى داۋىرىنە جاتاتىن ابىز دومبىرانىڭ ماكەتى, كۇي ونەرىنە بايلانىستى قازاق اڭىزدارىنىڭ سۋرەتتەرى, ءحىح-حح عاسىرعا جاتاتىن دومبىرالار كوللەكتسياسى قويىلعان.
ەكىنشى, قۇرمانعازى ساعىرباي ۇلى اتىنداعى زالدا كۇي اتاسىنىڭ 1962 جىلى بقو مۋزەي قورىنا الىنعان ساۋىتى العاش رەت ەكسپوزيتسياعا قويىلعان. سونداي-اق اقىن, باتىر ماحامبەت وتەمىس ۇلىنىڭ سۋرەتى مەن دومبىراسى, قۇرمانعازىنىڭ سۋرەتى مەن دومبىراسىنىڭ كوشىرمەسى, تورە كۇيلەرىنىڭ نەگىزىن سالۋشى داۋلەتكەرەي شىعاي ۇلىنىڭ سۋرەتى, دينا نۇرپەيىسوۆانىڭ دومبىراسى مەن شاپانى, كۇيشى سەيتەك ورازالى ۇلىنىڭ بەينەسى جانە قازاقتىڭ كيىز ءۇيى قويىلعان.
ءۇشىنشى زال «قۇرمانعازى وركەسترى زالى» دەپ اتالادى. مۇندا اتى ايتىپ تۇرعانداي, قۇرمانعازى وركەسترىنىڭ نەگىزىن قالاۋشى احمەت جۇبانوۆ, ەۆگەني برۋسيلوۆسكي, لۇقپان مۇحيتوۆ, قامبار مەدەتوۆ, ماحامبەت جانە ناۋشا بوكەيحانوۆ جانە ت.ب. تۇلعالاردىڭ فوتوسۋرەتى, قالي جانتىلەۋوۆ, وقاپ قابيعوجين جانە تۇياقبەردى شامەلوۆتىڭ دومبىرالارى, شامعون قاجىعاليەۆتىڭ كوستيۋمى, وركەستردا وينالعان اسپاپتارى مەن ساحنالىق كيىمدەرى قويىلعان.
ال «باتىس ءوڭىرىنىڭ دومبىراشىلارى زالى» دەپ اتالعان ءتورتىنشى زالدا باتىس ءوڭىرىنىڭ كۇيشىلىك جانە انشىلىك مەكتەبى وكىلدەرىنىڭ فوتوسۋرەتتەرى, دومبىرالارى جانە ساحنالىق كيىمدەرى قويىلعان. مامەن ەرعالي ۇلى, مەڭدىعالي سۇلەيمەنوۆ, ەرعالي ەسجانوۆ, ماكار جاپاروۆ, مۇحيت بيتەنوۆ فوتوسۋرەتتەرى, عاريفوللا قۇرمانعاليەۆتىڭ ساحنالىق كيىمى, ءداستۇرلى ءانشى قالامقاس وراشەۆانىڭ ساحنالىق كيىمى, جاقسىلىق سارسەنعاليەۆ, قالامپىر راحيموۆا جانە ت.ب. تۇلعالاردىڭ فوتوسۋرەتى, باتىس وڭىردە العاش قۇرىلعان وركەسترلەردىڭ فوتوسۋرەتتەرى مەن دومبىرالارى قويىلعان.
«قازاق كۇي ونەرىندە باتىس قازاقستان ولكەسىنىڭ ورنى ەرەكشە. سوندىقتان ورال قالاسىندا دومبىرا مۋزەيىن اشۋ تۋرالى كوپتەن ويلانىپ جۇرگەن ەدىك. وسى يدەيامىز ءدال بۇگىن – ۇلتتىق دومبىرا كۇنى جۇزەگە اسقانىنا قۋانىشتىمىن», دەيدى وبلىستىق تاريحي ولكەتانۋ مۋزەيىنىڭ ديرەكتورى ميربولات ەرساەۆ.
باتىس قازاقستان وبلىسى