استانا. 11 ماۋسىم. قىزىلوردادا جىل باسىنان بەرى 134 جول كولىك وقيعاسى تىركەلىپ, 30 ادام قازا تاپتى. سونداي-اق, 168 جان ءارتۇرلى دەنە جاراقاتتارىن العان. بۇل كورسەتكىش وتكەن جىلمەن سالىستىرعاندا 5,5 پايىزعا وسكەندىگىن بىلدىرەدى. بۇل تۋرالى قىزىلوردا وبلىستىق پروكۋراتۋراسىنىڭ ءباسپاسوز قىزمەتى حابارلادى.
قىزىلوردا وبلىستىق پروكۋراتۋراسى باسقارما باستىعىنىڭ ورىنباسارى ن.دۇيسەنباەۆ جول-ءجۇرۋ زاڭدىلىعىنىڭ ساقتالۋىنا قاتىستى بۇقارالىق اقپارات قۇرالدارى وكىلدەرىنىڭ قاتىسۋىمەن بريفينگ وتكىزدى. سوڭعى 2 جىلدا جۇرگىزىلگەن تەكسەرۋمەن ەسەپتە تۇرعاندارعا زاڭسىز كولىك باسقارۋ, كۋالىكتەرىن بەرۋ, كىنالىلەردى جاۋاپتىلىقتان بوساتۋ, اكىمشىلىك ءىس جۇرگىزۋ ءتارتىبىن بۇزۋ جانە ايىپپۇلداردى وندىرمەۋ تۇرىندەگى زاڭسىزدىقتار انىقتالىپ, 50-گە جۋىق تۇلعالار جازاعا تارتىلدى.
وكىنىشكە وراي, بۇگىنگى كۇنى دە وسى تەكتەس زاڭسىزدىقتار جالعاسىپ كەلەدى.
ءبىر عانا پروكۋرورلىق تەكسەرۋمەن قۇقىق بۇزۋشىلاردى جازادان بوساتۋ, قىزمەتتىك كولىكتەر مەن ارنايى قۇرىلعىلاردى ءتيىمسىز پايدالانۋ, زاڭسىز اكىمشىلىك جاۋاپتىلىققا تارتۋ, كولىك قۇرالىن زاڭسىز تىركەۋ تۇرىندەگى ولقىلىقتار انىقتالدى.
ءبىر كۇندىك رەيدتىڭ وزىندە جۇرگىزۋ قۇقىعىنان ايىرىلعان ادامنىڭ اۆتوكولىكتى باسقارۋى, الدىڭعى تەرەزەلەرى قاراڭعىلانعان, مەملەكەتتىك تىركەۋ بەلگىلەرىنسىز جۇرگەن, جىلدامدىقتى اسىرىپ باسقارعان قۇقىق بۇزۋشىلار كەزدەستى.
سوڭعى جىلدارى وبلىس اكىمدىگىنىڭ قولداۋىمەن جول قاۋىپسىزدىگىن قامتاماسىز ەتۋ ماقساتىندا قىرۋار قارجىلار ءبولىنىپ, قاجەتتى اۆتوكولىكتەر مەن قۇرال-جابدىقتار ساتىپ الىندى. دەگەنمەن, پروكۋرورلىق تەكسەرۋ بارىسىندا ىشكى ىستەر ورگاندارى ارنايى جابدىقتالعان اۆتوكولىكتەر مەن قۇرالداردى ءتيىمسىز پايدالانۋ دەرەكتەرى تىركەلدى.
سونىمەن قاتار, جىلدامدىقتى اسىرۋ – جول-كولىك وقيعالارىنىڭ نەگىزگى سەبەبى ەكەنىنە قاراماستان, جىلدامدىق ولشەۋىش قۇرالىنا تىركەلگەن 4 قۇقىق بۇزۋشىعا قاتىستى زاڭمەن كوزدەلگەن شارالار قولدانىلماعان.
اعىمداعى جىلدىڭ وتكەن مەرزىمىنىڭ وزىندە پوليتسيا قىزمەتكەرلەرىنىڭ ارەكەتسىزدىگىنەن ماس كۇيدە كولىك قۇرالىن باسقارعان 8 تۇلعاعا قاتىستى اكىمشىلىك ىستەر سوت قاۋلىلارىمەن قىسقارتىلعان.
وسى اكىمشىلىك ىستەر بويىنشا پروكۋرورلىق قاداعالاۋ اكتىلەرى ەنگىزىلىپ, ناتيجەسىمەن 5 قىزمەتكەر, ونىڭ ىشىندە 2-ءۋى سىبايلاس جەمقورلىق سيپاتىندا تارتىپتىك جازالارعا تارتىلدى. سونداي-اق, تەكتەس زاڭسىزدىقتار قالاىشىلىك باعىتتارداعى كولىكتەردەن بولەك وبلىس جانە اۋدانارالىق باعىتتا قاتىنايتىن قوعامدىق كولىكتەردە دە ورىن الىپ, قۇزىرلى ورگاندارمەن مەملەكەتتىك باقىلاۋ تيىسىنشە جۇرگىزىلمەگەن.
ايتا كەتەرلىك جايت, وسى جىلدىڭ وزىندە جول ەرەجەلەرىن بۇزعانى ءۇشىن 17,5 ملن. تەڭگە ايىپپۇلداردى ماجبۇرلەپ ءوندىرۋ شارالارى قولدانىلماعان.
سول سياقتى پروتسەسسينگ ورتالىعى بويىنشا 1 ملن. تەڭگەدەن استام ايىپپۇل سالۋ تۋرالى ۇيعارىمدار زاڭمەن بەلگىلەنگەن مەرزىمدە جولدانباعان.
بۇعان دەيىن وسى تەكتەس زاڭسىزدىقتار ءۇشىن مامىر ايىندا 3 قىزمەتكەر سىبايلاس جەمقورلىق سيپاتىندا تارتىپتىك جازاعا تارتىلدى.
بريفينگ بارىسىندا ن.دۇيسەنباەۆ ىشكى ىستەر سالاسى بويىنشا سىبايلاستىق سيپاتىنداعى زاڭ بۇزۋشىلىق فاكتىلەردىڭ كوپ ەكەنىنە توقتالىپ, زاڭنان اتتاپ وتكەندەرگە قاتاڭ جازا قولدانىلاتىنىن جەتكىزدى. سونىمەن قاتار, تەكسەرىسپەن انىقتالعان زاڭدىلىقتى بۇزۋشىلىقتار بويىنشا پروكۋرورلىق قاداعالاۋ اكتىلەرى ەنگىزىلەدى.
تالعات رايىمبەك.
دەرەك: قىزىلوردا وبلىستىق پروكۋراتۋرانىڭ ءباسپاسوز قىزمەتى.
سۋرەت: azattyq.org.