پەتروپاۆل. 11 ماۋسىم.وبلىس اكىمى ەرىك سۇلتانوۆتىڭ توراعالىعىمەن وتكەن قۇقىق بۇزۋشىلىقتىڭ الدىن الۋ جونىندەگى ۆەدومستۆوارالىق كوميسسيانىڭ وتىرىسىندا ناشاقورلىق, ماسكۇنەمدىك سياقتى قوعامدىق كەسەلدەرمەن كۇرەس ماسەلەلەرى ءسوز بولدى. بۇل تۋرالى egemen. kz ءتىلشىسى حابارلادى.
وڭىردە 4 مىڭنان استام ماسكۇنەم تىركەۋگە الىنسا, ولاردىڭ تورتتەن ءبىرى ەسىرتكىگە تاۋەلدى. جىل باسىنان بەرى 2 مىڭعا جۋىق «اششى سۋعا» اۋەس ادام بەيىمدەۋ جانە ۋىتسىزداندىرۋ ورتالىعىنا جەتكىزىلىپ, ءتيىستى مەديتسينالىق كومەك كورسەتىلگەن. 75 ادام ەرىكسىز ەمدەلسە, 159 ادام ارنايى ەمدەۋ كۋرسىنان وتكەن.
بيىلعى جاعداي دا كوڭىل كونشىتەرلىك ەمەس. 129 ادام ديسپانسەرلىك ەسەپكە الىنعان, ولاردىڭ بەسەۋى – ماسكۇنەم جانە ناشاقور. ىشكى ىستەر دەپارتامەنتى مەن دەنساۋلىق ساقتاۋ باسقارماسىندا تىركەۋدە تۇرعان پسيحوتروپتىق زاتتار مەن الكوگولدى ىشىمدىككە بەيىم جانداردىڭ سانىندا ەلەۋلى ايىرماشىلىق بارىن اتاپ كورسەتكەن وبلىس پروكۋرورى ستەپان زايتلەر ەسەپ-قيساپتى تارتىپكە كەلتىرۋدى تالاپ ەتتى. بيىلدىڭ وزىندە عانا ناشاقورلىق جانە ەسىرتكى بيزنەسى بويىنشا 189 قىلمىس اشىلىپ, زاڭسىز اينالىمنان 9 كيلوگرامم ەسىرتكى زاتتارىنىڭ الىنۋى ءبىراز جايتتى اڭعارتسا كەرەك.
اكىمشىلىك پوليتسياسى باسقارماسى باسشىسىنىڭ ورىنباسارى سايلاۋبەك مۋسين بلاگوۆەششەنكا اۋىلىندا ورنالاسقان ناركولوگيالىق ورتالىقتا ورىنداردىڭ تاپشىلىعىنان ماجبۇرلەپ ەمدەۋ تۋرالى سوت شەشىمدەرى ۋاقتىلى ورىندالا بەرمەيتىنىن جەتكىزە كەلىپ, كەرەۋەت سانىن كوبەيتۋدى ءوتىندى.
ءومىر ەسقالي.
دەرەك, سۋرەت: egemen.kz