ورال. 11 ماۋسىم. باتىس قازاقستان وبلىستىق قازاق دراما تەاترى قىرىمدا وتكەن حالىقارالىق فەستيۆالدىڭ باس جۇلدەسىن جەڭىپ الدى. بۇل تۋرالى egemen.kz ءتىلشىسى حابارلادى.
باتىس قازاقستان وبلىستىق قازاق دراما تەاترى كەرچ قالاسىندا 5-10 ماۋسىم ارالىعىندا وتكەن «بوسپورسكيە اگونى» حالىقارالىق انتيكالىق ونەر فەستيۆالىنىڭ باس جۇلدەسىن جەڭىپ الدى.
قىرىم جەرىندە وسىمەن ون جەتىنشى رەت وتكىزىلگەن ونەر مەرەكەسىندە ورالدىقتار ەۆريپيدتىڭ «ترويا ارۋلارىمەن» كورىندى. ترۋپپانى تەاتر ديرەكتورى قۋانىش اماندىقوۆ پەن باس رەجيسسەرى مۇقانعالي تومانوۆ باستاپ باردى.
«ترويا ارۋلارى» تراگەدياسىن ورال ساحناسىندا تارازدىق بەلگىلى رەجيسسەر, ش.ايتماتوۆ اتىنداعى حالىقارالىق سىيلىقتىڭ لاۋرەاتى قۋاندىق قاسىموۆ بيىل قويعان بولاتىن. مىنە, وسى قويىلىم ءۇشىن باتىسقازاقستاندىق تەاتر فەستيۆالدىڭ باس جۇلدەسى - «بوسپور نيكاسىمەن» ماراپاتتالدى. سونىمەن قاتار گەكۋبا رولىندە ويناعان تەاتر اكتريساسى, قازاقستاننىڭ ەڭبەك سىڭىرگەن قايراتكەرى بيبىگۇل يساليەۆا «ەڭ ۇزدىك ايەل بەينەسى ءۇشىن» اتالىمىمەن ناگرادتالدى.
«قازاق تەاتر ونەرىن ءاردايىم جوعارى باعالايتىن رەسەيدىڭ حالىق ءارتىسى الەكساندر گولوبورودكو باستاعان قازىلار القاسى جانە فەستيۆالدى ۇيىمداستىرۋشىلار تاتيانا ۋمريحينا مەن ەلەنا كليمەنكولارعا ريزاشىلىعىمىزدى بىلدىرەمىز», - دەدى ق.قاسىموۆ.
ەسكە سالا كەتەيىك, باتىسقازاقستاندىق تەاتر بۇدان بۇرىن دا حالىقارالىق, رەسپۋبليكالىق ونەر بايقاۋلارىنا قاتىسىپ, ولجامەن ورالىپ جۇرگەن بولاتىن. اسىرەسە, 2012 جىلعى قازاندا قوستاناي قالاسىندا ءىلياس وماروۆتىڭ 100 جىلدىعىنا ارنالعان رەسپۋبليكالىق تەاترلار فەستيۆالىندە گريگوري گوريننىڭ «اتىڭ وشكىر گەروستراتىن» (رەجيسسەرى مۇقانعالي تومانوۆ) قويىپ, جەتى بىردەي جۇلدەنى الىپ قايتقان ەدى.
تەمىر قۇسايىن.
دەرەك, سۋرەت: باتىس قازاقستان وبلىستىق قازاق دراما تەاترىنىڭ ءباسپاسوز قىزمەتى.