مالىك تۋرالى كينو تۇسىرىلسە يگى
مالىك عابدۋللين – كەڭەس وداعىنىڭ باتىرى اتاعىن العاش بولىپ العان تۇلعالارىمىزدىڭ ءبىرى. ال وسى اتاق مەرزىمىنەن وتە كەش بەرىلگەن قولباسشى باۋىرجان مومىش ۇلى زامانداسىنا: «مالىكتىڭ عالىمدىق, پەداگوگيكالىق ەڭبەگى ءوز الدىنا, ول كەشەگى قان مايداندا ەل قورعاعان ەر, باتىر... ول – حالىق باتىرى. مالىكتى سىيلاۋ ول ءۇشىن ەمەس, كەيىنگى ۇرپاق ءۇشىن كەرەك», دەپ ءوزىنىڭ قۇرمەتىن بىلدىرگەن ەكەن.
جىر الىبى جامبىل بولسا: «باتىرىم – مالىك, بەرەنىم, جۇيرىگىم – وزعان ورەنىم. حالقى سۇيگەن قالاۋلىم, جىرىمدى ساعان توگەمىن», دەپ جىرلايدى.
الداعى جىلى تۋعانىنا 110 جىل تولاتىن مالىك اعامىز حاقىندا بۇعان دەيىن تالاي جازىلدى. باتىردىڭ سۇراپىل سوعىستاعى ەرلىگى تۋرالى العاش رەت كەڭەستىك بەلگىلى جازۋشى بوريس پولەۆوي 1943 جىلعى 25 ساۋىردە «پراۆدا» گازەتىندە «ەلدىڭ ەرى» دەگەن تاقىرىپپەن كولەمدى ماقالا جاريالاپ, جالپىعا ايگىلەدى.
م.عابدۋللين ماعان ناعاشى اعايىم بولىپ كەلەدى. ول جەلتاۋ تاۋىنىڭ زەرەندى جاعىندا ورنالاسقان قويسالعان اۋلىنان بولسا, ءبىز ەكىنشى جاعىندا ورىن تەپكەن قۇلەت اۋلىنان ەدىك. مالىك اعايىم ءوز اۋلىندا مەكتەپ بولماعاندىقتان, ءبىزدىڭ اۋىلداعى ءتورت جىلدىق مەكتەپتە ساۋات اشىپ, باستاۋىشتى سوندا ءبىتىرىپتى.
نەگىزگى ايتپاعىم, باتىردىڭ 110 جىلدىعىنا وراي بىرنەشە بولىمنەن تۇراتىن كوركەمسۋرەتتى فيلم تۇسىرىلسە دەگەن ۇسىنىس ەدى. مەن وسىدان ونشاقتى جىل بۇرىن وسى ماسەلەنى كوتەرىپ, مادەنيەت جانە اقپارات مينيسترلىگىنە حات جازعانمىن. بىراق ونداعىلار سول كەزدە باۋىرجان مومىش ۇلى, قاسىم قايسەنوۆ تۋرالى فيلمدەر تۇسىرىلگەنىن, قازىر ونداي كينو تۇسىرۋگە قارجىلاي مۇمكىندىك جوق ەكەنىن كولدەنەڭ تارتقان بولاتىن.
بولاشاق ۇرپاقتى پاتريوتتىق رۋحتا تاربيەلەۋ, اعا ۇرپاقتىڭ ەرلىك ىستەرىن كەڭىنەن ناسيحاتتاۋ ءۇشىن باتىرلارىمىز تۋرالى فيلمدەر كەرەك-اق دەر ەدىك.
سەرىك ناۋقانباي ۇلى,
ەڭبەك ارداگەرى
كوكشەتاۋ
ەڭبەكقوردىڭ ەرتەڭى ەڭسەلى
اكەمنىڭ ارقاسىندا كوپتەگەن پاراسات بيىگىندەگى ادامدارمەن تانىستىم. مىسالى, شەجىرەلى تومەنگى بارىسحان جەرىندە ءجاميلا بوجبامباەۆا, الەكساندر ناحمانوۆيچ, ورىنكۇل اتاباەۆا, ەلەنا سۆينكوۆسكايا, داريحا جانتوقوۆا سىندى ەلىمىزدىڭ بىرقاتار ەڭبەك ەرلەرى ءوسىپ شىقتى. ولاردىڭ جاسامپاز ىستەرىن بۇگىندە اۋىلداستارى جالعاستىرىپ وتىر. ا.ءناحمانوۆيچتىڭ تراكتورشىدان ەلگە تانىمال ۇجىمشار توراعالىعىنا دەيىن كوتەرىلگەنىن ايتا كەتكەننىڭ ارتىقتىعى جوق.
تالاس پەن قوستوبە اۋىلدارى بۇرىن قانداي بولسا, قازىر دە سول دەڭگەيدە. اينالاسى باۋ-باقشاعا ورانعان. قوستوبە اۋىلدىق وكرۋگىنىڭ اكىمى نۇرعالي قوجابەرگەنوۆ, وندىرىستىك كووپەراتيۆ ديرەكتورى زاكير مۋمينوۆ قىزمەتتەرىن الۋان مەنشىكتى اۋىل ەكونوميكاسىنىڭ ماڭىزدى بولىگى بولىپ تابىلاتىن شارۋا قوجالىقتارىن, جەكە كاسىپورىنداردى, شاعىن جانە ورتا بيزنەستى دامىتۋعا باعىتتاي جۇرگىزەدى. قايرات تۋعانباەۆ پەن سالامات راحمانبەرديەۆتىڭ كەنتتىك بولىسۋ قاعيداتىمەن جۇمىس ىستەيتىن جەكەمەنشىك كاسىپورنىنىڭ داڭقى اۋداننان تىس جەرلەرگە دە تاراعان. ولار جۇمىستارىن اۋىل شارۋاشىلىعى ونىمدەرىن جەرگىلىكتى جەردە وڭدەپ, ۇقساتۋ, كاسىپورىننىڭ قالامەن وندىرىستىك ينتەگراتسياسىن قالىپتاستىرۋ, تۇرعىنداردىڭ ءبىر بولىگىن جۇمىسقا تارتۋ مۇمكىندىگىن كەڭەيتۋ باعىتتارىندا جۇرگىزىپ كەلەدى جانە ول ءوز جەمىسىن بەرىپ وتىر.
قايرات مامبەتوۆتىڭ شۇجىق, سەرگەي لەسنياكتىڭ ءسۇت ونىمدەرى تسەحى, ال زاكير ءمۋمينوۆتىڭ وسىمدىك مايىن شىعاراتىن جەكە كاسىپورنى وڭىرگە جاقسى تانىلىپ قالدى دەۋگە بولادى. جالپى, اۋىل شارۋاشىلىعى ونىمدەرىن وندىرۋمەن كوپۇلتتى اۋىل تۇرعىندارىنىڭ 1 250 جەكە اۋلا شارۋاشىلىعى اينالىسادى. كەيىنگى جىلدارى ءداندى داقىلدار, ەت, ءسۇت ءوندىرۋ كولەمى ارتقان.
اۋىل ەكونوميكاسىنىڭ نەگىزگى سالماعىن تۇرعىنداردىڭ جەكە اۋىل شارۋاشىلىعى كوتەرىپ تۇرعانىن دا اتاپ كورسەتكەن ءجون. قالا بازارلارىن ىرىمشىك, سارى ماي, شۇجىق ونىمدەرىمەن قامتاماسىز ەتۋدە ولاردىڭ ۇلەسى ۇلكەن. شارۋا قوجالىقتارىندا ءداندى جانە مال ازىعى داقىلدارىنىڭ 65 پايىزى وسىرىلەدى. ەگەر ەڭ باستى پروبلەمالار: سۋ رەسۋرستارىن ءتيىمدى پايدالانۋ, يرريگاتسيالىق جۇيەلەردى رەتتەۋ, جەردى مەليوراتسيالاۋ, جايىلىمداردى سۋلاندىرۋ, تابيعي گازبەن جابدىقتاۋدى قالپىنا كەلتىرۋ سياقتى ماسەلەلەر وڭ شەشىلسە, وندا اۋىل ەكونوميكاسى قازىرگىدەن دە جاقسارا تۇسەر ەدى.
عايني كوشەكباەۆا,
پسيحولوگ
جامبىل وبلىسى,
بايزاق اۋدانى
بەلسەندى قىزمەتكەر بەلەسى
دەنساۋلىق ساقتاۋ مينيسترلىگى بەلدى قىزمەتكەرى جۇماعىز جاراسوۆا – ماقتان تۇتار ارىپتەسىمىز. ءوزى وتە قاراپايىم دا كىشىپەيىل, سونىمەن بىرگە, بىلىكتى فارماتسەۆتيكا ءىسىن ۇيىمداستىرۋشى كاسىبي مامان.
جۇماعىز عالىمجانقىزى استانا قالاسىنىڭ دارىحانالىق جانە مەديتسينالىق دەنساۋلىق ساقتاۋ مەكەمەلەرىنىڭ مەملەكەتتىك جۇيەسىن دامىتۋعا ەلەۋلى ۇلەس قوسىپ كەلەدى. ءوزىنىڭ كوپ جىلعى ادال ەڭبەگى, جوعارى ىسكەرلىك, ادامي قاسيەتى ءۇشىن ارىپتەستەرى وعان اركەز ۇلكەن قۇرمەتپەن قارايدى. وسى قىزمەتتە ىستەگەن جىلدارى وسى سالادا جۇرگەن ونداعان جاس مامانعا وڭ باعىت سىلتەپ, ءوزىن بىلىكتى تالىمگەر رەتىندە دە كورسەتە ءبىلدى.
ج.جاراسوۆا «Aqniet» دەنساۋلىق ساقتاۋ قىزمەتكەرلەرى باستاۋىش كاسىپوداق ۇيىمىنىڭ مۇشەسى رەتىندە دەپارتامەنتتىڭ قوعامدىق ومىرىنە دە بەلسەنە قاتىسادى. اتاپ ايتقاندا, ءتۇرلى سپورتتىق جانە مادەني-بۇقارالىق ءىس-شارالار ۇيىمداستىرادى. دەپارتامەنت قىزمەتكەرلەرىنىڭ الەۋمەتتىك جانە قۇقىقتىق ساۋاتىن ارتتىرۋعا باعىتتالعان ۇجىمدىق شارتىن ازىرلەۋگە ۇلكەن ۇلەس قوستى. ۇجىمداعى كاسىپوداق مۇشەلەرىنىڭ مۇددەلەرىن قورعاۋدا دا اركەز الدىڭعى قاتاردان تابىلادى.
بەلسەندى ەڭبەگى ەلەۋسىز قالماي, كوميتەت پەن دەپارتامەنتتى بىلاي قويعاندا, سالالىق مينيسترلىك تاراپىنان دا بىرقاتار ماراپاتقا يە بولىپ ءجۇر. ماسەلەن, بىلتىر مەديتسينا قىزمەتكەرلەرى كۇنىنە وراي استانا قالاسىنداعى قازاقستان سالالىق دەنساۋلىق ساقتاۋ قىزمەتكەرلەرى كاسىپوداعى فيليالىنىڭ قۇرمەت گراموتاسىمەن ماراپاتتالدى. ارىپتەسىمىزدىڭ بۇدان باسقا دا كوپتەگەن گراموتاسى مەن العىستارى بار.
مايرا بازىلبەكوۆا,
مەديتسينالىق جانە فارماتسەۆتيكالىق باقىلاۋ كوميتەتىنىڭ استانا قالاسى بويىنشا
دەپارتامەنتىنىڭ زاڭگەرى
استانا