جەتىسۋدى اگرارلى ءوڭىر دەگەنىمىزبەن, تابيعاتى كوركەم ولكە ەكەنىن دە ۇمىتپاعان ابزال. بولاشاقتا ءتۋريزمنىڭ دە ءبىر وشاعى بولارىنا سەنىم مول. سەبەبى جىلدان-جىلعا وسى سالانىڭ باعىتى جاندانىپ كەلەدى. ماسەلەن, بىلتىردان بەرى قولعا الىنعان «شاعان» فەستيۆالى بيىل دا جوعارى دەڭگەيدە ءوتتى. تاۋ ءتۋريزمىن دامىتۋعا باعىتتالعان باستاماعا مىڭعا جۋىق ادام اتسالىسقان. قىزىققا تولى ساياحات شەتەلدىكتەردى دە قىزىقتىرىپ كەلەدى.
مەملەكەت باسشىسى جەتىسۋدىڭ تۋريزم سالاسىنا كۇش سالۋ كەرەكتىگىن ايتقانى ءالى ەسىمىزدە. وسى رەتتە جەتىسۋدىڭ جەتى كەرەمەتىنە اينالىپ كەتكەن عاجايىپ جەرلەرگە تۋريستەردى تارتۋ جوبالارى قولعا الىنىپ جاتىر.
«جالپى, وبلىستا تۋريستىك نىساندار جەتكىلىكتى. سوندىقتان ونىڭ بارىنە ءتيىستى دەڭگەيدە ءمان بەرىپ, دامىتۋ كەرەك. تۋريزم جەتىسۋ وبلىسى ەكونوميكاسىنىڭ باسىم باعىتى بولۋعا ءتيىس. تۋريستەر نەعۇرلىم كوبىرەك كەلسە, وبلىسقا دا وڭ سەپتىگىن تيگىزەدى. وبلىستىڭ تۋريزم سالاسىنداعى الەۋەتى وتە زور», دەگەن ەدى قاسىم-جومارت توقاەۆ. سودان بەرى تابيعات سىيعا بەرگەن تۋريستىك ورىنداردا ينفراقۇرىلىم جۇيەلەرىن جانداندىرۋ جۇمىسى ءجۇرىپ جاتىر. ال «شاعان» فەستيۆالى تاۋ تۋريزمىنە تۋريستەردى عانا ەمەس, جەرگىلىكتى تۇرعىنداردى دا تارتۋعا جول اشادى. بيىل ەكىنشى رەت ۇيىمداستىرىلىپ وتىرعان سپورتتىق-تۋريستىك فەستيۆال جوعارى دەڭگەيدە ءوتتى.
مۇنداعى ماقسات – سالاماتتى ءومىر سالتىن, سپورتپەن تۇراقتى شۇعىلدانۋدى ناسيحاتتاۋ, وڭىردە تاۋ جانە ەكولوگيالىق ءتۋريزمدى دامىتۋ مۇمكىندىكتەرىن كورنەكى تۇردە پاش ەتۋ. ەڭ باستىسى, بىلتىر شاقىرىپ كەلتىرە الماعان ادامدار, بيىل الدىن الا فەستيۆالعا دايىندىق جاساعان. ءتىپتى شەتەلدىك ازاماتتار دا كەلەر جىلى قاتىسۋعا نيەت ءبىلدىرىپ وتىر. ءوڭىر اكىمىنىڭ ءباسپاسوز قىزمەتىنىڭ مالىمەتىنشە, شاعان شىڭىن باعىندىرۋعا كەلگەندەر 13 شاقىرىمعا كوتەرىلىپ, تەڭىز دەڭگەيىنەن 2 551 مەتر بيىككە شىققان. بۇل رەتتە ەڭ جاس قاتىسۋشى 5 جاستا بولسا, ەڭ ۇلكەنى 70 جاستا بولعان.
وسى جىلى «Visit Zhetysu» تۋريستىك-اقپاراتتىق ورتالىعى وبلىستىڭ كاسىپكەرلىك جانە يندۋستريالىق-يننوۆاتسيالىق دامۋ باسقارماسىمەن بىرلەسىپ, كوكسۋ اۋداندىق اكىمدىگىنىڭ قولداۋىمەن «Shagan Fest-2024» فەستيۆالىن بۇرىنعىداي كوكسۋ اۋدانى اقتوبە اۋىلىنىڭ ماڭىندا وتكىزدى. قاتىسۋشىلاردىڭ قادامىنا ساتتىلىك تىلەگەن باسقارما باسشىسى باقىتنۇر باقىت ۇلى بۇل فەستيۆال وڭىردەگى ەكولوگيالىق جانە تاۋ ءتۋريزمىن دامىتۋعا باعىتتالعانىن اتاپ ءوتتى.
بيىككە شىعار الدىندا قاتىسۋشىلار وزدەرىنىڭ حال-احۋالى ءۇشىن جاۋاپكەرشىلىك الاتىنى تۋرالى مىندەتتى قۇجاتتى, مارشرۋت بارىسىنداعى جەكە قاۋىپسىزدىك ەرەجەلەرى مەن مىنەز-ق ۇلىق قاۋىپسىزدىگى تۋرالى نۇسقاۋلىقتى تولتىرىپ, تىركەۋدەن ءوتتى. مۇنان سوڭ فيتنەس-جاتتىقتىرۋشىمەن بىرگە شاعىن جاتتىعۋ جاسادى.
جالپى, مارشرۋتتىڭ ۇزىندىعى شامامەن 13 كم. «Visit Zhetysu» تۋريستىك-اقپاراتتىق ورتالىعىنىڭ باسشىسى جاندوس نۇريەۆ فەستيۆالدىڭ باستى ماقساتى جەتىسۋ وبلىسىندا تاۋ ءتۋريزمىن ناسيحاتتاۋ, مۇمكىندىگىنشە كوپ ادامدى, اسىرەسە جاستاردى سالاماتتى بەلسەندى دەمالىسقا تارتۋ ەكەنىن اتاپ ءوتتى.
««Shagan Fest-2024» فەستيۆالىن وتكىزۋ جاقسى داستۇرگە اينالۋدا. بۇل جولى جاسى, كاسىبى مەن قىزىعۋشىلىعى سان ءتۇرلى 400-دەن استام قاتىسۋشى تالدىقورعان, الماتى, تەكەلى قالالارىنان, سارىوزەك اۋىلىنان كەلىپ وتىر. «Bike Team», «VeloTravelTekeli», «VeloFriends» ۆەلوقوعامدارى, سونداي-اق «جوڭعاريا», «يستوكي» بالالار-جاسوسپىرىمدەر تۋريستىك كلۋبتارى, «اتامەكەن» فيتنەس-ورتالىعىنىڭ جاتتىقتىرۋشىلارى, تالدىقورعان جوعارى پوليتەحنيكالىق كوللەدجى مەن ءى.جانسۇگىروۆ اتىنداعى جەتىسۋ ۋنيۆەرسيتەتىنىڭ ستۋدەنتتەرى بەلسەندىلىك كورسەتتى, ياعني قاتارىمىزدىڭ كوبى جاستار. سونىمەن قاتار بىزدە فەستيۆالعا ەكىنشى جىل قاتارىنان قاتىسىپ وتىرعاندار دا بار, ءتىپتى بۇكىل وتباسىمەن كەلگەندەر دە بار, ءبىز بۇعان قۋانىشتىمىز. وسىلايشا, بىرتە-بىرتە «Shagan Fest» جەتىسۋدىڭ جاياۋ جانە تاۋ ءتۋريزمىنىڭ كورنەكتى شاراسىنا اينالىپ كەلەدى», دەيدى ج.نۇريەۆ.
تاۋ شىڭدارىن باعىندىرۋشىلار ءۇشىن تالدىقورعاننان ترانسفەر ۇيىمداستىرىلدى, سۋ, قورەكتىك باتوندار, ايىرىم بىلەزىكتەرى تاراتىلدى, مارشرۋتتىڭ سوڭىندا تازا اۋادا كەشكى اس بەرىلدى. سونىمەن قاتار تاۋعا كوتەرىلۋ مەن ءتۇسۋ كەزىندە ۇيىمداستىرۋشىلار قاۋىپسىزدىكتى قامتاماسىز ەتىپ قانا قويماي, قاجەت بولعان جاعدايدا كومەك كورسەتۋ ءۇشىن مارشرۋتتا موتوتسيكلدەر مەن ارنايى كولىكتەر دە ءجۇردى. اتاپ وتسەك, تاۋدان تومەن تۇسكەن كەزدە قاتىسۋشىلار جول بويىندا كەزدەسكەن تۇرمىستىق قوقىستاردى, نەگىزىنەن پلاستيكالىق بوتەلكەلەر مەن پوليەتيلەن پاكەتتەردى جينادى. بۇل قوعامداعى ەكومادەنيەتتىڭ نىعايىپ كەلە جاتقانىن كورسەتسە كەرەك.
ۇيىمداستىرۋشىلار بۇل سوڭعى تاۋ فەستيۆالى ەمەس ەكەنىن ايتادى. وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى باقىتنۇر باقىت ۇلىنىڭ ايتۋىنشا, شىلدە ايىنىڭ ەكىنشى جارتىسىندا وڭىردە بالالار مەن جاسوسپىرىمدەر ءتۋريزمىن قولداۋعا ارنالعان 2 ءىرى ءىس-شارا وتكىزۋ جوسپارلانعان.
« ۇلى دالا ەلى» ەكسپەديتسياسىن جانە « ۇلى جوڭعار الاتاۋى» تۋرياداسىن وتكىزەمىز. ءبىرىنشىسى – شاعىن ساياحات, ەكىنشىسى – جارىس. مارشرۋتتار قازىر پىسىقتالۋدا. جەتىسۋ وبلىسىندا تاۋ ءتۋريزمىن دامىتۋدىڭ الەۋەتى زور ەكەنىن ەسكەرە وتىرىپ, وسى باعىتتاعى جۇمىستى جالعاستىرامىز. ءتۋريزمنىڭ بۇل باعىتى اسىرەسە سارقان, ەسكەلدى اۋداندارى مەن تەكەلى قالاسىنا قاتىستى. قورا شاتقالىندا ورتالىق ازياداعى ەڭ بيىك بۇرحانبۇلاق سارقىراماسى – باستى كورىكتى جەرلەرىمىزدىڭ ءبىرى», دەيدى ب.باقىت ۇلى.
ايتا كەتەيىك, اتالعان فەستيۆال كەلەر جىلى دا وسى ۋاقىتتا ۇيىمداستىرىلادى.