جاقىندا اياگوز اۋداندىق اۋرۋحاناسىنا اۋىر جاراقاتتانعان مىڭبۇلاق اۋىلىنىڭ ءبىرىنشى فەرماسىندا تۇراتىن قوس ازامات ءتۇستى. امانحان ءامىروۆ پەن وزات قىرىقباەۆ ەسىمدى مىڭبۇلاقتىق ەكى جىگىت اۋىلعا كىرىپ كەتكەن قاسقىرلارمەن ارپالىسقان ناعىز ەرلەر بولىپ شىقتى.
قاسقىرلار الدىمەن وزاتقا شابۋىل جاساپتى. ول ءوز ءۇيىنىڭ تابالدىرىعىندا تۇرعاندا ەسىك الدىنا كەلىپ قالعان قاسقىر اتىلىپ, بەتىن ج ۇلىپ العان. 50 جاستاعى جىگىت اعاسى ۇيىنە جان-دارمەن كىرىپ ۇلگەرىپ, امان قالعان ەكەن. ال 44 جاستاعى امانحان ءامىروۆ تاڭعا جۋىق اۋىل ىشىنە ءبىر توپ اش قاسقىردىڭ كىرگەنىن جانە ەش سەسكەنبەستەن ەركىن ارالاعانىن ايتادى. امانحان جۇبايى گۇلزيرا دۋلاتوۆانىڭ وتىنىشىمەن تاڭعا جۋىق اۋلاعا شىققان ەكەن. سول كەزدە الىستان قاراڭ-قۇراڭ ەتكەن بىردەڭەنى بايقاپ, ونى العاشقىدا ءۇيدىڭ ماڭايىندا جۇرەتىن كوك تازى ەكەن دەپ ويلايدى.
– قاسقىر ەكەنىن جاقىن كەلگەندە كوردىم. تايىنشاداي ءبورى ايەلىمە قاراي كەلە جاتتى. بىردەن اتىلدىم. قۇشاقتاعان كۇيى دومالادىق. جان ۇشىرعاندا, قاسقىردى تاماعىنان الا ءتۇسىپپىن. ءبورىنىڭ اۋزىنا باسىمدا جۇرگەن فونار ءىلىنىپ, قاتتى پلاستماسسا ماتەريالدان جاسالعان شامدى ىزالانا شايناپ جاتقانىن سەزدىم. قىلعىندىرىپ, الىسىپ ءجۇرىپ جەلكە جاعىنا شىعىپ الدىم. دالانىڭ تاعىسى عوي, كۇشتى ەكەن. ءتىپتى, بوي بەرەر ەمەس. دەمدە قولدارىمدى شايناپ تاستادى. سۇق ساۋساعىم قاسقىردىڭ اۋزىندا كەتتى. تاعى ءبىر اۋناپ, ارقا جاعىنا شىعىپ, قاتتى قىلعىندىرا باستاعان ەدىم, باسىن شىعارىپ العان قاسقىر سان ەتىمدى ج ۇلىپ الدى. ودان كەيىن ەكىنشى قولىم قاسقىردىڭ اۋزىنا ءىلىنىپ كەتتى. بۇيىرىنەن كەرزى ەتىكپەن تەپكىلەپ وتىرىپ, قولىمدى جىرتقىشتىڭ اۋزىنان ارەڭ شىعاردىم. ءبىر ساتتە قولىم قاسقىردىڭ القىمىنا ءىلىندى. جانۇشىرا قيمىلداعاننان با, ەسىمدە دە قالماپتى. ايتەۋىر, جانتالاسىپ ءجۇرىپ, ەكى قولمەن قىلعىندىرا باستادىم. ۇستىنە ءمىنىپ الىپ, بار سالماعىممەن جانشىپ, تۇنشىقتىرۋعا تىرىستىم. ساسقالاقتاعان ايەلىم پىشاق اكەلىپ ۇلگەردى. كەۋدە تۇسىنان ەكى رەت باتىرىپ ەدىم, اش ءبورى ءۇنسىز قالدى, – دەيدى ول.
قاسقىردىڭ قاندى اۋزىنان امان قالعان قوس ازاماتتىڭ قازىرگى جاعدايى قاناعاتتانارلىق. ارلانمەن ارپالىستان كەيىن سانيتارلىق-ەپيدەميولوگيالىق ستانسا قىزمەتكەرلەرى كەلىپ, قاسقىردى وسكەمەنگە تەكسەرۋگە جىبەرگەن ەكەن. ال اۋرۋحانا حيرۋرگى ەرنار سۇلەيمەنوۆتىڭ ايتۋىنشا, امانحاننىڭ ەكى قولىن دا قاسقار شايناپ تاستاعان. ءبىر قولىنىڭ سۇق ساۋساعى جوق. سان ەتىندە ۇلكەن جاراقات بار. سونىمەن بىرگە, دەنەسىنىڭ جوعارى جاق بولىگىنىڭ كوپ جەرى ج ۇلىنعان جانە تىستەلگەن. وزاتتىڭ وڭ جاق بەتىن قاسقىر تۇگەلدەي ج ۇلىپ كەتكەن. ارلانمەن ارپالىسقان اۋىل تۇرعىندارىنا ءبىراز ۋاقىت ەم-دوم قابىلداۋ قاجەت. امانحاننىڭ اعايىنى سەرىك بايعاليەۆ دالا تاعىسىمەن شايقاستا ەرلىك كورسەتكەن جىگىتتەرگە ءالى وپەراتسيا جاسالماعانىن, دارىگەرلەر سەس ماماندارىنىڭ قورىتىندىسىن كۇتىپ وتىرعانىن جەتكىزدى.
دۋمان اناش,
«ەگەمەن قازاقستان».
شىعىس قازاقستان وبلىسى,
اياگوز اۋدانى.