استانادا 21 جاستاعى جىگىت ستۋدەنتتەردىڭ 40-تان استام نوۋتبۋگىن زاڭسىز جولمەن يەمدەنىپ, لومباردقا وتكىزىپ جىبەرگەن, دەپ حابارلايدى Egemen.kz.
انىقتالعانداي, «ۋاقىتشا پايدالانامىن» دەگەن جەلەۋمەن ستۋدەنتتەردەن نوۋتبۋك الۋدى ادەت ەتكەن كۇدىكتى العان نوۋتبۋكتاردى لومباردقا وتكىزىپ وتىرعان. بۇدان تۇسكەن اقشانى ينتەرنەتتەگى ويىندارعا ءباس تىگۋگە سالىپ, ۇتىلىپ قالعان.
قىمبات تەحنيكانىڭ باسىم بولىگى لومباردتاردان تاركىلەنگەن.
قالالىق پوليتسيا مالىمدەمەسىندە: «الاياقتىق فاكتىسى بويىنشا سوتقا دەيىنگى تەرگەۋ امالدارى جۇرگىزىلىپ جاتىر. جاس جىگىت كىناسىن مويىنداپ, قاماۋعا الىندى. پوليتسەيلەر ونىڭ قالا اۋماعىندا جاسالعان باسقا دا الاياقتىق ىستەرگە قاتىسى بار-جوعىن تەكسەرىپ جاتىر», دەلىنگەن.