2014 جىلدىڭ باسىندا مەملەكەت باسشىسى كولىك جۇيەسىنىڭ ينفراقۇرىلىمىن دامىتۋ جانە ينتەگراتسيالاۋدىڭ 2020 جىلعا دەيىنگى باعدارلاماسىن بەكىتكەن بولاتىن. بۇيىرتسا, ول بويىنشا 2020 جىلعا قاراي قازاقستان ورتالىق ازيا وڭىرىندەگى نەگىزگى لوگيستيكالىق وپەراتور بولۋدى كوزدەيدى. ەلباسى 2014 جىلعى حالىققا جولداۋىندا وسى باعدارلامانىڭ مۇلتىكسىز جۇزەگە اسىرىلۋىنا ايرىقشا ءمان بەردى. «نۇرلى جول» جاڭا ەكونوميكالىق ساياسات ءبىزدىڭ ەكونوميكامىزدىڭ تاياۋ جىلدارداعى ءوسىمىنىڭ درايۆەرى بولادى. تەك جول قۇرىلىسى ارقىلى عانا جاڭادان 200 مىڭ جۇمىس ورنى قۇرىلادى. ال بۇل حالىقتىڭ جۇمىسپەن قامتىلۋىن جانە تابىستارىنىڭ ءوسۋىن بىلدىرەدى. «نۇرلى جول» تسەمەنت, مەتالل, تەحنيكا, بيتۋم, جابدىقتار ءوندىرۋ مەن سوعان سايكەس قىزمەتتەر سياقتى ەكونوميكانىڭ باسقا دا سالالارىنا مۋلتيپليكاتيۆتى اسەر ەتەدى», دەدى ەلباسى.
كورسەتىلگەن ۋاقىت ارالىعىندا تەمىرجولداردىڭ اكتيۆتەرى جاڭارىپ, جاڭعىرۋ ۇدەرىستەرىنەن وتەدى. اتاپ ايتقاندا, 2020 جىلعا قاراي 6 مىڭ شاقىرىمعا جۋىق تەمىرجولدى جاڭعىرتۋ, ينفراقۇرىلىمدى دامىتۋ جانە ترانزيتتىك كولىكتىك الەۋەتتى ارتتىرۋ مىندەتى تۇر. بىلتىر 22 تامىزدا جالپى ۇزىندىعى 1250 شاقىرىم بولاتىن جەزقازعان – بەينەۋ جانە ارقالىق – شۇباركول تەمىرجول ۋچاسكەلەرى پايدالانۋعا بەرىلدى. وسى جولداردا 3,5 مىڭ جاڭا جۇمىس ورىندارى اشىلدى. 204 تۇرعىن ءۇي, 2 مەكتەپ جانە 3 بالاباقشا سالىندى. بۇل جول قاراعاندى, قىزىلوردا, اقتوبە, ماڭعىستاۋ جانە قوستاناي وبلىستارىنىڭ الەۋمەتتىك سالالارىن جاقسارتاتىن بولادى. قۋانتارى, بۇل باعىتتاردا 2018 جىلعا قاراي 24 ملن. توننا جۇك تاسىمالدانىپ, 2023 جىلعا قاراي ول كورسەتكىش 30 ملن. تونناعا جەتكىزىلمەك.
ال اۆتوجولدار جونىندە بايانداساق, 2020 جىلعا دەيىن ەلىمىزدە 30 مىڭ شاقىرىمعا تارتا جول جوندەلەدى. بۇل كورسەتكىشتەرگە قول جەتكىزۋ ءۇشىن بىرقاتار ءىرى جوبالار جۇزەگە اسىرىلادى. «باتىس ەۋروپا – باتىس قىتاي» جوباسى اياقتالۋعا جاقىن. ونىڭ جالپى ۇزىندىعى سەگىز مىڭ شاقىرىمنان اسادى. 2800 شاقىرىمى قازاقستان اۋماعى ارقىلى وتەدى. جوبا جۇزەگە اسىرىلا باستاعالى 1727 شاقىرىم جول جوندەلدى. ءسويتىپ, شىمكەنت پەن رەسەي شەكاراسى ارالىعىنداعى ۋچاسكە تولىق پايدالانۋعا بەرىلەدى. مەملەكەت باسشىسى ءوز جولداۋىندا, «قازاقستاندىقتار سالاتىن جاڭا ماگيسترالدار ءبىزدىڭ ەكونوميكامىز بەن قوعامىمىزدى جاڭارتادى. ولار ءبىزدىڭ ەلىمىزدىڭ بارلىق تۇكپىرلەرىن ورتالىقپەن بەرىك بايلانىستىرادى. جۇك تاسىمالى جەدەلدەيدى جانە ۇلعايادى. ەل ارقىلى ترانزيت كولەمى ارتادى. ءبىزدىڭ ازاماتتارىمىز زاماناۋي جانە ساپالى اۆتوماگيسترالدارمەن ءجۇرىپ, كەز كەلگەن وڭىرگە قاۋىپسىز جانە تەز جەتەتىن بولادى», دەدى.
2014 جىلى ورتالىق-وڭتۇستىك, ورتالىق-شىعىس جانە ورتالىق-باتىس دالىزدەرىن سالۋ جۇمىستارى باستالعان-دى. بۇل جولدار استانا ارقىلى وتەتىن بارلىق حالىقارالىق باعىتتاردى جانداندىرۋعا مۇمكىندىك بەرەدى. اتاپ ايتقاندا, 4 مىڭ شاقىرىمعا جۋىق رەسپۋبليكالىق ماڭىزداعى جول قالپىنا كەلتىرىلىپ, سالىنادى. مامانداردىڭ ءتاپتىشتەۋىنە قاراعاندا, بۇل جوبالار 2020 جىلعا قاراي اۆتوكولىك تاسىمالىن 1,5 ەسەگە ارتتىرادى. وسى ورىندا اقىلى جولدار تۋرالى دا ايتىپ وتكەن ءجون. ونىڭ پايداسى مەن تيىمدىلىگىن بيلىك تە, حالىق تا استانا – بۋراباي اقىلى جولىنان كورىپ وتىر. ەندىگى دە استانا – تەمىرتاۋ, استانا – پاۆلودار, الماتى – قاپشاعاي جولدارى اقىلى بولادى. جالپى, الداعى ۋاقىتتا رەسپۋبليكالىق جولداردىڭ 30 پايىزىندا اقىلى جۇيە ەنگىزىلەتىن بولادى.
سوڭعى جىلدارى ەلىمىزدە اۋە قاتىناسىنا دا كوپ كوڭىل بولىنە باستادى. ماسەلەن, بۇگىندە اۋە كەمەلەرىنىڭ پاركىن جاڭارتۋ ماڭىزدى ماسەلەلەردىڭ بىرىنە اينالدى. ناتيجەسىندە, بيىل جىل باسىنان بەرى اۋە كومپانيالارى 8 قازىرگى زامانعى ۇشاق ساتىپ الدى. 2020 جىلعا دەيىن باتىستا جاسالعان 61 اۋە كەمەسىن الۋ جوسپارلانىپ وتىر. ءسويتىپ, 2020 جىلعا دەيىن تاعىدا جاڭا 75 حالىقارالىق اۋە قاتىناسىن اشۋ جوسپاردا بار.
نۇرباي ەلمۇراتوۆ,
«ەگەمەن قازاقستان».