ۇكىمەت باسشىسىنىڭ ورىنباسارى تامارا دۇيسەنوۆا دەپۋتاتتارعا بەرگەن جاۋابىندا قوعامدىق ماڭىزى بار ادەبيەتتەردى باسىپ شىعارۋ جونىندەگى قاعيدالارعا وزگەرىس ەنگىزىلەتىنىن ايتتى, دەپ حابارلايدى Egemen.kz.
دەپۋتات ايدوس سارىمنىڭ كىتاپ وقۋ ءۇردىسىن دامىتۋ جونىندە ساۋالىندا وتاندىق كىتاپ باسىپ شىعارۋ ءىسىن سۋبسيديالاۋ فورماتىن وزگەرتۋدى ۇسىنعان ەدى. دەپۋتاتقا بەرگەن جاۋابىندا تامارا دۇيسەنوۆا كىتاپ ىسىندە قوعامدىق ماڭىزى بار ادەبيەتتى ساتىپ الۋ, باسىپ شىعارۋ جانە تاراتۋ قىزمەتىن مادەنيەت جانە اقپارات مينيسترلىگى ىسكە اسىراتىنىن جەتكىزەدى. ونىڭ اياسىندا «مەملەكەتتىك كىتاپحانالارعا جانە وزگە دە مەملەكەتتىك ۇيىمدارعا تاراتۋ ءۇشىن قوعامدىق ماڭىزى بار ادەبيەتكە م ۇلىكتىك قۇقىقتاردى بەلگىلى ءبىر مەرزىمگە ساتىپ الۋ جانە (نەمەسە) ونى باسىپ شىعارۋ جونىندەگى قاعيدالارىن» باسشىلىققا الادى.
– قازىرگى تاڭدا اتالعان قاعيدالارعا تولىقتىرۋلار مەن وزگەرىستەر ەنگىزۋ جۇمىستارىن جۇرگىزىپ جاتىر. جاڭا قاعيدا بەكىتىلگەننەن كەيىن قالامگەرلەر قالاماقى, قايتا باسىپ شىعارۋ باعىتتارىنان بولەك جاڭا تۋىندىسىن كىتاپ رەتىندە باسىپ شىعارىپ, كىتاپ دۇكەندەرىنە ساتىلىمعا قويۋعا گرانت الاتىن بولادى. اۆتورلىق قۇقىعى اۆتوردىڭ وزىندە قالادى. بۇل قالامگەرلەر مەن باسپاگەرلەرگە ەلەۋلى قولداۋ بولماق, – دەيدى دۇيسەنوۆا.
ساۋالدا سالىق رەفورماسى اياسىندا كىتاپ پەن گازەت شىعارۋشىلاردى 10 جىل مەرزىمگە سالىقتان بوساتۋ ۇسىنىلعان. ۇكىمەت 2022 جىلى اۆتورلاردى, باسپا جانە كىتاپ ساتۋ مەكەمەلەرىن قولداۋ ماقساتىمەن كىتاپ شىعارعاندا جانە ساتقاندا سالىناتىن قوسىمشا قۇن سالىعىنا (12%) جەڭىلدىكتەر ەنگىزۋ ماسەلەسى قارالعانىن حابارلايدى. الايدا بۇل باستاما قارجى جانە ۇلتتىق ەكونوميكا مينيسترلىكتەرى تاراپىنان قولداۋ تاپپاعان.