تاياۋدا تۇركيا سىرتقى ىستەر مينيسترلىگىنىڭ ۇيىمداستىرۋىمەن وكىلەتتى ەلشىلەردىڭ 7-ءشى كونفەرەنتسياسىنا قاتىسقان يۋنەسكو-نىڭ باس ديرەكتورى يرينا بوكوۆا تۇركياعا العاشقى رەسمي ساپارىنىڭ اياسىندا حالىقارالىق تۇركسوي ۇيىمىنىڭ شتاب-پاتەرىندە بولدى.
يرينا بوكوۆا تۇركسوي ۇيىمىمەن 20 جىلدان استام ۋاقىت ىشىندە كوپتەگەن ءىس-شارالار بىرلەسە اتقارىلعاندىعىن اتاي كەلە, «حالىقارالىق تۇركسوي ۇيىمى مەن يۋنەسكو مادەنيەت جانە ونەر سالالارىندا ءبىر باعىتتا قىزمەت اتقارىپ كەلەدى. ويتكەنى, مادەنيەت – ادام تابيعاتىنداعى ەڭ ۇلكەن بايلىق.
الەمدەگى بيولوگيالىق ارتۇرلىلىكتىڭ ورنى قانداي بولسا, ادامزات ىشىندەگى ارالۋاندىق تا سونداي. مادەني مۇرا مەن مادەني قۇندىلىقتاردىڭ ارالۋاندىعى الەمدىك بەيبىتشىلىكتىڭ ورنىعۋىنا سۇبەلى ۇلەس قوساتىنى ءسوزسىز. الەمدە زورلىق-زومبىلىق بەلەڭ العان قازىرگى كەزەڭدە ينتەللەكتۋالدى جانە جوعارى دەڭگەيدەگى ىقپالداستىقتىڭ, تولەرانتتىلىق پەن ۇنقاتىسۋدىڭ قاجەتتىلىگى ارتا تۇسۋدە. تۇركسوي ۇيىمىنىڭ جاساعان جۇمىستارىنا ۇنەمى كوڭىل ءبولىپ وتىرامىز. تاتارستاندا وتكەن شارالار, قىرعىزستاندا ماناس رۋحىن اسقاقتاتقان يگى جۇمىستار نازارىمىزدان تىس قالعان جوق. تۇركى الەمى – مادەني مۇراعا باي دۇنيە. وسى تۇستا تۇركى الەمىندەگى جەتىستىكتەر قازاقستان مەملەكەتىنىڭ باستاماسىمەن يۋنەسكو-نىڭ شتاب-پاتەرىندە بۇۇ-نىڭ باس اسسامبلەياسى جاريالاعان حالىقارالىق مادەنيەتتەر جاقىنداسۋىنىڭ ونجىلدىعى رۋحىمەن استاسىپ جاتقاندىعىن ايرىقشا ايتۋىمىز كەرەك. الداعى جىلى يۋنەسكو مەن تۇركسوي اراسىنداعى ىنتىماقتاستىققا 20 جىل تولادى. سوندىقتان يۋنەسكو جالعىز ەمەس, ونىڭ تۇركسوي سىندى قولداۋشىسى بار», – دەدى.
تۇركسوي-دىڭ باس حاتشىسى دۇيسەن قاسەيىنوۆ 1996 جىلدان بەرى يۋنەسكو-نىڭ قولداۋىمەن كوپتەگەن ءىس-شارالاردىڭ جوعارى دەڭگەيدە وتكەندىگىن ءسوز ەتتى. «بۇگىنگى تۇركسوي شتاب-پاتەرىندەگى كەزدەسۋدىڭ تاريحي وقيعا ەكەنى ءسوزسىز. تۇركسوي بۇۇ-نىڭ باس اسسامبلەياسى جاريالاعان حالىقارالىق مادەنيەتتەر جاقىنداسۋىنىڭ ونجىلدىعى جوباسىن قولداپ وتىرادى. وسى تۇرعىدان كەلگەندە, يۋنەسكو-نىڭ 70 جىلدىق مەرەيتويى قارساڭىندا تۇركى دۇنيەسىندە جانە بۇكىل الەمدە بەيبىت ءومىر ءسۇرۋ مادەنيەتىنىڭ كۇشەيۋىنە ۇلەس قوسۋدى جالعاستىرامىز. بۇل ىنتىماقتاستىق تۇركىتىلدەس حالىقتاردىڭ مادەني مۇراسىنىڭ ساقتالۋى ءۇشىن عانا ەمەس, ادامزاتتىق جانە عالامدىق مادەنيەتىنىڭ دامۋىنا سۇبەلى ۇلەس قوسادى. سونىمەن قاتار, سوڭعى كەزەڭدە يۋنەسكو-نىڭ شتاب-پاتەرىندە ناۋرىز مەرەكەلىك كونتسەرتى, تۇركسوي-دىڭ 20 جىلدىق مەرەيتويى, «بالالار بەيبىتشىلىك ءۇشىن» اتتى سۋرەت كورمەسى سىندى ايتۋلى شارالار ۇيىمداستىردىق. يۋنەسكو-نىڭ باس ديرەكتورى تۇركى دۇنيەسىندە وتكەن بىرقاتار شارالارىمىزعا ءوزى قاتىسىپ قولداۋ كورسەتتى. بۇدان كەيىن دە بىرلەسە اتقاراتىن شارالارىمىز از ەمەس. بيىلعى جىلدىڭ ناۋرىز ايىندا, ياعني يۋنەسكو-نىڭ 70 جىلدىعى قارساڭىندا ناۋرىز مەرەكەلىك كونتسەرتىن, ءساۋىر ايىندا قورقىت اتا تاقىرىبىنا ارنالعان سيمپوزيۋم مەن ءداستۇرلى-فولكلورلىق كونتسەرت ۇيىمداستىرامىز», – دەدى دۇيسەن قاسەيىنوۆ.
ايناش ەسالي,
«ەگەمەن قازاقستان».