*قازاقستاندىق سالىمشىلاردىڭ تازا ينۆەستيتسيالىق كىرىسى وتكەن جىلدىڭ 11 ايىندا 188,7 ملرد. تەڭگەنى قۇرادى. ۇلتتىق بانكتىڭ سوڭعى دەرەگىنە كوز جۇگىرتسەك, 2014 جىلدىڭ 1 جەلتوقسانىنداعى جاعداي بويىنشا, زەينەتاقى جيناقتارى 4,4 ترلن. تەڭگەدەن اسقان. ال ونىڭ ءوسىمى – 700 ملرد. تەڭگە.
*ەلىمىزدىڭ وڭىرلەرىندە 40 مەديتسينالىق-قۇتقارۋ پۋنكتى قىزمەت كورسەتىپ كەلەدى. ءتوتەنشە جاعدايلار كوميتەتى حابارلاعانداي, «سالاماتتى قازاقستان» باعدارلاماسى اياسىندا قۇرىلعان بۇل جول بويى پۋنكتتەرى بۇگىنگە دەيىن 7 مىڭنان استام ادامعا دەر كەزىندە كومەك كورسەتكەن.
*الماتى وبلىسىندا ساباننان وتىن كەسپەكتەرىن دايىندايتىن زاۋىت اشىلدى. كوكسۋ اۋىلىنداعى بۇل شاعىن كاسىپورىندى ىسكە قوسقان كاسىپكەر سەرىك ابىحانوۆتىڭ ايتۋىنشا, ونىڭ قۋاتتىلىعى تاۋلىگىنە 20 توننا بيووتىن شىعارۋعا جەتەدى. زاۋىتقا 70 ملن. تەڭگەگە ساتىپ الىنعان جابدىقتار بالتىق بويى ەلدەرىنەن اكەلىنىپتى. قازىردىڭ وزىندە اۋداننىڭ 12 مەكتەبى وسى بيووتىندى قولدانا باستاعان.
*استانادا 95 مىڭنان استام ادامعا الەۋمەتتىك قولداۋ كورسەتىلدى. قالالىق جۇمىسپەن قامتۋ جانە الەۋمەتتىك باعدارلامالار باسقارماسى ءمالىم ەتكەندەي, مۇقتاج ازاماتتاردىڭ جەكەلەگەن ساناتتارىنا تەگىن قىزمەتتەر تۇرىندە جانە 2 222,1 ملن. تەڭگە كولەمىندە الەۋمەتتىك كومەكتەر بەرىلگەن.
*شىمكەنتتە «ينتەللەكتۋالدى قيىلىس» جۇيەسى قۇرىلادى. وڭتۇستىك قازاقستان وبلىستىق ءىىد اكىمشىلىك پوليتسيا باسقارماسى باسشىسىنىڭ ورىنباسارى الماس تاستانبەكوۆ اتاپ كورسەتكەندەي, بۇل جۇيە جول ەرەجەسىن بۇزعاندارمەن قاتار, كولىك ۇرلاعانداردى دا جىلدام انىقتاۋعا مۇمكىندىك بەرەدى.
*قىزىلوردا وڭىرىندە بىلتىر 286,3 مىڭ شارشى مەتر تۇرعىن ءۇي پايدالانۋعا بەرىلگەن. وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ساۋلە ق ۇلىمبەتوۆانىڭ سوزىنە قاراعاندا, ايماقتا جۇمىسسىزدىق دەڭگەيى 5,0 پايىزدى قۇراپ, 2013 جىلدىڭ سايكەس كەزەڭىمەن سالىستىرعاندا 0,2 پايىزعا ازايعان. ال نەگىزگى كاپيتالعا سالىنعان ينۆەستيتسيالار كولەمى 253,3 ملرد. تەڭگەگە جەتىپ وتىر.
*قوستانايلىق اۋىل شارۋاشىلىعى تاۋارىن ءوندىرۋشىلەر 2014 جىلى 107 ملرد. تەڭگەنىڭ ءونىمىن شىعاردى. وبلىس اكىمىنىڭ ورىنباسارى بازىل جاقىپوۆ وڭىردە شۇجىق, كۇنباعىس مايىن جانە ەت, ءسۇت ونىمدەرىن ءوندىرۋ ىسىندە ىلگەرىلەۋشىلىك بايقالعانىن, سونداي-اق, اگروونەركاسىپتىك كەشەندە 33 جاڭا ينۆەستيتسيالىق جوبانىڭ ىسكە قوسىلعانىن جەتكىزدى.
*سولتۇستىك قازاقستاندا دەنەشىنىقتىرۋ-ساۋىقتىرۋ كەشەنى قاتارعا قوسىلدى. ع.مۇسىرەپوۆ اتىنداعى اۋداننىڭ ورتالىعى – نوۆويشيم اۋىلىندا بوي كوتەرگەن نىساندى سالۋعا 260 ملن. تەڭگە جۇمسالعان. اۋدان اكىمى ۆلاديمير دۋدوۆ كەشەننىڭ اشىلۋ راسىمىندە وندا باسكەتبول, ۆولەيبول, كۇرەس, بوكس, جەڭىل اتلەتيكا سەكتسيالارى, ترەناجەر زالى جۇمىس ىستەيتىنىن مالىمدەدى.
*باتىس قازاقستاننىڭ زەلەنىي اۋىلىنا گاز جەتكىزىلدى. گاز قۇبىرىنىڭ اتالعان اۋىلعا دەيىنگى جالپى ۇزىندىعى – 5 شاقىرىم. جوبانى جۇزەگە اسىرۋعا بيۋدجەتتەن 18 ملن. تەڭگە بولىنگەن. ايتا كەتەيىك, قازىرگى تاڭدا وبلىستىڭ ەلدى مەكەندەرىن گازداندىرۋعا بارلىعى 3 ملرد. تەڭگەگە جۋىق قارجى جۇمسالىپتى.
حابارلار ۇكىمەت, وبلىستىق اكىمدىكتەر سايتتارى مەن «قازاقپارات» اگەنتتىگىنىڭ دەرەكتەرى بويىنشا دايىندالدى.