كوكشەتاۋدا اقمولا وبلىسىنىڭ «تۋعان جەر» وتان داڭقى قوعامدىق مۋزەيلەرى بايقاۋىنىڭ جەڭىمپازدارىن سالتاناتتى ماراپاتتاۋ شاراسى ءوتتى.
شارا ەلدىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى الەۋمەتتىك-ەكونوميكالىق دامۋ ستراتەگياسى مەن «ماڭگىلىك ەل» ۇلتتىق يدەياسى نەگىزىندە وتان جاستارىن پاتريوتتىق رۋحتا تاربيەلەۋ ماقساتىندا ۇيىمداستىرىلعان.
بايقاۋعا 200-دەن استام قوعامدىق مۋزەي مەن مۋزەي تيپتەس قۇرىلىمدار, مادەنيەت ۇيىمدارى, ءبىلىم بەرۋ, سپورت جۇيەلەرى, بالالار, جاستار, ارداگەرلەردىڭ قوعامدىق قۇرىلىمدارى, ۇلتتىق مادەنيەت ورتالىقتارى قاتىستى.
بايقاۋ ەكى كەزەڭمەن ءارى تارتىستى وتكەنىن ايتۋ كەرەك. ونىڭ جەڭىمپازدارى رەتىندە ءتۇرلى اتالىمدار بويىنشا توپ جارعان اقمولا وبلىسىنىڭ 24 قوعامدىق مۋزەيى ىرىكتەپ الىندى. بايقاۋدىڭ بارلىق قاتىسۋشىلارى ءتۇرلى ديپلومدارمەن, ارنايى توسبەلگىلەرمەن, قۇندى سىيلىقتارمەن, العىس حات جانە ماقتاۋ قاعازدارىمەن, سەرتيفيكاتتارمەن ماراپاتتالدى.
«ەگەمەن-اقپارات».