وتكەن جىلدىڭ سوڭىندا ەل گازەتى «ەگەمەن قازاقستاننىڭ» 95 جاستىڭ تورىنە كوتەرىلگەن تويى اتالعانىنان وقىرمان قاۋىم حاباردار. مەرەيتوي قارساڭىندا باسىلىمنىڭ ءبىر توپ قىزمەتكەرلەرى مەن ارداگەرلەرىنىڭ ەڭبەگى مەملەكەتتىك ناگرادالارمەن ماراپاتتالعان بولاتىن. جاڭا جىلدىڭ العاشقى جۇمىس كۇندەرىندە تاعى ءبىر جاقسى جاڭالىقتىڭ حابارى جەتتى: «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ پرەزيدەنتى ساۋىتبەك ابدراحمانوۆ تاۋەلسىز مەملەكەتتەر دوستاستىعى پارلامەنتارالىق اسسامبلەياسى كەڭەسىنىڭ شەشىمىمەن «ءباسپاسوز بەن اقپاراتتى دامىتۋعا سىڭىرگەن ەڭبەگى ءۇشىن» («زا زاسلۋگي ۆ رازۆيتي پەچاتي ي ينفورماتسي») بەلگىسىمەن ماراپاتتالدى. پارلامەنتارالىق اسسامبلەيانىڭ ءتورايىمى – رەسەي فەدەراتسياسى فەدەرالدىق جينالىسىنىڭ فەدەراتسيا كەڭەسىنىڭ ءتورايىمى ۆالەنتينا ماتۆيەنكو قول قويعان №10 كۋالىك پەن بەلگى س.ابدراحمانوۆقا كەشە قازاقستان رەسپۋبليكاسى پارلامەنتىنىڭ سەناتىندا تابىس ەتىلدى. ناگرادانى تاپسىرعان سەنات توراعاسى قاسىم-جومارت توقاەۆ وسى ماراپاتتى يەلەنگەن تۇڭعىش قازاقستاندىق جۋرناليست بولىپ تابىلاتىن س.ابدراحمانوۆتى ەڭبەگىنىڭ حالىقارالىق دەڭگەيدە بيىك باعالانۋىمەن قۇتتىقتاپ, بەلگىلى ءپۋبليتسيستىڭ جاريالانىمدارى تاۋەلسىز مەملەكەتتەر دوستاستىعى ەلدەرىنىڭ اراسىنداعى ىنتىماقتاستىقتى نىعايتۋعا سەپتەسەتىنىن اتاپ ءوتتى.
پارلامەنتارالىق اسسامبلەيا تمد-عا مۇشە مەملەكەتتەردىڭ پارلامەنتتىك دەلەگاتسيالارىنان قۇرالادى. ونىڭ قىزمەتىن تمد پارلامەنتارالىق اسسامبلەياسىنىڭ كەڭەسى ۇيىمداستىرىپ, ۇيلەستىرىپ وتىرادى. پاا-نىڭ باستى مىندەتى – تمد ەلدەرىنىڭ زاڭنامالارىن قالىپتاستىرۋ جانە جاقىنداستىرۋ. قىزمەتى بارلىق مەملەكەتتەردىڭ قۇقىقتارىن قۇرمەتتەۋگە قۇرىلعان, بۇگىندە بەدەلدى حالىقارالىق قۇرىلىمعا اينالعان تمد پارلامەنتارالىق اسسامبلەياسىنىڭ سان-سالالى جۇمىسى س.ابدراحمانوۆ باسشىلىق ەتەتىن «ەگەمەن قازاقستان» گازەتىنىڭ بەتتەرىندە دە, ءجۋرناليستىڭ ءوز ماقالالارى مەن رەپورتاجدارىندا دا ءتيىستى دەڭگەيدە كورسەتىلىپ كەلەدى. ولاردىڭ كوبى قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆتىڭ العىسوزىمەن جارىق كورگەن «قاشاعان قۇرىقتاعان قازاقستان» جيناعىندا توپتاستىرىلعان بولاتىن.
«ەگەمەن-اقپارات».
سۋرەتتى تۇسىرگەن
امانقۇل دۇيسەنباەۆ.