ماڭگىلىك ەل بولۋعا قاجەتتى العىشارتتاردىڭ ءبىرى – ادەبيەتىمىز بەن ونەرىمىزدىڭ ومىرشەڭدىگى, قانشا ۋاقىت وتسە دە ءوزىنىڭ و باستاعى تۇما بۇلاعى مەن ۇلتتىق قاينارىنان ايىرىلماۋى دەسەك, قاتەلەسە قويمايتىن شىعارمىز. ەگەر قىسقاشا قايىرساق, ولمەيتىن, وشپەيتىن ماڭگىلىك جىر ماڭگىلىك ەل بولۋدىڭ دا ءبىر تۇتقاسى ەكەنى تالاس تۋعىزبايدى. ويتكەنى, حالقىمىزدىڭ قادىر-قاسيەتى مەن ءبىتىم-بولمىسى جانە ءتۋابىتتى جاراتىلىسىن جەرىنە جەتكىزە جازىلعان جىرلاردىڭ عۇمىرى ۇزاق.
مىنە, وسىنداي ولشەمگە سايكەس كەلە الاتىنداي اقىندارىمىزدان كىم بار دەپ ساۋال سالار بولساق, بارشا قازاق جۇرتشىلىعىنىڭ نازارىنا ەڭ الدىمەن قادىر مىرزا ءالىنىڭ ەسىمى ورالادى. گازەتىمىزدە بۇعان دەيىن حابارلانعانىنداي, جازعان ولەڭدەرى مەن تۋىندىلارى تۇتاستاي حالقىمىزدىڭ ءومىرىمەن ۇندەسىپ كەتكەن, سونىمەن بىرگە, ايتقان سوزدەرى مەن كەسەك-كەسەك پوەتيكالىق ورامدارى تۇتاستاي ەل سوزىنە, قازاقتىڭ سوزىنە اينالىپ ۇلگەرگەن پوەزيا الىبى قادىردىڭ تۋعانىنا 80 جىل تولىپ وتىر. وسىعان وراي اقىننىڭ تۋعان جەرى اقجايىقتا اسا تالانتتى پەرزەنتىنىڭ رۋحىنا تاعزىم ەتۋگە, ونىڭ ەسىمىن قاستەر تۇتۋعا ارنالعان شىرايلى شارالار شوعىرى باستالىپ تا كەتتى. بۇعان ءبىرىنشى كەزەكتە باتىس قازاقستان وبلىستىق مادەنيەت, مۇراعاتتار جانە قۇجاتتاما باسقارماسى باستاماشى بولا بىلگەنىن دە ايتا كەتكەننىڭ ارتىقشىلىعى جوق. بۇل جونىندە بىزگە اتالعان باسقارما باسشىسى داۋلەتكەرەي قۇسايىنوۆ بىلاي دەدى:
– قادەكەڭنىڭ تۋعان كۇنى – 5 قاڭتاردا ءوڭىردىڭ بارلىق 402 كىتاپحاناسىندا ءدال ءبىر مەزگىلدە اقىن تۋىندىلارىنا ارنالعان فەنومەن دەرلىكتەي اكتسيا وتكىزىلدى. وسى ءۇردىس جىل بويى قادىر وقۋلارى رەتىندە جالعاساتىن بولادى. بيىل وبلىس ورتالىعىندا تۋعان حالقىنىڭ مىنەزىمەن تۇتاسىپ كەتكەن قادىر مىرزا ءالى اتىنداعى مادەنيەت جانە ونەر ورتالىعىنىڭ تۇساۋى كەسىلەدى. بۇگىندە رەسپۋبليكادا بالاماسى جوق ورتالىقتىڭ قۇرىلىسى اياقتالىپ كەلەدى. قازىرگى كۇنى ونى قابىلداپ الۋعا ازىرلىك جۇمىستارى جۇرگىزىلۋدە. قادەكەڭنىڭ باي كىتاپحاناسى مەن كوزى تىرىسىندە تۇتىنعان بۇيىمدارى دا وسى جەردەن ورىن الماق.
اقىن رۋحىن اسقاقتاتۋعا ارنالعان ەكىنشى ءبىر ءماندى دە ماعىنالى شارا وبلىستىق تاريحي ولكەتانۋ مۇراجايىندا مارەگە جەتتى. قادىر مىرزا ءالىنىڭ ءومىرى مەن شىعارماشىلىعىنا ارنالعان كورمە مەن ەسكە الۋ كەشىن تاماشالاۋعا تۇرعىندار كوپ جينالدى. ولاردىڭ ىقىلاسىن تۋعىزعان بۇل باسقوسۋدىڭ باستى ءبىر ەرەكشەلىگى – وعان قادىر اقىننىڭ ۇستازى, جاسى توقسانعا تاياپ قالسا دا كارىلىككە بوي الدىرا قويماعان, ەستە ساقتاۋ قابىلەتىن جوعالتپاعان, ويىن دا, بويىن دا تازا ۇستاپ كەلگەن زەردەلى جان اسىل اياپقاليقىزىنىڭ ءوزىنىڭ تالانتتى شاكىرتى جونىندە توگىلدىرە تولعانعانى بولدى.
اسىل اپامىز قادەكەڭە مەكتەپتە وقىپ جۇرگەن كەزىندە حيميا جانە فيزيكا پاندەرىنەن, بۇعان قوسا ماتەماتيكادان ساباق بەرىپتى. راس, فيزيكا مەن ليريكانىڭ اراسى قاشىقتاۋ. شاكىرتىنىڭ بۇل پاندەرگە دەگەن قۇلشىنىسى مەن ىقىلاسى قانداي بولعانىن اشىپ ايتا قويماسا دا ول كىسى كەيىننەن قازاقتىڭ تانىمال اقىنىنا اينالا بىلگەن شاكىرتىنىڭ بويىنداعى ماقساتكەرلىك پەن وي-جىگەر تۇتاستىعى تۇرعىسىنداعى تاماشا قاسيەتتەر ونىڭ ءجاسوسپىرىم كەزىنەن ايقىن بوي كورسەتكەنىن ايتىپ بەردى.
ءيا, كوزى تىرىسىندە كەمەلدىكتەن اسىپ كەمەڭگەرلىككە جەتە بىلگەن ۇلى سۋرەتكەرگە جىل بويى قۇرمەت كورسەتىلە بەرەدى.
تەمىر قۇسايىن,
«ەگەمەن قازاقستان».
ورال.
سۋرەتتەردە: قادىر مىرزا ءالى اتىنداعى مادەنيەت جانە ونەر ورتالىعىنىڭ قۇرىلىسى اياقتالىپ كەلەدى; قوردان الىنعان سۋرەتتەر كورمەسى.
سۋرەتتەردى تۇسىرگەن رافحات حالەلوۆ