قازاقستان رەسپۋبليكاسىنىڭ پرەزيدەنتى ن.ءا.نازارباەۆ پراۆوسلاۆيەلىك حريستياندار مەن بارشا قازاقستاندىقتاردى روجدەستۆو مەرەكەسىمەن قۇتتىقتادى, دەپ حابارلادى پرەزيدەنتتىڭ ءباسپاسوز قىزمەتى.
قىمباتتى وتانداستار! پراۆوسلاۆيە حريستياندارىن جانە كۇللى قازاقستاندىقتاردى جارقىن دا ىزگى مەرەكە – روجدەستۆو مەيرامىمەن قۇتتىقتايمىن! ەكى مىڭ جىل بويى روجدەستۆو مەرەكەسى ءدىندارلاردىڭ جۇرەگىنە قۋانىش پەن ءۇمىت ۇيالاتىپ, قايىرىمدىلىق پەن ءادىلدىككە, مەيىرىمدىلىك پەن كەشىرىمدىلىككە سەنۋدىڭ نىشانى بولىپ كەلەدى. بۇل – ىزگى نيەتتەر مەن قايىرىمدى ىستەردىڭ, كومەككە مۇقتاج ادامدارعا قامقورلىقتىڭ ۋاقىتى.
وسىلاي دەي كەلىپ, ەلباسى ءبىزدىڭ زامانىمىزدا پراۆوسلاۆيەلىكتەر قاۋىمى ءوزدەرىنىڭ عيبادات ەتۋ ءداستۇرىن جالعاستىرىپ كەلە جاتقانىن اتاپ كورسەتەدى. ول ادامداردىڭ ءدىني سەنىمىنە, رۋحانيات قاينارىنان سۋسىنداۋىنا كومەكتەسىپ, مورالدىق ۇستانىمدارى مەن ءداستۇرلى وتباسىلىق قۇندىلىقتارىن نىعايتۋدا, دەيدى پرەزيدەنت ءوزىنىڭ قۇتتىقتاۋىندا. پراۆوسلاۆيە حريستياندارى ەلىمىزدەگى كونفەسسياارالىق كەلىسىمدى, قوعامدىق تۇراقتىلىق پەن تاتۋلىقتى ساقتاۋعا سۇبەلى ۇلەس قوسىپ كەلەدى.
ەلباسى قۇتتىقتاۋىنىڭ سوڭىندا قازاقستاندىقتاردىڭ ءدىني نانىمدارى مەن ەتنوستىق شىعۋ تەكتەرىنە قاراماستان, قۋانىشتارىن ءبىر-بىرىمەن ءبولىسەتىنىنە توقتالىپ وتەدى. وسى جارقىن مەرەكەدە بارشا ءدىندارلارعا دەنساۋلىق, رۋحاني كۇش, يگى باستامالارىنا ساتتىلىك تىلەيدى. شاڭىراقتارىڭىزدان شاتتىق, تاتۋلىق پەن مولشىلىق كەتپەسىن, دەپ اياقتايدى قازاقستان رەسپۋبليكاسىنىڭ پرەزيدەنتى ءوزىنىڭ قۇتتىقتاۋىن.