شاراينا
الەمدىك ساۋدا الاڭدارىندا مۇنايدىڭ باعاسى تاعى دا ايتارلىقتاي قۇلادى. لوندون بيرجاسىنداعى ساۋدا قورىتىندىلارى بويىنشا Brent ماركالى مۇناي قۇنى 4,71 پايىزعا تومەندەپ, 1 باررەلى ءۇشىن 53,14 دوللار عانا بولدى.
نيۋ-يورك تاۋار بيرجاسىنداعى WTI مۇناي قۇنى دا 5 پايىزعا جۋىق قۇلدىرادى. ءسويتىپ, ونىڭ باررەلىنىڭ قۇنى بار-جوعى 50,14 دوللار عانا بولدى. ساراپشىلاردىڭ اتاپ وتۋىنشە, ەۋروپا مەن اقش-تا مۇنايعا وسىنداي تومەن باعا سوڭعى 5 جىلدان استام ۋاقىتتا بايقالماعان. يراننىڭ مۇناي ءمينيسترى بيدجان نامدار زانگانەنىڭ بولجامىنشا, جاقىن ايلاردا 1 باررەل مۇنايدىڭ قۇنى شامامەن 70-90 دوللار ارالىعىندا تەربەلىپ تۇراتىن بولادى.
جانكەشتى ناتو كونۆويىن شابۋىلدادى
لاڭكەس-جانكەشتى اۋعانستاننىڭ شىعىسىنداعى نانگارحار پروۆينتسياسىندا ناتو كونۆويىنا شابۋىل جاسادى. وقيعا جالالاباد جانە توركحام قالالارىنىڭ اراسىندا ورىن العان.
جانكەشتى سولتۇستىك اتلانتيكا اليانسىنىڭ اسكەري كولونناسى ءوتىپ بارا جاتقان جول بويىندا ءوزىن ءوزى جارىپ جىبەرگەن. شابۋىل سالدارىنان بروندى تەحنيكاعا ايتارلىقتاي نۇقسان كەلسە, ىقتيمال قۇرباندىقتار تۋرالى ەشتەڭە ايتىلمايدى. شابۋىلعا جاۋاپكەرشىلىكتى «تاليبان» قوزعالىسىنىڭ باسشىلىعى ءوز مويىندارىنا الىپ ۇلگەردى. بۇعان دەيىن جانكەشتى ەۋرووداقتىڭ پوليتسيا ميسسياسىنىڭ ماشيناسىن شابۋىلداسا, لاڭكەستىك سالدارىنان كەم دەگەندە ءبىر ادام قازا تاۋىپ, بەسەۋى جارالانعان بولاتىن.
ەۋرووداققا تاپسىرىسىن كەرى قايتارادى
يسلانديا بيلىگى جاقىن ۋاقىتتا ەۋرووداققا وتۋدەن باس تارتۋدى جوسپارلاپ وتىر. بۇل تۋرالى ەلدىڭ پرەمەر-ءمينيسترى سيگمۋندۋر داۆيد گۋننلاۋگسسون مالىمدەدى. ونىڭ سوزىنە قاراعاندا, 2009 جىلى رەسمي بەرىلگەن تاپسىرىس وسى جىلدىڭ باسىندا كەرى قايتارىپ الىناتىن بولادى.
يسلانديا ەۋرووداققا كىرۋ تۋرالى تاپسىرىستى اسا اۋىر ەكونوميكالىق جاعدايدا قالعان 2009 جىلدىڭ شىلدەسىندە بەرگەن ەدى. سول ۋاقىتتا ەو-عا قوسىلۋ ەل ەكونوميكاسىن تۇراقتاندىرۋعا كومەكتەسەدى دەگەن پىكىرلەر كەڭ تاراعان-تىن. ال اتالعان ماسەلەگە بايلانىستى كەلىسسوزدەر 2010 جىلى باستالسا, 2013 جىلى يسلانديانىڭ جاڭا ۇكىمەتى ەو-عا كىرۋدى توقتاتا تۇرۋ تۋرالى شەشىم قابىلداعان ەدى. ويتكەنى, ەو مەن يسلانديا اراسىندا كەيبىر ماسەلەلەر بويىنشا كەلىسپەۋشىلىكتەر بار دەلىنىپ وتىر.
تسارناەۆتى قانداي جازا كۇتىپ تۇر؟
بوستون سوتىندا جوحار تسارناەۆقا قاتىستى پروتسەسس ءۇشىن القا بيلەردى ىرىكتەۋ باستالدى. 21 جاستاعى تسارناەۆ 2013 جىلدىڭ ساۋىرىندەگى مارافون كەزىندە لاڭكەستىك جاسادى دەپ ايىپتالعان بولاتىن. لاڭكەستىك سالدارىنان 3 ادام قازا تاپسا, 260-تان استامى ءتۇرلى دەڭگەيدە دەنە جاراقاتىن العان ەدى.
تاياۋداعى 3 كۇن ىشىندە 1200 ادامنىڭ ىشىنەن 12 نەگىزگى جانە 6 قوسالقى جيۋري مۇشەلەرىن ىرىكتەپ الۋ مىندەتى تۇر. سوت پروتسەسى 26 قاڭتاردا باستالادى جانە ول 3-4 ايعا سوزىلۋى ىقتيمال دەلىنىپ وتىر. ەگەر تسارناەۆ كىنالى دەپ تانىلسا, ول ءولىم جازاسىنا كەسىلۋى ىقتيمال. ال ادۆوكاتتار ابجىلدىك تانىتا العان جاعدايدا, ول ءومىر باقي تۇرمەدە وتىرۋ ۇكىمىن الۋى مۇمكىن.
التىن شىنجىردىڭ ۇزىندىعى – 5 كم
بىرىككەن اراب امىرلىكتەرىندە ۇزىندىعى 5,52 شاقىرىم بولاتىن التىن شىنجىر جاساپ شىعارىلدى. جاقىن ارادا بۇل زەرگەرلىك بۇيىم گيننەستىڭ رەكوردتار كىتابىنا ەنگىزىلەتىن بولادى.
جەرگىلىكتى The National باسىلىمىنىڭ اقپاراتىنا قاراعاندا, شىنجىردىڭ سالماعى 256 كيلوگرامنان اسسا, قۇنى شامامەن 6 ميلليون دوللارعا جۋىقتايدى ەكەن. بۇل زەرگەرلىك بۇيىمدى جاساۋ ءۇشىن 100-دەن استام ادام 45 كۇن بويى ەڭبەكتەنگەن. بۇگىندە شىنجىردى دۋبايدىڭ ەسكى بولىگىندەگى التىن بازارى ماڭىندا قىزىقتاۋعا بولاتىن كورىنەدى. اشەكەي دۋبايدا 1 اقپانعا دەيىن جالعاساتىن 20-شى ساۋدا فەستيۆالى قارساڭىندا ارنايى جاسالىپتى.
سمارتفون قۇنى – 6 000 دوللار
اسا قىمبات تۇراتىن سمارتفوندار شىعاراتىن يتاليانىڭ Tonino Lamborghini Mobile كومپانياسى سمارتفوننىڭ قۇنى 6 مىڭ دوللار تۇراتىن جاڭا ۇلگىسىن ۇسىندى. تۇساۋكەسەر 6 قاڭتارعا قاراعان ءتۇنى ءوتتى.
ەلەكتر قۇرالدارىنا باعانىڭ جاپپاي تومەندەۋ ءۇردىسى بايقالىپ وتىرعانىنا قاراماستان, يتاليالىق كومپانيا ءوزى ءۇشىن ەڭ قىمبات ۇلگىنى شىعارۋعا شەشىم قابىلداعان. وسىنىڭ الدىنداعى ۇلگىدەگى سمارتفوندار قۇنى شامامەن 4 مىڭ دوللار تۇرادى. الايدا, رىنوكتا بۇدان دا قىمبات مودەلدەر بار ەكەنى بەلگىلى. كومپانيانىڭ باس ديرەكتورى بوب حاتەفيدىڭ ءوزى مويىنداپ وتىرعانداي, سمارتفوننىڭ سوڭعى ۇلگىسى سونشالىقتى ءبىر قاجەتتىلىك بولىپ تابىلمايدى, بۇعان تەك يەسىن باسقالاردان ەرەكشەلەۋدىڭ ءبىر ءتاسىلى رەتىندە عانا قاراعان ءجون.
قىسقا قايىرىپ ايتقاندا:
*حوككەيدەن جاستار اراسىنداعى الەم چەمپيوناتىنىڭ فينالىندا رەسەي قۇراماسى الاڭ يەلەرى – كانادا قۇراماسىنان 5:4 ەسەبىمەن جەڭىلىپ قالدى. ءسويتىپ, تورونتودا وتكەن الەم بىرىنشىلىگىندە كانادا جاستار قۇراماسى چەمپيون اتاندى.
*ەگيپەت استاناسى – كاير قالاسىنا جاقىن ماڭدا ورنالاسقان ءال-مينيا قالاسىندا بەتپەردە كيگەن بەلگىسىز بىرەۋلەر 2 پوليتسيا قىزمەتكەرىن اتىپ كەتكەن. ءتارتىپ ساقشىلارى قالاداعى شىركەۋلەردىڭ ءبىرىنىڭ جانىندا كەزەكشىلىكتە جۇرسە كەرەك.
*وڭتۇستىك كورەيانىڭ قورعانىس سالاسى بويىنشا ساتىپ الۋلار جۇرگىزۋ اگەنتتىگى وڭتۇستىك كورەيانىڭ Hyundai Rotem كومپانياسىنان 901,5 ميلليارد ۆونعا (820,3 ميلليون دوللار) تانكتەر ساتىپ الۋ بويىنشا كەلىسىمشارتقا قول قويدى.
برازيلياداعى تەمىرجول اپاتى سالدارىنان زارداپ شەككەن جولاۋشىلار سانى 140-قا جەتتى. بۇعان دەيىن ەكى پويىز سوقتىعىسىنان 69 ادام جاراقات الدى دەلىنگەن بولاتىن. قۋانىشقا وراي, قۇرباندىقتار جوق. اپات سالدارىنان تەمىرجول قوزعالىسى ازىرشە توقتاتىلىپ تۇر.
ينتەرنەت ماتەريالدارى نەگىزىندە ازىرلەندى.