اقتوبە. 6 قاڭتار. 2015 جىلعى 1 قاڭتاردا 20 ساعات 35 مينۋتتا اقتوبە قالاسى ىشكى ىستەر باسقارماسى جەدەل باسقارۋ ورتالىعىنىڭ «102» تەلەفونىنا بەلگىسىز ەر ادام حابارلاسىپ, باسقارما عيماراتىنا جارىلعىش زات قوياتىنى تۋرالى مالىمدەگەن. بۇل تۋرالى egemen.kz ءتىلشىسى حابارلادى.
حابار تۇسكەن بويدا ىشكى ىستەر دەپارتامەنتىنىڭ بارلىق جەكە قۇرامى دابىل بويىنشا دەرەۋ كوتەرىلدى. جەدەل-ىزدەستىرۋ جۇمىستارى بارىسىندا پوليتسەيلەر كۇدىكتىنىڭ جەكە باسىن انىقتادى. ول ماس كۇيىندە ىشكى ىستەر باسقارماسى عيماراتىنا جارىلعىش زات قوياتىنى تۋرالى حابارلاعان 34 جاستاعى قالا تۇرعىنى ەكەنى بەلگىلى بولدى. زاتتاي دالەلدەمە رەتىندە ۇيالى تەلەفون مەن سيم-كارتاسى تاركىلەندى.
قازىرگى تاڭدا اتالعان دەرەك بويىنشا قىلمىستىق كودەكستىڭ 273-بابىمەن قىلمىستىق ءىس قوزعالدى. كۇدىكتى ۋاقىتشا وقشاۋلاۋ قاماعىنا قامالدى. تەرگەۋ امالدارى جالعاسۋدا.
ساتىبالدى ءساۋىرباي.
دەرەك: egemen.kz.
سۋرەت: timeskz.kz.