كەز كەلگەن مەملەكەت كەمەل كەلەشەگىن ءوزىنىڭ جالىندى جاستارىمەن, وسكەلەڭ ۇرپاعىمەن بايلانىستىرارى ءسوزسىز. اتا-بابالارىمىز ءبىز, بۇگىنگى ۇرپاق ءۇشىن اقتىق دەمى قالعانشا كۇرەسىپ, تولارساقتان ساز كەشىپ, ەڭسەلى ەگەمەندىكتى سىيلادى. بۇل بىزگە بۇيىرعان ولشەۋسىز باقىت دەپ ويلايمىن.
وسى ءبىر قاسيەتتى ۇعىمنىڭ جاستار ساناسىندا ابدەن بەكىپ, ولاردىڭ بوستاندىقپەن اتقان ءاربىر تاڭعا شۇكىرلىكپەن قاراپ, ونى قىزعىشتاي قورعاۋىنا, كوزدىڭ اعى مەن قاراسىنداي ساقتاۋىنا مەملەكەت بار مۇمكىندىكتەردى جاساپ وتىر. تەك وسى جولدا تارتىنباي تالاپتانىپ, ەرىنبەي ەڭبەكتەنۋ قاجەت. ەلباسى نۇرسۇلتان نازارباەۆتىڭ تىكەلەي قولداۋىمەن جىل سايىن ەلىمىزدە جاستاردىڭ زياتكەرلىك الەۋەتىن قالىپتاستىراتىن ءتۇرلى رەسۋرستىق ورتالىقتار, ۇيىمدار مەن بىرلەستىكتەر اشىلىپ, ورەندەردىڭ جان-جاقتى دامۋىنا جاعداي جاسالۋدا.
ەگەمەندىك العاننان بەرى ءبىزدىڭ وبلىسىمىزدا دا 60 شاقتى جاستار ىستەرىمەن اينالىساتىن ۇيىمدار قۇرىلدى. سولاردىڭ ءبىرى – ءوزىم باسقاراتىن «جاستار باستامالارى ورتالىعى» مەكەمەسى. بۇگىندە اتالعان ورتالىقتا 60-قا جۋىق جاس مامان جەمىستى قىزمەت ەتۋدە. ولار ورەندەرگە ارنالعان «جاستار تاجىريبەسى», «ديپلوممەن – اۋىلعا!» سىندى مەملەكەتتىك باعدارلامالاردى جۇزەگە اسىرۋعا ءوز ۇلەستەرىن قوسۋدا.
ەڭبەك بيرجاسى ارقىلى ەڭبەكپەن قامتىلعاندار سانى دا جىل سايىن ارتىپ كەلەدى. وبلىسىمىزدا ءتۇرلى ءبىلىم, ونەر, كاسىپكەرلىك, ءدىن سىندى ءومىردىڭ سان سالاسىندا جۇرگەن ورەندەردىڭ ويلارىمەن, ىرگەلى ارەكەتتەرىمەن ساناسا وتىرىپ, سونداي-اق, ءمۇمكىندىگى شەكتەۋلى جانداردىڭ دا مۇڭ-مۇقتاجدىقتارىن ەسكەرىپ, قورىتىندى شىعارىپ, بىرلەسە جۇمىس جۇرگىزۋدى قىزمەتىمىزدىڭ نەگىزى دەپ سانايمىز.
ال «تاۋەلسىزدىك بىزگە نە بەردى؟» دەگەن ساۋال توڭىرەگىندە ويلاناتىن بولساق, ەڭ الدىمەن, جوعارىدا اتاپ ايتقانداي, باستاماشىل جاستاردىڭ باسىن بىرىكتىرەتىن ەركىندىك, بويىمىزعا ەشكىمنەن قايمىقپايتىن جىگەر بەردى. تاعى ءبىر ايتا كەتەتىن جايت, وتكەن جىلى «ماڭگىلىك ەل جاستارى – يندۋسترياعا» اتتى مەملەكەتتىك باعدارلامامەن ەلىمىزدىڭ وڭتۇستىك وڭىرىنەن قازاعى ازداۋ وبلىسىمىزعا 200 تالاپكەردىڭ كەلۋى كادر جەتىسپەۋشىلىگى سەكىلدى ماسەلەمىزدى شەشىپ قانا قويماي, شۇرايلى ءتىلىمىزدىڭ شۋاعىن كەلتىرەتىن قازاق ءتىلدى جاستارىمىزدىڭ داۋىسىن ءارتاراپتان ەستۋىمىزگە مۇمكىندىك بەردى.
تاۋەلسىزدىكتىڭ بىزگە, اسىرەسە, جاستارعا بەرگەنى ساۋساقپەن ساناپ, از سوزبەن قايىراتىن دۇنيە ەمەس. ەڭ بىرىنشىدەن, وي بوستاندىعىن, جان ازاتتىعىن سىيلاعان ەگەمەندىكتىڭ ءار ساتىنە ءبىزدىڭ بەرەرىمىز مول بولۋى كەرەك.
دانيار ءابۋتالىپ,
جاستار باستامالارى ورتالىعىنىڭ ديرەكتورى.
سولتۇستىك قازاقستان وبلىسى.