*«ازىق-ت ۇلىك كەلىسىمشارت كورپوراتسياسى» ۇك» اق «قازماقتا» اق-تىڭ 100% اكتسياسىن ساتادى. قۇرىلىمنىڭ ءباسپاسوز قىزمەتى حابارلاعانداي, باستاپقى باعا 3 380 051 579 تەڭگە بولىپ وتىر. اۋكتسيونعا قاتىسۋعا ارنالعان ءوتىنىم ۇستىمىزدەگى جىلدىڭ 5 اقپانىنا دەيىن قابىلدانادى.
*-ەلىمىزدە وڭتۇستىك كورەيا كومپانياسى قۋاتى 310 مەگاۆاتقا جەتەتىن جەس سالاتىن بولدى. وسىعان وراي بەكىتىلگەن كەلىسىمشارتتىڭ قۇنى 308 ملن. دوللاردى قۇراعان. ستانسا كاسپي تەڭىزىنىڭ سولتۇستىك جاعالاۋىندا ورنالاسپاق.
*«جوعارى وقۋ ورنىنىڭ ۇزدىك وقىتۋشىسى-2014» رەسپۋبليكالىق بايقاۋىنىڭ ءۇزدىكتەرى انىقتالدى. ءبىلىم جانە عىلىم مينيسترلىگى ءداستۇرلى تۇردە ۇيىمداستىراتىن شاراعا ەلىمىزدەگى 90 جوو-دان 545 ۇمىتكەر قاتىسىپ, سونىڭ 200-ءى جەڭىمپاز اتاندى. اتالمىش بايقاۋدا گرانت ۇتىپ العاندارعا الەمنىڭ جەتەكشى ۋنيۆەرسيتەتتەرىندە تاعىلىمدامادان وتۋگە, وزدەرىنىڭ عىلىمي جوبالارىن جۇزەگە اسىرۋىنا مۇمكىندىك بار.
*الماتى وبلىسىندا 40 وتباسى قايتا قالپىنا كەلتىرىلگەن كوپقاباتتى تۇرعىن ۇيگە قونىستاندى. الاكول اۋدانىندا ورنالاسقان بۇل ۇيدەگى پاتەرلەر مۇمكىندىگى شەكتەۋلى ادامدارعا, كوپبالالى انالارعا, مەملەكەتتىك قىزمەتشىلەر مەن جاس وتباسىلارعا بەرىلگەن. ونىڭ جوندەۋ جۇمىستارىنا «قولجەتىمدى باسپانا-2020» باعدارلاماسى اياسىندا 230 ملن. تەڭگەدەن استام قارجى ءبولىنگەن.
*قاراعاندى وڭىرىندەگى دوسكەي اۋىلىندا جاڭا ءدارىگەرلىك امبۋلاتوريا اشىلدى. وبلىس اكىمدىگىنىڭ باسپاسوز قىزمەتىنىڭ دەرەگىنشە, بۇل مەكەمەنىڭ قۇرىلىسى مەن جابدىقتالۋىنا رەسپۋبليكالىق قازىنادان 170 ملن. تەڭگە كولەمىندە قاراجات جۇمسالعان. ەندى اۋىل تۇرعىندارى ساپالى مەديتسينالىق قىزمەتتى قالاعا بارماي-اق, وزدەرىنىڭ تۇرعىلىقتى جەرىندە الا الادى. جاڭا عيماراتتا 42 بولمە مەن پەدياتريا بلوگى جۇمىس ءىستەيدى. سانيتارلىق اۆتوكولىك, جالپى تاجىريبەدەگى ەكى ءدارىگەر, 7 مەديتسينا قىزمەتكەرى حالىققا قىزمەت كورسەتۋگە دايىن. سونداي-اق, الداعى ۋاقىتتا مۇندا قوسىمشا ءدارىحانا, فتيزيوتەراپيا كابينەتى, كۇندىزگى ستاتسيونار اشۋ كوزدەلىپ وتىر.
*تۇركىستاندا كاسىپكەرلەرگە قىزمەت كورسەتۋ ورتالىعى پايدالانۋعا بەرىلدى. وڭتۇستىك قازاقستان وبلىسى «دامۋ» كاسىپكەرلىكتى دامىتۋ قورىنىڭ ءباسپاسوز قىزمەتى اتاپ كورسەتكەندەي, وندا «ءبىر تەرەزە» قاعيداتى بويىنشا كاسىپكەرلەر ءۇشىن قىزمەتتەر كەشەنى ۇسىنىلادى. سونداي-اق, جاڭا ورتالىقتا شاعىن جانە ورتا بيزنەستى مەملەكەتتىك قولداۋ جانە دامىتۋ شارالارى تۋرالى دا ماعلۇماتتار بەرىلەدى.
*اقتوبەدە ايماقتىق سيمۋلياتسيالىق ورتالىق ءوز جۇمىسىن باستادى. مۇندا اكۋشەر ءىسى جانە گينەكولوگيا, حيرۋرگيا مەن تەراپيا, مەدبيكە ءىسى سىنىپتارى قىزمەت كورسەتەدى. ايتا كەتەيىك, زاماناۋي سيمۋلياتورلارمەن جابدىقتالعان بۇل وقۋ ورتالىعىندا 50 ملن. تەڭگەگە ساتىپ الىنعان روبوتتار بار.
*سولتۇستىك قازاقستاندا جاڭا مەشىت اشىلدى. «قىزىلجار» ورتالىق مەشىتىنىڭ باسپاسوز قىزمەتى ەسىل اۋدانىنداعى جارعايىڭ اۋىلىندا بوي كوتەرگەن مەشىتتى جەكە كاسىپكەر دۋلات قاليتوۆ ءوز قاراجاتىنا سالعانىن مالىمدەدى. عيباداتحانادا كىتاپحانا, اسحانا جۇمىس ىستەيدى.
*اقتاۋدا مادەنيەت پەن سپورتتى دامىتۋ ءىسى باستى نازاردا تۇر. قالالىق ەكونوميكا جانە بيۋدجەتتىك جوسپارلاۋ ءبولىمىنىڭ باستىعى ادا كيمنىڭ سوزىنە قاراعاندا, بيىل 496 ملن. تەڭگەدەن استام قارجى اتالعان سالالاردى ورىستەتۋگە جۇمسالاتىن كورىنەدى.
حابارلار ۇكىمەت, وبلىستىق اكىمدىكتەر سايتتارى مەن «قازاقپارات» اگەنتتىگىنىڭ دەرەكتەرى بويىنشا دايىندالدى.