2018 جىلدارى بارقىتبەلدىڭ باۋرايىنداعى جازيرالى جازىقتا ارحەولوگ زەينوللا ساماشەۆتىڭ باسشىلىعىمەن قازبا جۇمىستارى جۇرگىزىلگەن. ەلەكە سازىنىڭ ەرەكشەلىگى سول, مۇنداعى وبالاردان وزگە وڭىرلەردە كەزدەسپەيتىن قۇندى جادىگەرلەر تابىلعان. سونىڭ ءبىرى – التىن قىندى ويۋلى قانجار.
قولادان جاسالعان قانجاردىڭ قىنى التىنمەن اپتالعانىمەن, ىشكى بولىگى ۇستىرىكتەلگەن جۇقا اعاش. تاقتايشانىڭ ءوزى ءتورت بولىكتەن قۇرالعان. سىرتقى قاپتاماسى ۇساق التىن مونشاقتارمەن كومكەرىلە وتىرىپ, ويۋلانعان. بىرنەشە جەردەن كوگىلدىر ءتۇستى تاستارمەن بەزەندىرىلگەن. قانجاردىڭ جوعارعى جاعىندا بەلدىككە بەكىتەتىن تەسىگى بار. ول بولىگى دە ەرەكشە تالعاممەن كوبەلەك ءتارىزدى ەتىپ جاسالعان. جانۋارلاردىڭ سيمۆوليكالىق بەلگىلەرىنە زەر سالساڭىز, ءۇش ەلىكتىڭ سۋرەتى ورنالاسقان. كونتۋر بويىمەن قاراساڭىز, استىڭعى جاعىندا جىرتقىش اڭ بەينەلەنگەن. مۇندا تۇياقتى جانۋارلاردىڭ ەكەۋىن ارتقا بۇرىپ, اياقتارىن ءسال بۇگە بەدەرلەپتى. جالپى, جانۋارلار ءداستۇرلى سپيرال ءتارىزدى بەلگىلەرمەن بەينەلەنگەن.
ايتا كەتەرلىگى, التىن اشەكەيلەنگەن تاقتايشالار قىننىڭ الدىڭعى بولىگىن عانا قاپتايدى. ال ارتقى جاعىنداعى اعاش تاقتايشا بەتى بىلعارىمەن قاپتالعان كورىنەدى.
قۇيىلعان قولا قانجاردىڭ بۇيرا تۇتقاسى, كولدەنەڭ قيماسى تىكبۇرىشتى, ءسال دوڭگەلەنگەن بەتتەرى بار. ساپتىڭ ەكى جاعىندا ءمۇيىزدى ءتورت مۋفلون بەينەلەنگەن. ساپتىڭ باس جاعى مىسىق تۇقىمداس جىرتقىشتىڭ ەكى باسى تۇرىندە جاسالعان. تۇمسىقتارى قاراما-قارسى باعىتتا. باستاردىڭ مورفولوگيالىق بەلگىلەرىنە سۇيەنگەن زەرتتەۋشىلەر بارىستىڭ باسىنا سايكەس كەلەدى دەپ بولجاعان.
جالپى, قانجاردىڭ ۇزىندىعى – 29,4 سانتيمەتر بولسا, ءجۇزى –19,1 سانتيمەتر.