شىراقتىڭ شىتىرمانى

2023 جىلى تۇسىرىلگەن «شىراق» ءمۋلتفيلمى وسى ماسەلەنى اشىپ كورسەتەدى. كارتينانى 3D فورماتىندا «اRA» انيماتسيالىق ستۋدياسى جاساپ شىعارعان. ماحاببات, قامقورلىق, ءىلتي­پات سەكىلدى قۇندىلىقتاردى ناسيحاتتايتىن كوركەم تۋىندى كورەرمەندەردىڭ ىستىق ىقىلاسىنا يە بولدى.

وقيعا كادىمگى شىراقتىڭ باس­تان كەشكەن وقيعاسىن باياندايدى. ول ءبىر ءۇيدىڭ قاراڭعى قويماسىندا ءومىر ءسۇرىپ جاتادى. بۇل قاراپايىم وتباسىنىڭ تۇپكى بولمەسى ەدى. داۋلەتى دە, ساۋلەتى دە كەلىسكەن قازىرگى زامان شاڭىراعى. وتاعاسى جۇمىستان قولى بوسامايدى, قاربالاس. اناسى باقىتتى وتباسى بولۋ تۋرالى اسۇيدە پودكاست تىڭدايدى. ال ولاردىڭ بالالارى ءوز بەتىمەن ويناپ جۇرەدى. ءبارى قالىپتى قۇبىلىسقا اينالعان. بىرگە تۇرىپ, بىرگە جۇرگەنمەن ارقايسىسىنىڭ الەمى ءار جاقتا ءجۇر.

وسى ورايدا دراماتۋرگ ەجەن يونەس­كونىڭ «تاقىرباس ايەل» پەساسى ويعا ورالادى. ءبىرى گازەت وقىپ, ءبىرى ش ۇلىق توقىپ وتىرعان ەرلى-زايىپتىلار ءبىر-بىرىمەن اڭگىمەلەسىپ وتىرادى. الايدا ولاردىڭ ديولوگتەرى ءبىر-بىرىمەن مۇلدە قابىسپايدى. قۇددى ارقايسى ءوز-وزىمەن سويلەسىپ وتىرعانداي اسەر قالدىرادى. مىسالى, جۇبايى «جانىم, بۇگىن اۋا رايى سونداي تاماشا بولىپ تۇر» دەسە, ء«يا, ايتپا. بۇگىنگى گازەتتىڭ ءنومىرى راسىندا ەرەكشە شىعىپتى», دەيدى. وسىنداي قاراما-قايشىلىققا تولى ابسۋرد مۋلتفيلمدەگى وتباسىندا دا كورىنىس تابادى.

شىراق ادامداردان قورقادى ەكەن. سوندىقتان بولمەگە تىعىلىپ الىپ, سىرتقا شىقپايتىن. ونىڭ دوستارى – سول بولمەدەگى جانسىز ويىنشىقتار. شىراق ولاردى ءوز وتباسىم دەپ بىلەتىن. دەگەنمەن دوستارى جانسىز زاتتار بولعاندىقتان, شىراق ولارمەن سويلەسە المايدى. ءبىر كۇنى بولمەگە ۇيدەگى مىسىق كىرىپ كەلىپ, شىراقتىڭ سۇيىكتى دوسى — قۋىرشاقتى الىپ كەتەدى. شىراق دوسىن قۇتقارۋ ءۇشىن بولمەدەن شىعىپ, ادامدار جۇرگەن بولمەگە بارۋعا ءماجبۇر بولادى. قورقىنىشىن جەڭىپ, سونىڭ ارقاسىندا مۇلدەم باسقا الەمگە – سۇرىقسىز, جىلۋسىز ادامدار الەمىنە تاپ بولادى.

انيماتورلار ەندىگى كەزەكتە كو­رەرمەنگە مىنا دۇنيەنى كىشكەنتاي عانا شىراقتىڭ كوزىمەن كورسەتەدى. ەنجار انا, سامارقاۋ اكە, كوڭىلسىز بالا شىراقتىڭ تاڭدانىسىن تۋعىزادى. بىردە سىرتتا داۋىل تۇرىپ, ءۇيدىڭ جارىعىن ءوشىرىپ تاستايدى. ءبىر ساتكە ءبارى گادجەتتەرىنەن باسىن كوتەرىپ, قاراڭعىدا ءبىر-ءبىرىن ىزدەيدى. ارتىنشا اكەسى ەلەكتر توگى وشكەندە قولداناتىن شىراقتى ىزدەيدى. ءوزىنىڭ قاجەتتىلىگىن بىلگەن شىراق ءوزىن قاتتى باقىتتى سەزىنەدى. وتباسى بالاسىنا كولەڭكەلەر ويىنىن كورسەتىپ, ءتاتتى ءبىر سەزىممەن ۇيقىعا جاتادى. شىراق ءتۇنى بويى ولارعا جارىعىن توگىپ, اسا زور قۋا­نىش­پەن بالقىپ كەتەدى. باقىتتىڭ جولىندا ءوزىن قۇربان ەتەدى. سەبەبى بۇل قۋانىش سوعان تاتيتىن ەدى. نەبارى 24 مينۋتقا سوزىلاتىن مۋلتفيلم كورەرمەندى جىلى ءبىر ويدىڭ قۇشاعىنا قالدىرىپ كەتەدى سولايشا.

اقىن تۇمانباي مولداعاليەۆ اي­تادى: «ادامعا ەڭ اۋەلى كەرەگى – ءبىر­اۋىز جىلى ءسوز ايتپاعان سوڭ, ءومىر قىس­قارا تۇسەدى», دەيدى جارىقتىق. راسىندا, سىيلىقتا شەك بولعانىمەن, سىي­لاس­تىق­تا شەك بولمايدى. وتباسىنىڭ اۋا را­يىنا دا اسەر ەتەتىن وسى قاعيدالار. مەيىرىم شىراقتارىڭىز سونبەسىن!