سەناتتىڭ الەۋمەتتىك-مادەني دامۋ جانە عىلىم كوميتەتىنىڭ دەپۋتاتتارى «وتاندىق عىلىمدى دامىتۋ جانە عىلىمي-تەحنيكالىق پروگرەسس» تاقىرىبىنا ارنالعان دوڭگەلەك ۇستەلگە دايىندىق اياسىندا عىلىمي-تەحنيكالىق قىزمەت ناتيجەلەرىنىڭ جۇمىسىمەن تانىسۋ ماقساتىندا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە بولدى, دەپ حابارلايدى Egemen.kz جوعارعى پالاتانىڭ ءباسپاسوز قىزمەتىنە سىلتەمە جاساپ.
سەناتورلارعا اتالعان ۋنيۆەرسيتەتتە اتوم جانە سۋتەگى ەنەرگەتيكاسى, مولەكۋلالىق بيولوگيا, گەن ينجەنەرياسى, بيومەديتسينا جانە تاعى باسقا سالالاردا 240-تان استام عىلىمي زەرتتەۋلەر مەن حالىقارالىق 10 عىلىمي جوبا ىسكە اسىپ جاتقانى تۋرالى حاباردار ەتىلدى. ال 13 فاكۋلتەتتە جانە 31 عىلىمي-زەرتتەۋ ورتالىعىندا عىلىمي قىزمەت جۇرگىزىلىپ كەلەدى.
پارلامەنتشىلەر جوعارى وقۋ ورنى بازاسىندا قۇرىلعان قۇرىلىس, جول-قۇرىلىس سەكتورى قىزمەتتەرىنىڭ تولىق تىزبەگىن كورسەتۋ جونىندەگى قۇرىلىس-تەحنيكالىق ينجينيرينگ ورتالىعىنىڭ زەرتحاناسىندا بولدى. اتالعان ورتالىق قۇرىلىس سالاسىنا قاجەتتى وزىق تەحنولوگيالاردى ازىرلەۋمەن اينالىسادى.
سەنات دەپۋتاتتارى ءىس-شارا بارىسىندا باسشىلىقپەن جانە پروفەسسور-وقىتۋشىلار قۇرامىمەن عىلىمي قىزمەتتى دامىتۋ ماسەلەلەرىن, پروبلەمالاردى, سونداي-اق ولاردى شەشۋ جولدارىن تالقىلادى. پارلامەنتشىلەر ساپار قورىتىندىسى بويىنشا كەزدەسۋ اياسىندا كوتەرىلگەن وزەكتى ماسەلەلەردى نازارعا الىپ, ولاردىڭ الداعى دوڭگەلەك ۇستەل وتىرىسىندا تالقىلاۋعا شىعارىلاتىنىن اتاپ ءوتتى.