ۇلى دالا تورىندە قيلى تارتىسقا تولى, كەرى كەتكەن قيىن كەزەڭدەردىڭ وتكەنى تاريحىمىزدان بەلگىلى. سول الماعايىپ زاماندا بۇقارا حالىقتىڭ كۇنكورىسى مەن جان اماندىعى جولىندا باسىن قاۋىپ پەن قاتەرگە تىككەن تاۋ تۇلعالارىمىز كۇلتوبەنىڭ باسىندا كەڭەس قۇرعان. مەملەكەت باسشىسى اتا-بابا ءداستۇرىن العا تارتىپ, ەلىمىزدى جاڭارۋ مەن جاڭعىرۋ جولىنا باستاپ كەلەدى.
ولاي دەيتىنىمىز, پرەزيدەنت قاسىم-جومارت توقاەۆتىڭ ۇلت تاعدىرىنا قاتىستى كەلەلى ماسەلەلەردى ۇلى دالانىڭ كيەلى مەكەندەرىنە بارىپ كوتەرۋىندە بولىپ تۇر. مەملەكەت باسشىسىنىڭ ەل تىزگىنىن قولىنا العاننان كەيىن وتكىزگەن ۇلتتىق قۇرىلتايدىڭ العاشقى وتىرىسى كيەلى مەكەن ۇلىتاۋ تورىندە ۇلى تۇلعالاردى دارىپتەۋدەن باستالسا, قاسيەتتى تۇركىستاندا وتكەن ەكىنشى وتىرىسىندا ءتول تاريحىمىز بەن رۋحاني قۇندىلىقتارىمىز كەڭىنەن تارازىلانعان ەدى. ال ۇلتتىق قۇرىلتايدىڭ سارايشىق وڭىرىندە وتكەن كەزەكتى وتىرىسىندا ەلىمىزدىڭ جارقىن بولاشاعىنا جول اشاتىن باستامالار تالقىعا ءتۇستى.
قۇرىلتاي وتىرىسىندا مەملەكەت باسشىسى: «ۇلت ساپاسىن جاقسارتامىز دەسەك, ءبىر ەل بولىپ جاڭا قۇندىلىقتار جۇيەسىن قالىپتاستىرۋىمىز قاجەت. اعا بۋىن جاس ۇرپاققا جول نۇسقاپ, باعىت-باعدار بەرۋى كەرەك. ەلىمىزدە كوزى اشىق, كوكىرەگى وياۋ, ويى ۇشقىر, ءبىلىمدى جاستار كوپ. ءبىز ولاردىڭ بويىنا اسىل قاسيەتتەردى ءسىڭىرۋىمىز قاجەت. ءبىز بولاشاققا سەنىممەن باسۋ ءۇشىن ۇلى دالاداعى كوشپەندىلەر وركەنيەتىنىڭ تىكەلەي مۇراگەرى رەتىندە مادەني مۇرالارىمىزدى ساقتاپ, ۇلتتىق بىرەگەيلىگىمىزدى نىعايتۋىمىز قاجەت. ونىڭ بىردەن-ءبىر كورىنىسى – ءاز ناۋرىزدىڭ مارتەبەسىن كوتەرىپ, مازمۇنىن بايىتا تۇسۋىمىزدەن بايقالۋعا ءتيىس», دەگەن ەدى.
مەملەكەت باسشىسى ايتىپ وتىرعان كوزى اشىق, كوكىرەگى وياۋ, ويى ۇشقىر, ءبىلىمدى جاستار ەلىمىزدىڭ جوعارى وقۋ ورىندارىندا ءتۇرلى ءبىلىم باعدارلامالارى بويىنشا جوعارى ءبىلىم الىپ ءجۇر. ياعني جوعارى وقۋ ورىندارى – جاستاردى ۇلكەن ومىرگە دايىندايتىن پاراسات مەكتەبى. وسى تۇرعىدا عىلىم جانە جوعارى ءبىلىم ءمينيسترى ساياسات نۇربەكتىڭ تىكەلەي جەتەكشىلىگىمەن وتاندىق جوو رەكتورلارى, پرورەكتورلارىنىڭ باسقوسۋىن وتكىزۋ داستۇرگە اينالدى. باسقوسۋلاردا جوعارى وقۋ ورنىنداعى جالىندى وسكەلەڭ جاستار ساپىنان ەلىمىزدىڭ جارقىن بولاشاعىنا قىزمەت ەتەتىن تۇلعالاردى تاربيەلەۋ ماسەلەلەرى تالقىعا تۇسەدى. مينيسترلىك تاراپىنان بەكىتىلگەن جوعارى وقۋ ورىندارىنداعى وسكەلەڭ جاستاردى وركەنيەتكە جەتەلەۋدىڭ 2029 جىلعا دەيىنگى ستراتەگيالىق تۇجىرىمداماسى جوعارى وقۋ ورىندارىنىڭ جۇمىس تاجىريبەسىندە جۇزەگە اسىپ كەلەدى.
پرەزيدەنتتىڭ ءاز ناۋرىزدىڭ مارتەبەسىن كوتەرىپ, مازمۇنىن بايىتۋ تۋرالى ۇستانىمىنا وراي عىلىم جانە جوعارى ءبىلىم مينيسترلىگى وتاندىق جوعارى وقۋ ورىندارىندا ۇلىستىڭ ۇلى كۇنى مەرەكەسىن تويلاۋدىڭ ونكۇندىگىن جوعارى دەڭگەيدە وتكىزۋدى قولعا الدى. كورىسۋ كۇنىنەن باستاۋ العان رۋحاني تانىمى تەرەڭ مەرەكەمىز قايىرىمدىلىق كۇنى, مادەنيەت جانە ۇلتتىق سالت-ءداستۇر كۇنى, شاڭىراق كۇنى, ۇلتتىق كيىم كۇنى, جاڭارۋ كۇنى, ۇلتتىق سپورت كۇنى, ىنتىماق كۇنى, جىل باسى – ءاز ناۋرىز مەرەكەلەرىمەن استاسىپ, پروفەسسور-وقىتۋشىلار قۇرامى مەن ستۋدەنتتەردىڭ رۋحاني تۇرعىدا كەمەلدەنۋىنە زور ىقپال ەتىپ وتىر. وسى باستامانى رياسىز شىن ىقىلاسپەن قابىلداعان جۇمابەك تاشەنوۆ ۋنيۆەرسيتەتىنىڭ قىزمەتكەرلەرى مەن ءبىلىم الۋشى جاستارى ۇلتتىق رۋحىمىزدىڭ ويانۋىنا ءوز ۇلەسىن قوسىپ ءجۇر. ال ۋنيۆەرسيتەتىمىزدىڭ باستى ۇستانىمى – جاستاردىڭ عىلىم, سپورت, ونەرگە قىزىعۋشىلىعىن ارتتىرۋ ارقىلى ولاردىڭ تۇلعالىق قابىلەتىن جان-جاقتى دامىتۋ, ستراتەگيالىق شەشىمدەر قابىلداۋعا باۋلۋ.
عالىمجان بيتۇرسىن,
ج.تاشەنوۆ ۋنيۆەرسيتەتىنىڭ پرورەكتورى