ۇلىستىڭ ۇلى كۇنى قارساڭىندا جۋرناليستەر وداعىنىڭ شىعىستاعى فيليالى وكىلدەرىنىڭ ۇيىمداستىرۋىمەن باق وكىلدەرى اراسىندا ساداق اتۋدان اشىق تۋرنير ءوتتى. وبلىس ورتالىعىندا وتكەن جارىسقا ەلۋدەن اسا جۋرناليست قاتىستى.
ارعىسى – اباي وبلىسىنىڭ كوكپەكتى اۋدانى, بەرىسى – سامار, ۇلان, كاتونقاراعاي اۋداندارىنان كەلگەن ءسوز مەرگەندەرىنىڭ سۇرمەرگەندەرى انىقتالدى. قالاي دەگەنمەن, توپتىڭ اراسىندا كەرىپ تۇرىپ ساداق اتۋ قانىمىزدا بار ەكەن. كەيبىرەۋلەر ساداقتى سوندا عانا قولعا الىپ, ءسال جاتتىعىپ, جارىس سىزىعىنا تۇردى. سويتە تۇرا جۇلدەگە ءىلىندى.
جۋرناليستەر اراسىندا تۇڭعىش ءوتىپ تۇرعان سايىس اۋەلى ارداگەر جۋرناليست ءۋاليحان توقپاتاەۆتىڭ باتا بەرۋىمەن باستالدى. ول جينالعانداردى ۇلىستىڭ ۇلى كۇنىمەن قۇتتىقتاپ, جەڭىس تىلەدى.
– بابالارىمىز اق بىلەكتىڭ كۇشىمەن ساداق تارتىپ, جاۋگەرشىلىك زاماندا ۇلان-عايىر اتىراپتى كەيىنگى ۇرپاعىنا امانات ەتىپ قالدىردى. ەندىگى تىلەرىمىز سول, ەل امان بولسىن! بۇل جەبەنى بۇرىندارى ەل مەن جەردى جاۋدان قورعاۋ ءۇشىن قولدانسا, بۇگىندە كوشپەلىلەر ويىنىندا تەك سانگە تارتىپ جۇرەيىك! – دەدى ارداگەر قالامگەر ءۋاليحان توقپاتاەۆ.
سايىستا ەرلەرمەن قاتار, نازىك جاندى قىزدار دا باق سىناستى. قورىتىندىسىندا اتقان جەبەلەرى نىساناعا ءدوپ ءتيىپ, ءبىرىنشى ورىنعا جايعاسقان – وبلىستىق «مەنىڭ ولكەم» گازەتىنىڭ ءتىلشىسى ديدار ەربولاتقىزى. 2-ورىندى «رۋدنىي التاي» گازەتىنىڭ ءفوتوتىلشىسى اياۋجان وتەۋلينوۆا ەنشىلەسە, 3-ورىندى تاعى دا «مەنىڭ ولكەم» گازەتىنىڭ ءجۋرناليسى قىمبات مۋحاماديەۆا قانجىعالادى. ال ەرلەر اراسىندا وبلىستىق «ديدار» گازەتىنىڭ ءتىلشىسى ىنتىماق تولقىن 1-ورىندى جەبەسىنە ءىلدى. 2-ورىن وسى گازەتتىڭ باس رەداكتورى سەرىك ابىلحانعا, 3-ورىن كوكپەكتى اۋداندىق «جۇلدىز» گازەتىنىڭ رەداكتورى دارحان بەردىبەككە بۇيىردى.
سايىس سوڭىندا ۇيىمداستىرۋشىلار سالتاناتتى شاراعا قولداۋ كورسەتكەن, دەمەۋشىلىك ەتكەن ازاماتتارعا العىسىن ايتتى.
وسكەمەن