پرەمەر-مينيستر ولجاس بەكتەنوۆ «شەلل پلس» كونتسەرنىنىڭ اتقارۋشى ۆيتسە-پرەزيدەنتى پيتەر كوستەللومەن كەزدەسىپ, مۇناي-گاز سالاسىنداعى بىرلەسكەن جوبالاردىڭ ىسكە اسىرىلۋ بارىسىن تالقىلادى.
قاراشىعاناقتى كەڭەيتۋ جوباسى بويىنشا مۇناي مەن كوندەنسات ءوندىرۋدى جىلىنا كەمىندە 11 ملن توننا دەڭگەيىندە ۇستاپ تۇرۋ – باسىم مىندەتتەردىڭ ءبىرى. وسى ماقساتتا تاراپتار شيكى گازدى كەرى ايداۋدىڭ قوسىمشا كومپرەسسورلارىن ۋاقتىلى ىسكە قوسۋدى قامتاماسىز ەتەدى. سونىمەن قاتار جوبانىڭ تولىققاندى قىزمەتىن قامتاماسىز ەتۋ ماقساتىندا اكتسيونەرلەردىڭ ەسەبىنەن قاراشىعاناقتاعى قۋاتتىلىعى جىلىنا 4 ملرد تەكشە مەتر گاز وڭدەۋ زاۋىتىن سالۋ ماسەلەسى قاراستىرىلىپ جاتىر.
قاشاعان كەن ورنىنىڭ تۇراقتى جۇمىسىنا ەرەكشە نازار اۋدارىلدى. وتكەن جىلى مۇناي ءوندىرۋ 18,77 ملن توننا, گاز ءوندىرۋ 11,86 ملرد م3, گازدى قاباتقا كەرى ايداۋ 5,83 ملرد م3 قۇرادى. كەن ورنىن تولىق يگەرۋ ءۇشىن قاشاعاندا گاز وڭدەۋ زاۋىتىن سالۋ ماسەلەسى پىسىقتاۋ ساتىسىندا تۇر.
ۇكىمەت باسشىسى جوبالاردى ىسكە اسىرۋ اياسىندا, ونىڭ ىشىندە قازاقستان اۋماعىندا جوق وندىرىستەردى وقشاۋلاۋ ارقىلى قازاقستاندىق قامتۋدى ارتتىرۋدىڭ باسىمدىعىن اتاپ ءوتتى.
«بۇگىندە جوبا وپەراتورلارىنىڭ جۇمىسىنداعى جەرگىلىكتى قامتۋ ۇلەسى قولايلى دەڭگەيدە, ال تاۋارلاردى ساتىپ الۋداعى جەرگىلىكتى قامتۋ ۇلەسى ءالى دە وتە تومەن. بۇل ءونىم شىعارۋعا مۇددەلى جەرگىلىكتى وندىرۋشىلەرمەن تىعىز قارىم-قاتىناستى قاجەت ەتەدى», دەپ اتاپ ءوتتى و.بەكتەنوۆ.
كەزدەسۋ قورىتىندىسىندا قاتىسۋشىلار ۇزاقمەرزىمدى ىنتىماقتاستىقتى ودان ءارى دامىتۋ نيەتىن راستادى. سونداي-اق تالقىلاۋ ناتيجەسىندە جاقىن ارادا ىشكى نارىقتا تاۋارلاردى, جۇمىستار مەن قىزمەتتەردى ساتىپ الۋدى ۇلعايتۋ ماقساتىندا جەرگىلىكتى قامتۋدى دامىتۋ باعدارلاماسى قايتا قارالادى.
سونىمەن قاتار كەزدەسۋگە قاتىسۋشىلار «شەلل» كومپانياسىنىڭ قازاقستانداعى الەۋمەتتىك جانە ءبىلىم بەرۋ جوبالارىنىڭ وڭ اسەرىن اتاپ ءوتتى.