ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى اۋسترالياداعى ەڭ ءىرى APAIE حالىقارالىق جوعارى ءبىلىم كونفەرەنتسياسىندا ءوز پاۆيلونىن تانىستىردى.
APAIE – الەمنىڭ تۇكپىر-تۇكپىرىندەگى اكادەميالىق ورتا وكىلدەرىنىڭ اراسىندا ءبىلىم مەن تاجىريبە الماسۋعا ارنالعان ەڭ ۇلكەن ءۇش الاڭنىڭ ءبىرى. بيىلعى كورمەگە الەمنىڭ 300-دەن استام جەتەكشى ۋنيۆەرسيتەتى قاتىسىپ, ءبىلىم بەرۋ مۇمكىندىگىن پاش ەتتى.
ۇلتتىق ۋنيۆەرسيتەت APAIE كونفەرەنتسياسىنا ەكىنشى رەت قاتىسىپ, حالىقارالىق باعدارلامالارى مەن جوبالارىن تانىستىردى. كورمەنى 2 مىڭنان استام دەلەگات تاماشالادى. ۋنيۆەرسيتەتتىڭ ستراتەگيالىق دامۋ جونىندەگى پرورەكتورى دۋمان ايتماعامبەتوۆ بۇگىندە ءبىلىم ورداسىنىڭ حالىقارالىق ىنتىماقتاستىقتى بەلسەندى دامىتىپ, ستۋدەنتتەر مەن وقىتۋشىلار ءۇشىن مۇمكىندىكتەردى كەڭەيتىپ جاتقانىن ايتتى.
– APAIE كونفەرەنتسياسى ءبىز ءۇشىن وتە ناتيجەلى ءوتتى. ەلۋدەن استام جوعارعى وقۋ ورنى وكىلدەرىمەن كەلىسسوز جۇرگىزىپ, جاپونيا مەن سينگاپۋردىڭ جەتەكشى ۋنيۆەرسيتەتتەرىمەن ىنتىماقتاستىق باعىتتارىن تالقىلادىق. شەتەلدىك سەرىكتەستەر اعىلشىن تىلىندەگى تەحنيكالىق جانە ينجەنەرلىك باعدارلامالارىمىزعا ۇلكەن قىزىعۋشىلىق تانىتتى. سونىمەن قاتار ءبىز الەمدەگى ەڭ ۇزدىك بيزنەس مەكتەپتەرىنىڭ بىرىمەن بىرلەسكەن ءبىلىم بەرۋ باعدارلاماسىن ازىرلەۋدى جوسپارلاپ وتىرمىز, – دەدى د.ايتماعامبەتوۆ.
حالىقارالىق كونفەرەنتسياعا قاتىسۋشىلار تۇراقتى دامۋعا, ستراتەگيالىق سەرىكتەستىكتى كەڭەيتۋگە ەرەكشە نازار اۋدارىپ كەلەدى. وتكەن جىلى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى ءبىلىم بەرۋ ۇدەرىسىن بانگكوكتاعى APAIE كورمەسىندە تانىستىرعان بولاتىن. سونىڭ ناتيجەسىندە بۇل ايماقتاعى ءبىلىم وردالارىمەن ىنتىماقتاستىق دامىپ, قازىرگى تاڭدا اكادەميالىق ۇتقىرلىق اياسىندا تايلاند, ۆەتنام جانە باسقا ەلدەردىڭ ستۋدەنتتەرى ەۇۋ-دا ءبىلىم الىپ جاتىر.
بەكزات قۇلشار,
ل.ن.گۋميلەۆ اتىنداعى ەۇۋ ستۋدەنتى