بىرتىندەپ جىلىنادى: قازگيدرومەت الداعى ءۇش كۇندە اۋا رايى قانداي بولاتىنىن مالىمدەدى

سينوپتيكتەردىڭ بولجامىنشا, الداعى ءۇش كۇندە باتىستا, سولتۇستىك-باتىستا, اپتا سوڭىندا قازاقستاننىڭ شىعىسىندا, 17-18 ناۋرىز كۇندەرى قىزىلوردا وبلىسىندا اتموسفەرالىق فرونتالدى بولىكتەردىڭ وتۋىنە بايلانىستى تۇراقسىز اۋا رايى ساقتالادى. جاۋىن-شاشىن بولادى.

18 ناۋرىزدا باتىس قازاقستان, اتىراۋ وبلىسىندا, 17 ناۋرىزدا ماڭعىستاۋ وبلىسىندا قاتتى جاۋىن-شاشىن, جاڭبىر ارالاس قار جاۋادى.

16-17 ناۋرىزدا تۇركىستان وبلىسىندا, 17-18 ناۋرىزدا ەلىمىزدىڭ سولتۇستىك, وڭتۇستىك-شىعىس جانە ورتالىق وبلىستارىندا, 18 ناۋرىزدا شىعىس قازاقستاندا جاۋىن-شاشىنسىز اۋا رايى ساقتالادى.

رەسپۋبليكانىڭ بارلىق اۋماعىندا جەل كۇشەيەدى, تۇمان, كوكتايعاق, سولتۇستىكتە, شىعىستا جانە ورتالىقتا جاياۋ بوراسىن سوعادى.

رەسپۋبليكانىڭ وڭتۇستىك جارتىسىندا اۋا تەمپەراتۋراسى بىرتىندەپ 8-20 گرادۋسقا, سولتۇستىك جارتىسىندا 0-8 گرادۋسقا دەيىن كوتەرىلەدى.