ورمانعا ورانىپ جاتقان مارقاكولدىڭ اسەم تابيعاتىن قىسى-جازى كوز تايدىرماي قىزعىشتاي قورىپ جۇرگەن ارۋلار جۇمىستىڭ اۋىرلىعىنا قاراپ تۇرعان جوق. ارقاشان قاتاردا. ءبىر عانا توسقايىڭ ۋچاسكەسىندە ەر-ازاماتتارمەن ۇزەڭگىلەسە بىرنەشە قىز-كەلىنشەك قىزمەت ەتەدى.
توپىرلاعان تۋريستەردىڭ تابانى تيە بەرمەيتىن شالعايداعى توسقايىڭعا قاراستى ۋچاسكەلەردىڭ بارلىعى دا شەكارا بويىندا جاتىر. بۇل جاقتىڭ وزەن-كولى, تاۋ-تاسى, سىڭسىعان ورمان-توعايى تىم-تىم سۇلۋ. قاراساڭ, كوز تويمايتىن تۇمسا تابيعات. وسىنداي بايلىقتى قورعاۋدىڭ الدىڭعى شەبىندە اق جاۋلىقتى انالار مەن بۇرىمدى قىزدار دا ءجۇر. كەيىنگى جىلدارى كۇزگە قاراي كورشىلەس وبلىستا ورمان ءورتى كۇشەيىپ, ولاردان دا مازا قاشتى. ونىڭ ۇستىنە شەكارانىڭ شەكتەۋى بار مارالدى, شاناعاتتى, بالىقتى بۇلاق سەكىلدى ۋچاسكەلەرگە ارنايى رۇقسات پاراعىمەن كىرىپ, كەشكى سەگىزگە دەيىن پاترۋلدەۋ جۇرگىزدى. البەتتە, ءورت بولا قالعان جاعدايدا ۋاقىتقا شەكتەۋ قويىلمايدى. ورمانشىلار ەڭ باستىسى, ءتىلسىز جاۋدى اۋىزدىقتاۋعا كۇش سالادى. جالپى, بىلايعى ۋچاسكەلەردە ورمانشىلار اعاش كەسۋ سەكىلدى زاڭ بۇزۋشىلىقتاردى كەزدەستىرسە, دەرەۋ حاتتاما تولتىرىپ, شارا قولدانۋعا دا قۇقىلى. مۇنداي قىزمەت تە – ارۋلاردىڭ موينىندا. ورمانشى ينسپەكتور گۇلزات دونەنبايقىزىنىڭ ايتۋىنشا, قۇقىق بۇزۋشىلىقتان بولەك ورمانداعى اڭ-قۇستاردىڭ ءىزى, كۇن رايى سەكىلدى تابيعي قۇبىلىستارعا دەيىن داپتەرلەرىنە تىركەپ, جۇيەلى باقىلايدى.
– ورمانشىلىق قىزمەتتە جۇرگەنىمە ون ەكى جىل بولىپتى. وعان دەيىن بالاباقشادا جۇمىس ىستەگەنمىن. دۇكەندە ساتۋشى دا بولدىم. قازىر كوبىنەسە راتسيادا وتىرامىن. جاپىراق قۋراپ, قۇرعاقشىلىق بولىپ تۇرعان كۇزدىڭ كۇنى مازا جوق. پاترۋلدەۋدە جۇرگەن ينسپەكتورلار ەكى ساعات سايىن جاعدايدى بايانداپ وتىرادى. ءورت قاۋپى كۇشەيگەن كەزدەرى تاۋلىكتەپ جۇمىستا جۇرەمىز. ەڭ باستىسى, جۇمىس وزىمە ۇنايدى. ەكى جىلدان سوڭ زەينەتكەرلىككە شىعامىن, – دەيدى گۇلزات تۇراتالوۆا.
تاجىريبەلى مامان گۇلزات دونەنبايقىزىنىڭ سوڭىنان ەرىپ كەلە جاتقان تابيعات جاناشىرى, ورمانشى باحتينا ەرمەك نەگىزگى ماماندىعى – مال دارىگەرى. ول بۇعان دەيىن كۇرشىمنىڭ قۇيعان اۋىلىندا مال دارىگەرى بولىپ قىزمەت اتقارعان. ال توسقايىڭدا مال دارىگەرىنىڭ ورنى بوس بولماعاندىقتان, ءبىلىمىن جەتىلدىرىپ, ورمانشىلىق قىزمەتكە بەت بۇرعان. ايتپەسە, مال دارىگەرلىك قىزمەتتى دە ابىرويمەن اتقارا بىلگەن. ءتورت ت ۇلىكتەن قان دا العان, وپەراتسيا دا جاساعان. قازىردىڭ وزىندە كورشى-قولاڭنىڭ مالى اۋىرسا, شاقىرتۋلارعا بارىپ تۇرادى.
– ءار كاسىپتىڭ جەڭىلى مەن اۋىرى بولادى عوي. ءبىزدىڭ قىزمەتتە جاز, كۇز ايلارى قاربالاس. كۇننىڭ ىستىق-سۋىعىنا قاراماستان, كوشەتتەردى ارقالاپ ءجۇرىپ, گەكتار-گەكتار جەرگە ەگەمىز. ونى كۇتەمىز, باپتايمىز. ەگەتىنىمىز كوبىنەسە شىرشا بولعاندىقتان, كۇتىم كەرەك-اق. كوشەتكە دەيىن تۇقىمىن ەگىپ, تۇقىمباقتا وسىرەمىز. تامىر جايىپ, جەتىلە باستاعان كوشەتتى تاۋعا اپارىپ وتىرعىزامىز. ودان بولەك, ورتكە دە شىعىپ كەتۋگە ءازىرمىز, – دەيدى ورمانشى ينسپەكتور باحتينا قۋانعانقىزى.
ال قىستىڭگۇنى بەلگىلەنگەن ۋچاسكەلەرىن ارالاي ءجۇرىپ, تابيعي قۇبىلىستاردى تىركەيدى. قازىر اۋىل ىشىندە ءۇش تۇلكى جۇرگەنىنە دەيىن ءبىلىپ وتىر. ورمانشى ارۋلار تۇزدەگى جۇمىسپەن قاتار ۇيدەگى شارۋاعا دا ۇلگەرىپ جۇرەدى. اڭگىمە اراسىندا تەحنيكالىق بازا جاڭارتىلسا دەگەندەي دە ۇسىنىستار ايتىلدى. ءيا, تابيعاتتىڭ استا-توك بايلىعىن شاشاۋ شىعارماي ۇستاپ وتىرۋ ءۇشىن مامانداردان بولەك ولاردىڭ قولىندا بايلانىس قۇرالدارىنان باستاپ, ءورت ءسوندىرۋ كولىكتەرىنە دەيىن ساعاتتاي ساقىلداپ تۇرۋى كەرەك. بۇل – باسقا ماسەلە. ال ايەلدەردىڭ اۋىر ەڭبەكتەگى تەمىردەي توزىمدىلىگى كوپكە ۇلگى.
شىعىس قازاقستان وبلىسى,
مارقاكول اۋدانى,
توسقايىڭ اۋىلى