پارلامەنت سەناتىنىڭ توراعاسى, قازاقستان بوچچا فەدەراتسياسىنىڭ پرەزيدەنتى ماۋلەن اشىمباەۆ اتالعان پاراليمپيادالىق سپورت تۇرىنەن ءداستۇرلى ءتۋرنيردىڭ جابىلۋ راسىمىنە قاتىسىپ, جەڭىمپازداردى ماراپاتتادى. جارىس بوچچادان العاشقى قازاقستاندىق جاتتىقتىرۋشى سۇلتانبەك ورىنباساروۆتى ەسكە الۋعا ارنالدى.
ماۋلەن اشىمباەۆ سايىسقا قاتىسۋشىلاردى ءتۋرنيردىڭ جوعارى دەڭگەيدە وتۋىمەن قۇتتىقتاي كەلىپ, سۇلتانبەك ورىنباساروۆتىڭ قازاقستاندا بوچچا سپورتىنىڭ قالىپتاسىپ, دامۋىنا زور ەڭبەك سىڭىرگەنىن اتاپ ءوتتى. كوشباسشىلىق, تاباندىلىق, سپورتقا ادالدىق سياقتى قاسيەتتەرىمەن تانىلعان ول كوپكە ۇلگى كورسەتىپ, جۇزدەگەن بالانىڭ جەڭىسكە دەگەن قۇشتارلىعىن وياتتى.
فەدەراتسيا پرەزيدەنتى وتكەن ءۇش جىلدىڭ ىشىندە ەلىمىزدە اتالعان سپورتقا دەگەن قىزىعۋشىلاردىڭ قاتارى ايتارلىقتاي ارتقانىنا نازار اۋداردى. العاش رەت, ياعني 2021 جىلى سايىسقا ەلىمىزدىڭ التى وڭىرىنەن كەلگەن 30 سپورتشى قاتىسقان. ال بۇل جولى 10 ءوڭىردىڭ نامىسىن قورعاعان 70 سپورتشى باق سىنادى. ماۋلەن اشىمباەۆتىڭ ايتۋىنشا, مۇنداي ءۇردىس ينكليۋزيۆتى ورتا قالىپتاستىرۋ باعىتىنداعى جۇمىستىڭ ماڭىزدىلىعىن جانە مۇگەدەكتىگى بار ادامدار ءۇشىن ارنايى قاۋىمداستىقتىڭ قانشالىقتى قاجەت ەكەنىن كورسەتەدى.
سونداي-اق سەنات سپيكەرى مەملەكەت باسشىسى قاسىم-جومارت توقاەۆتىڭ ينكليۋزيۆتى قوعام قۇرۋ ماسەلەسىنە ۇنەمى باسا ءمان بەرىپ كەلە جاتقانىن ايتتى. وسىعان بايلانىستى ەلدە كەدەرگىسىز ورتا قالىپتاستىرۋ ءۇشىن ءتيىستى جۇمىستار اتقارىلىپ جاتىر. بەرىك ينستيتۋتسيونالدىق نەگىز قالىپتاسىپ, ەلىمىزدىڭ ءىرى قالالارىندا بوچچا سپورتىنىڭ ۇيىرمە-فيليالدارى اشىلىپ جاتىر.
«جۇيەلى جاتتىعۋلار پاراسپورتشىنى ودان ءارى شىڭداپ, ولاردىڭ توزىمدىلىگىن ارتتىرىپ, نامىسىن قايرايدى. ءار ادام ءوزىنىڭ بويىنداعى وسىنداي قاسيەتتەردى كۇندەلىكتى جەتىلدىرىپ, دامىتىپ وتىرۋى قاجەت. پرەزيدەنتىمىز قاسىم-جومارت كەمەل ۇلى توقاەۆ ەرەكشە قاجەتتىلىگى بار ازاماتتارعا قولداۋ كورسەتۋ جانە كەدەرگىسىز ورتا قالىپتاستىرۋ ماسەلەلەرىنە ءاردايىم باسا ءمان بەرىپ كەلەدى. بۇل – ءبىزدىڭ مەملەكەتىمىز بەن قوعامنىڭ الدىندا تۇرعان ماڭىزدى مىندەتتەردىڭ ءبىرى. سونداي-اق وسى ماسەلە پارلامەنتتىڭ دە ايرىقشا نازارىندا», دەدى ماۋلەن اشىمباەۆ.
سونىمەن قاتار پالاتا توراعاسى قازاقستان بوچچا فەدەراتسياسىنىڭ الداعى جۇمىس جوسپارىنا توقتالدى. بۇل رەتتە ۇلتتىق قۇرامانىڭ كاسىبي دەڭگەيىن ارتتىرۋ, سول ارقىلى پاراسپورتشىلاردى قولداپ, ىنتالاندىرۋ, ەلىمىزدە اتالعان سايىس ءتۇرىن ودان ءارى دارىپتەۋ جانە «بارشاعا ارنالعان بوچچا» تۇجىرىمداماسىن ىسكە اسىرۋ وسى باعىتتاعى ماڭىزدى مىندەتتەر رەتىندە بەلگىلەنگەنىن اتاپ وتكەن ءجون.
ء«بىز ەرەكشە سپورتشىلاردى دايارلاۋ جانە جاتتىقتىرۋشىلار قۇرامىن كۇشەيتۋ باعىتىنداعى جۇمىستى جالعاستىرا بەرەمىز. بۇل ىستە وڭىرلەرگە باسىمدىق بەرىلەتىنىن اتاپ وتكەن ءجون. ءبىز ەلىمىزدە بوچچانى دامىتۋدىڭ نەگىزگى ەكى باعىتىن بەلگىلەپ الدىق. بىرىنشىدەن, الەۋەتى جوعارى پاراسپورتشىلاردى قولداۋدىڭ جانە ولاردىڭ ءىرى حالىقارالىق جارىستارعا قاتىسۋىن قامتاماسىز ەتۋدىڭ ماڭىزى زور. ەكىنشى پەرسپەكتيۆالىق باعىت – «بارشاعا ارنالعان بوچچا» تۇجىرىمداماسى. مۇگەدەكتىگى بار ازاماتتاردىڭ ورتاعا بەيىمدەلۋىنە ىقپال ەتەتىن مۇنداي قادام سپورتتاعى ينكليۋزيۆتى جانە ينتەگراتسيالانعان ءتاسىلدىڭ جارقىن كورىنىسى ەكەنى انىق. فەدەراتسيانىڭ وسى ەكى باعىت بويىنشا اتقاراتىن جۇمىسى بوچچانى سەرىك ەتكەن ازاماتتاردىڭ مۇددەسىن ىسكە اسىرۋا ىقپال ەتەدى دەپ سەنەمىز», دەگەن ماۋلەن اشىمباەۆ جارىستىڭ جوعارى دەڭگەيدە وتكىزىلگەنىنە جانە وعان قاتىسۋشىلاردىڭ شەبەرلىگىنە نازار اۋداردى.
قازاقستان بوچچا فەدەراتسياسى ماماندارىنىڭ ايتۋىنشا, فەدەراتسيا جەكە جارىستارمەن قاتار, العاش رەت كوماندالىق جانە جۇپتىق سايىستار وتكىزىپ وتىر. بۇل تۋرنير ەلىمىزدىڭ ۇزدىك بوچچاشىلارىن انىقتاۋ, ينكليۋزيۆتى قوعام قۇرۋ جولىندا اتقارىلىپ جاتقان جۇمىستارعا جۇرتشىلىقتىڭ نازارىن اۋدارۋ جانە مۇگەدەكتىگى بار ازاماتتاردىڭ تەڭ قۇقىعى مەن مۇمكىندىگىن قامتاماسىز ەتۋدى كوزدەيدى.
ايتا كەتەيىك, بوچچادان اشىق رەسپۋبليكالىق تۋرنير 4–6 ناۋرىز كۇندەرى ەلورداداعى «اسپان» سپورت كەشەنىندە ءوتتى. جارىسقا ەلىمىزدىڭ 10 وڭىرىنەن, ناقتى ايتقاندا, استانا, الماتى, شىمكەنت قالالارى مەن قاراعاندى, اتىراۋ, پاۆلودار, ماڭعىستاۋ, جامبىل, جەتىسۋ جانە اباي وبلىستارىنان كەلگەن 70 سپورتشى قاتىستى.