الداعى جىلى ەۋرازيا ۇلتتىق ۋنيۆەرسيتەتى ستۋدەنتتەردى جاتاقحانامەن تولىق قامتاماسىز ەتۋدى جوسپارلاپ وتىر. 4 جاڭا Cتۋدەنتتىك ءۇي قۇرىلىسىنا جەكە ينۆەستيتسيا تارتىلۋدا. ولاردىڭ ءبىرى بيىلعى جازدا پايدالانۋعا بەرىلەدى, دەپ حابارلايدى Egemen.kz.
ەۇۋ ەكى جىل ىشىندە ستۋدەنتتىك ۇيلەردىڭ سانىن كوبەيتىپ, 5 مىڭنان استام ورىندى پايدالانۋعا بەرۋدى جوسپارلاپ وتىر. ماعجان جۇماباەۆ كوشەسىندە بوي كوتەرىپ جاتقان جاڭا زاماناۋي جاتاقحاناعا ۋنيۆەرسيتەت ستۋدەنتتەرى بيىل ورنالاسا الادى.
«بۇگىنگى تاڭدا مەملەكەتتىك-جەكە مەنشىك ارىپتەستىك تەتىگىنىڭ ارقاسىندا ينۆەستورلار ستۋدەنتتىك ۇيلەردىڭ قۇرىلىسىنا ۇلكەن قىزىعۋشىلىق تانىتىپ وتىر. بيىل جاڭا وقۋ جىلىنىڭ الدىندا جاڭا ستۋدەنتتەر ءۇيى پايدالانۋعا بەرىلەدى. الداعى ۋاقىتتا تاعى 3 ستۋدەنتتىك ءۇيدى سالۋدى جوسپارلاپ وتىرمىز. بۇل جاتاقحاناعا دەگەن سۇرانىستى جابادى», دەپ اتاپ ءوتتى ەۇۋ رەكتورى ەرلان سىدىقوۆ.
ماعجان جۇماباەۆ كوشەسىندەگى ەۇۋ-دىڭ جاڭا ستۋدەنتتىك ءۇيىن ينۆەستور-قۇرىلىس جۇرگىزۋشى «AEK Munai» جشس سالىپ جاتىر. قازىرگى ۋاقىتتا ەكى بلوكتان جانە 5 قاباتتان تۇراتىن عيماراتتىڭ قۇرىلىسى قارقىندى جۇرگىزىلۋدە. ستۋدەنتتىك جاتاقحانانىڭ جالپى اۋدانى 4 مىڭ شارشى مەتردەن اسادى.
«بيىل ءبىزدىڭ كومپانيا ءوز قاراجاتىنا ستۋدەنتتىك جاتاقحانالار سالۋدى شەشتى. ءبىزدىڭ العاشقى جوبامىز ەۋرازيا ۇلتتىق ۋنيۆەرسيتەتىنىڭ ستۋدەنتتىك ء ۇيىن سالۋدان باستالدى. عيماراتتا شامامەن 300-گە جۋىق ورىن قاراستىرىلعان. جاتاقحانا ديزاينەرلەردىڭ كومەگىمەن جوبالاندى. عيمارات زاماناۋي ءارى جايلى بولادى. ءبىرىنشى قاباتتاردا ستۋدەنتتەرگە ىڭعايلى بولۋ ءۇشىن كوۆوركينگ ايماقتار ورنالاسادى», دەدى «Bastau Damu KZ» جشس ديرەكتورى ارمان حالەلوۆ.
ايتا كەتۋ كەرەك, 2023 جىلى مەملەكەت باسشىسىنىڭ تاپسىرماسى اياسىندا استانادا ستۋدەنتتىك جاتاقحانا قۇرىلىسىنىڭ جوبالىق كەڭسەسى قۇرىلعان بولاتىن. وسى باعىتتا ينۆەستورلار, عىلىم جانە جوعارى ءبىلىم مينيسترلىگى, استانا قالاسى اكىمدىگى, «قارجى ورتالىعى» اق جانە جوعارى وقۋ ورىندارى اراسىندا جەمىستى ىنتىماقتاستىق تۋرالى مەموراندۋمدار جاسالدى.