جەرگىلىكتى پارلامەنت ءدىني ماتىندەردى دۇرىس پايدالانباعانى ءۇشىن قىلمىستىق جاۋاپكەرشىلىكتى قاراستىراتىن زاڭ جوباسىن قابىلدادى. ەندى قۇراندى ورتەگەندەر ەكى جىلعا باس بوستاندىعىنان ايىرىلادى, دەپ حابارلايدى Egemen.kz.
شۆەتسيا مەن دانيادا بىرنەشە رەت قاسيەتتى قۇراندى قورلاۋ جانە ورتەۋ ارەكەتتەرى بولعان ەدى. جەرگىلىكتى بيلىك بۇل ورەسكەل ارەكەتكە توقتام سالۋ ءۇشىن ءتيىستى شارا قابىلدايتىن بولدى.
يسلام ىنتىماقتاستىعى ۇيىمى قاتىسۋشى ەلدەردى قۇراندى قورلاعان مەملەكەتتەرگە قارسى شارا قولدانۋعا شاقىردى. شەكسىز ءسوز بوستاندىعى قاعيداسى مەملەكەتتىك مۇددەگە جانە مۇسىلمانداردىڭ قۇقىقتارىن قورعاۋعا قايشى كەلدى.
پرەزيدەنت قاسىم-جومارت توقاەۆ تا بۇل ماسەلەگە بايلانىستى پىكىر بىلدىرگەن ەدى.
«سولتۇستىك ەۋروپا ەلدەرىندە قۇراندى ورتەۋ ارەكەتتەرىن قازىرگى الەمدەگى شيەلەنىستى كۇشەيتۋگە جانە حالىقتار مەن مەملەكەتتەر اراسىنداعى سەنىمگە نۇقسان كەلتىرۋگە باعىتتالعان ارانداتۋشىلىق دەۋگە بولادى. بۇعان جول بەرۋگە بولمايدى», دەگەن ەدى مەملەكەت باسشىسى.