تۇركىستاندا ۇلتتىق قۇرىلتايدىڭ «ادىلەتتى قازاقستان – ادال ازامات» اتتى ەكىنشى وتىرىسىندا پرەزيدەنت ايگىلى مارال يشاننىڭ كەنەسارى حانعا سىيلاعان قۇران كىتابىن قوجا احمەت ياساۋي كەسەنەسىنە قويۋدى ۇسىنعان ەدى. وسى ورايدا بۇگىن كىتاپتى كەسەنەگە تاپسىرۋ شاراسى ءوتىپ, وعان وبلىس اكىمى دارحان ساتىبالدى, قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلى, كەنەسارى حاننىڭ ۇرپاقتارى قاتىستى. بۇل تۋرالى اتالعان وبلىس اكىمىنىڭ ءباسپاسوز قىزمەتىنەن ءمالىم بولدى, دەپ جازادى Egemen.kz.
«قازاقتىڭ 21 حانى, سۇلتاندارى مەن باتىرلارى جەرلەنگەن قوجا احمەت ياساۋي كەسەنەسىنە وسىنداي سيرەك جادىگەردى اكەلۋ – ءبىز ءۇشىن ۇلكەن مارتەبە, ماقتانىش. بۇل – ەلىمىزدىڭ رۋحىن كوتەرەتىن وقيعا ەكەندىگى انىق. قالامىزعا كەلۋشى تۋريستەر ءۇشىن تايقازانمەن قاتار تاعى ءبىر سيرەك جادىگەردىڭ بولۋى وتە قۋانىشتى جاعداي. كىتاپتى ەلىمىزگە قايتارۋ ءۇشىن ۇلەستەرىن قوسقان ۇلتتىڭ جاناشىر ازاماتتارىنا العىسىمدى ايتامىن», دەدى وبلىس اكىمى.
ناۋرىزباي قاجى تاعان ۇلى بابامىزدان جەتكەن قۇندى جادىگەردى قمدب وسى جىلدىڭ ماۋسىم ايىندا قابىلداپ العانىن تىلگە تيەك ەتتى.
«مارال يشاننىڭ ءدىندار عانا ەمەس, قوعام قايراتكەرى ءھام اعارتۋشى. بابامىز ەلدى جۇمىلدىرىپ, ۇلتتى ساقتاۋدا ۇمىتىلماس ۇلاعاتتى ىستەر اتقاردى», دەدى باس ءمۇفتي.
سونىمەن بىرگە مادەنيەت جانە اقپارات مينيسترلىگى ءدىن ىستەرى كوميتەتىنىڭ توراعاسى ەرجان نۇكەجانوۆ تا اتالعان جادىگەردىڭ ماڭىزىنا توقتالدى.
رۋحاني شارادا عۇلاما-قاريلار قۇران-حاتىم ءتۇسىردى.
باس ءمۇفتي قۇران كىتاپتى «ازىرەت سۇلتان» مەملەكەتتىك تاريحي-مادەني مۋزەي-قورىعىنىڭ ديرەكتورى ماۋلەن سادىقبەكوۆكە تاپسىرىپ, ول ۇلكەن اقساراي بولمەسىندەگى ارنايى جاسالعان سورەگە ورناتىلدى.
ەكى عاسىر ۋاقىتتان بەرى قولدان قولعا ءوتىپ, تاريحي وتانىنا جەتكەن كيەلى كىتاپتا كەنەسارى حاننىڭ ءمورى بار.