تاياۋدا تىلشىلەرگە بەرگەن سۇحباتىندا ەنەرگەتيكا ءمينيسترى الماسادام ساتقاليەۆ سۇيىتىلعان مۇناي گازىنىڭ قازىرگى باعاسى وزىندىك قۇنىنان تومەن ەكەنىن ايتىپ, بولاشاقتا بىرتىندەپ قىمباتتايتىنىن جەتكىزگەن بولاتىن. «وسىلايشا, سۇيىتىلعان مۇناي گازىنىڭ باعاسىن كەزەڭ-كەزەڭىمەن, بىردەن ءوسىپ كەتپەيتىندەي ەتىپ وزىندىك قۇنىنا دەيىن جەتكىزەمىز.
بۇل نارىق ويىنشىلارىنىڭ شىعىنىنا جول بەرمەۋ ءۇشىن كەرەك. قازاقستاندا قازىر باعا دياپازونى بار. ءبىر ءليترى – 50-80 تەڭگە ارالىعىندا. دەگەنمەن بۇل ءونىمنىڭ وزىندىك قۇنى – كەمىندە 110 تەڭگە. قازىر ول باعاعا بىردەن كوتەرمەيمىز, كەزەڭ-كەزەڭىمەن سوعان جەتكىزەمىز», دەدى مينيستر.
راسىندا دا, كەيىنگى كۇندەرى ەلىمىز بويىنشا سۇيىتىلعان گازعا سۇرانىس ارتتى. اۆتوگاز قۇيۋ بەكەتتەرىندە كەزەك كۇتكەن كولىك قاراسى كوبەيگەن. بىرەۋلەر مۇنىڭ سەبەبىن جوندەۋ جۇرگىزىلىپ جاتقان اتىراۋ مۇناي وڭدەۋ زاۋىتىمەن تىكەلەي بايلانىستىرادى. قورى سارقىلا باستاعان كەيبىر بەكەت قوجايىندارى ليميت قويىپ اۋپىرىمدەي باستاسا, ەندى بىرەۋلەرى تالون ەنگىزىپ, امالداۋعا كوشكەن. قالاي دەسەك تە, جولدا جۇرگەن جاندار ءۇشىن جانار-جاعارماي مەن گازدىڭ تاپشى بولماعانى ءھام قىمباتتاماعانى جاقسى. ءبىز وسى ماسەلەنى ەگجەي-تەگجەي ءبىلۋ ماقساتىندا وڭىرلەردەگى كولىك گازى باعاسىنىڭ جاي-كۇيىن باعامداپ كوردىك.