سەناتتىڭ الەۋمەتتىك-مادەني دامۋ جانە عىلىم جونىندەگى كوميتەتىنىڭ دەپۋتاتتارى كەڭەيتىلگەن وتىرىستا «استانادا (قازاقستان رەسپۋبليكاسى) دۇنيەجۇزىلىك دەنساۋلىق ساقتاۋ ۇيىمىنىڭ ەۋروپالىق وڭىرلىك كوميتەتىنىڭ جەتپىس ءۇشىنشى سەسسياسىن ۇيىمداستىرۋ تۋرالى قازاقستان رەسپۋبليكاسىنىڭ ۇكىمەتى مەن دۇنيەجۇزىلىك دەنساۋلىق ساقتاۋ ۇيىمى اراسىنداعى كەلىسىمدى راتيفيكاتسيالاۋ تۋرالى» زاڭدى تالقىلادى.
قۇجات قازاقستان مەن دۇنيەجۇزىلىك دەنساۋلىق ساقتاۋ ۇيىمى اراسىنداعى حالىقارالىق ىنتىماقتاستىقتى دامىتۋ جانە نىعايتۋ ماقساتىندا ازىرلەنگەن بولاتىن. كەلىسىم قازاقستاندا ددۇ ەۋروپالىق وڭىرلىك كوميتەتىنىڭ جەتپىس ءۇشىنشى سەسسياسىن ءتيىمدى ۇيىمداستىرۋدى جانە وتكىزۋدى قامتاماسىز ەتۋگە باعىتتالعان. سەناتورلاردىڭ ايتۋىنشا زاڭدى راتيفيكاتسيالاۋ ددۇ-عا مۇشە ەلدەر اراسىندا قازاقستاننىڭ بەدەلىن ارتتىرۋعا ىقپال ەتەتىن بولادى.
سەنات كوميتەتىنىڭ مۇشەلەرى تالقىلاۋ قورىتىندىسى بويىنشا زاڭدى پالاتا وتىرىسىندا قاراۋعا جىبەرۋ تۋرالى شەشىم قابىلدادى.