ەلىمىزدىڭ بىرنەشە وڭىرىندە جىلۋ بەرۋ ماۋسىمى باستالدى. بۇل رەتتە قۇرامىنا «سەۆكازەنەرگو» اق, «پاۆلودارەنەرگو» اق جانە «اەسك» اق سياقتى نەگىزگى كاسىپورىندار كىرەتىن «واەك» اق بەلسەندى جۇمىس اتقارىپ جاتىر. بۇل تۋرالى اتالعان كومپانيانىڭ ءباسپاسوز قىزمەتى حابارلادى.
«سەۆكازەنەرگو» اق ءباسپاسوز قىزمەتىنىڭ مالىمەتىنشە, پەتروپاۆلدا جىلىتۋ ماۋسىمى 1 قازاننان باستالدى. كاسىپورىن جاڭا جىلۋ بەرۋ ماۋسىمىنا جوعارى جاۋاپكەرشىلىكپەن قاراپ وتىر. جوندەۋ ۇدەرىستەرىنىڭ ماڭىزدى كەزەڭدەرى, سونىڭ ىشىندە №3 پەن №11 قازاندىقتارىنداعى كۇردەلى جۇمىستار ءوز مەجەسىنە جەتتى. بۇگىندە №1 مەن №10 قازاندىق اگرەگاتتارى جوندەلىپ ءبىتتى. قازىرگى تاڭدا №1 تۋربواگرەگاتتى تولىق كۇردەلى جوندەۋدەن وتكىزۋ كۇتىپ تۇر. بىراق ول كوندەنساتسيالىق تيپتەگى تۋربينا بولعاندىقتان, ونى جوندەۋ جىلىتۋ مەرزىمىنە اسەر ەتپەيدى. قالعان تۋربواگرەگاتتاردىڭ جوندەۋ جۇمىستارى اياقتالدى. 8 قازاندىق پەن 5 تۋربواگرەگاتى بار پتەتس-2 جۇمىسىن قارقىندى اتقارىپ جاتىر. ەسكە سالا كەتسەك, پەتروپاۆلدا جىلۋ بەرۋ ماۋسىمى رەسمي تۇردە باستالماي تۇرىپ-اق ءبىلىم بەرۋ مەن مەديتسينالىق مەكەمەلەردى جىلۋ جۇيەسىنە قوسۋ قولعا الىنعان ەدى. بۇگىندە قالانىڭ 118 الەۋمەتتىك نىسانى, 31 دەنساۋلىق ساقتاۋ مەكەمەسى, 258 كوپقاباتتى باسپانا مەن 233 جەكە تۇرعىن ۇيگە جىلۋ بەرىلدى. سونداي-اق قوسالقى 77 عيمارات جىلىتۋ جۇيەسىنە قوسىلدى. جوسپار بويىنشا الداعى 7 كۇننىڭ ىشىندە بارلىق نىسان جىلۋمەن قامتىلۋى قاجەت.
وبلىس ورتالىعىندا جىلىتۋ ماۋسىمى باستالدى. قىسى قاتتى بولاتىن پاۆلودار قالاسى ءۇشىن جىلۋ ماسەلەسى ارقاشان ماڭىزدى. سول سەبەپتى دە «پاۆلودارەنەرگو» اق-دا جىلۋ جانە ەلەكترمەن جابدىقتاۋ نىساندارىنداعى جوندەۋ-قالپىنا كەلتىرۋ جۇمىستارى الداعى قىسقا دايىندىقتىڭ قۇرامداس بولىگى سانالادى. ستانسا جۇمىسىنىڭ بارىسىن باقىلاپ وتىرعان ديرەكتور يگور گرينەۆ جەو-3-ءتىڭ قالانى جىلۋمەن قامتۋعا دايىن ەكەنىن جەتكىزدى. دايىندىق بارىسىندا №2, 3 تۋربواگرەگاتقا, №2, 4, 6 قازاندىققا كۇردەلى جوندەۋ جۇرگىزىلگەن. جەو-2-دە دە №1 قازاندىق پەن №2 تۋربواگرەگاتتارىنا كۇردەلى جوندەۋ جۇمىستارىنان وتكەن. ال №3 قازاندىقتا جۇرگىزىلىپ جاتقان جوندەۋ جۇمىستارى قازاننىڭ سوڭىنا دەيىن اياقتالادى. پاۆلوداردا 2023-2024 جىلدارعا ارنالعان جىلۋ بەرۋ ماۋسىمى 18 قىركۇيەكتە باستالىپ, ءبىرىنشى كەزەكتە الەۋمەتتىك نىساندار مەن مەملەكەتتىك مەكەمەلەر جىلۋعا قوسىلدى. قازىرگى تاڭدا كوپقاباتتى ۇيلەرگە جىلۋ بەرىلىپ جاتىر.
ەكىباستۇز جىلۋ ەلەكتر ورتالىعىندا دا جىلۋ بەرۋ ماۋسىمى باستالىپ كەتتى. جىلىتۋ ماۋسىمى باستالار الدىندا جىلۋمەن جابدىقتاۋ ماماندارى كۇردەلى جوندەۋ مەن قايتا جاڭارتۋدان كەيىن ستانسا جابدىقتارى مەن جىلۋ جەلىلەرىنە مىندەتتى سىناقتار جۇرگىزدى. اباي كوشەسىندەگى قايتا جاڭارتىلعان ماگيسترالداردىڭ سىناقتارى ءساتتى ءوتتى, ونىڭ بارىسىندا بىردە-ءبىر زاقىم انىقتالعان جوق. سونداي-اق ءماشھۇر ءجۇسىپ كوشەسىندەگى ماگيسترالدىق قۇبىرعا سىناقتار جۇرگىزىلدى. بيىل ەكىباستۇزدا جىلۋ جەلىلەرىنىڭ 70 شاقىرىمنان اسا ماگيسترالدىق جانە ورامىشىلىك قۇبىرلارى جوندەلدى. قازىرگى ۋاقىتتا ەكىباستۇز جەو-دا 4 قازاندىق اگرەگاتى دايىن. ونىڭ ەكەۋى ىسكە قوسىلدى. باس ديرەكتور اناتولي مويسەي دايىن قازاندىق اگرەگاتتارى جىلىتۋ ماۋسىمىنان باستاپ قالانى جەتكىلىكتى جىلۋمەن قامتاماسىز ەتەتىنىن مالىمدەدى. ەكىباستۇز جەو-نىڭ جوندەۋ جۇمىستارىنا 585 ادام تارتىلسا, ونىڭ 499-ى – مەردىگەر ۇيىمداردىڭ قىزمەتكەرلەرى. بارلىق شارا ۋاقىتىلى جانە قالانى ۇزدىكسىز جىلۋمەن قامتاماسىز ەتۋ ماقساتىندا جۇرگىزىلىپ جاتىر.
«اەسك» اق جىلىتۋ ماۋسىمىنىڭ جۇمىس بارىسىن باقىلاپ, ونىڭ جوعارى جاۋاپكەرشىلىكپەن جاسالىپ جاتقانىن حابارلادى. باس ديرەكتور الەكساندر پاۆلوۆتىڭ ايتۋىنشا, جىلۋ بەرۋ ماۋسىمىنا دايىندىق قاشاندا ساپالى دەڭگەيدە جۇرگىزىلەدى. دايىندىق ساپاسى 85%-دان تومەن ەمەس. ال قوسالقى ستانسالاردى كۇردەلى جوندەۋ جۇمىستارى 93%-عا ورىندالعان.
«واەك» اق-تاعى جىلۋ جانە ەلەكتر جەلىلەرى بويىنشا ءجۇرىپ جاتقان جۇمىستار قىس مەزگىلىندە تۇرعىنداردى ەنەرگيا رەسۋرستارىمەن قامتاماسىز ەتۋگە باعىتتالعان. كومپانيانىڭ قازىرگى ماقساتى – بارلىق جۇمىستى ءدال ۋاقىتىندا اياقتاپ, ءاربىر ۇيگە جىلۋدى دەر كەزىندە جەتكىزۋ.
واەك ءباسپاسوز قىزمەتى