قازىر تۇركىستان قالاسىنداعى 1500-گە جۋىق بالا مەن ءجاسوسپىرىم وقۋشىلار سارايى – يۋنەسكو كلۋبىنداعى 6 ءبىلىم بەرۋ باعىتى بويىنشا ۇيىمداستىرىل-عان 60-قا جۋىق ۇيىرمەدە قوسىمشا ءبىلىم الىپ ءجۇر. سونىڭ ىشىندە عارىشتىق تەحنولوگيانىڭ قىر-سىرىن مەڭگەرۋگە مۇمكىندىك بەرەتىن ەلىمىزدەگى جالعىز سپۋتنيكتىك روبوتتەحنيكا ۇيىرمەسى – «UniSat» ءبىلىم بەرۋ حابىنىڭ ورنى ايرىقشا.
2022 جىلدىڭ قىركۇيەك ايىندا اشىلعان بۇل حاب – بۇۇ بالالار قورىنىڭ (يۋنيسەف) قازاقستانداعى وكىلدىگى, ءال-فارابي اتىنداعى قازاق ۇلتتىق ۋنيۆەرسيتەتى مەن وقۋشىلار سارايىنىڭ بىرلەسە اتقارعان جوباسى. جەر جانە عارىشتاعى راديوحابار تاراتاتىن قۇرىلعىلاردان انالوگتىك, تسيفرلىق راديوسيگنالداردى بەرۋگە جانە قابىلداۋعا مۇمكىندىك جاساعان حاب ارقىلى 30-عا جۋىق وقۋشى STEM كۋرستارىنا قاتىسىپ, ينجەنەرلىك داعدىلاردى يگەرىپ ءجۇر.
بۇل ۇيىرمەدەگى حاب اشىلعاننان كەيىن كوپ ۇزاماي, ياعني قازان ايىندا تۇركىستاننان 50 شاقىرىم جەردە اتموسفەرانىڭ جوعارعى قاباتىنا ۋلترازاماناۋي 2 نانوسپۋتنيك ۇشىرىلدى. سالماعى 1-10 كيلو ارالىعىنداعى شاعىن عارىش اپپاراتتارى بىرنەشە كامەرا جانە سەنسورلارمەن جابدىقتالعان. سول نانو-سپۋتنيكتەردىڭ كومەگىمەن قازىر اۋا تەمپەراتۋراسى, قىسىمى, ىلعالدىلىعى جانە لاستانۋى تۋرالى مالىمەتتەر جيناقتالىپ جاتىر.
بۇل ۇيىرمەگە 12 جاستان اسقان, عىلىمعا, تەحنولوگياعا, تەحنيكا مەن ماتەماتيكاعا قىزىعاتىن كەز كەلگەن وقۋشى قاتىسا الادى. بۇگىندە ۇيىرمەدە ءبىلىم الىپ جۇرگەن 30-عا جۋىق بالانىڭ كوپشىلىگى – قىزدار. عارىشتىق تەحنولوگياعا دەن قويعان وقۋشىلارىمىز اۋىز تولتىرىپ ايتارلىقتاي ناتيجەگە دە قول جەتكىزىپ ۇلگەردى. دالىرەك ايتسام, بيىل ءساۋىر ايىندا ماسكەۋ قالاسىندا حالىقارالىق «عىلىمدى باستاڭىز» اتتى بايقاۋ وتكەن بولاتىن. 600-دەن اسا جاس عالىم قاتىسقان سايىستا سارايىمىزداعى «فيزيكا» ۇيىرمەسىنىڭ وقۋشىسى كاميلا بايانبەك تە باق سىناپ, جۇلدەلى ءىىى ورىنعا يە بولدى. سونىمەن قاتار ونىڭ جەتەكشىسى, بىلىكتى ۇستاز ەركىن اقتاەۆقا «حالىق اعارتۋ ءىسىنىڭ ۇزدىگى» قۇرمەتتى اتاعى بەرىلدى. ەندى وقۋشىلارىمىز قازان ايىندا جۇلدىزدى اسپاندى زەرتتەۋگە كومەكتەسەتىن تاعى ءبىر نانوسپۋتنيك قۇراستىرۋدى جوسپارلاپ وتىر. جالپى, ءبىزدىڭ باستى ماقساتىمىز – عىلىممەن اينالىسۋعا قولايلى جاعداي تۋعىزۋ ارقىلى ۇدەرىس بارىسىندا وقۋشىلاردىڭ بىلىمگە دەگەن قىزىعۋشىلىعىن ارتتىرۋ, ءوز بەتىنشە ءبىلىم الۋعا قۇشتارلىعىن دامىتۋ, سونىمەن قاتار كومەك كورسەتىپ, باعىت-باعدار بەرۋ.
تاعى ءبىر ايتا كەتەرلىك جايت – تۇركىستان وڭىرىندە العاش رەت UniSat HUB-تىڭ اشىلۋىنا سەبەپكەر بولعان ءبىزدىڭ ەڭبەگىمىزدى باعالاعان حالىقارالىق عالىمدار قاۋىمداستىعى ماعان «حالىقتىق ءبىلىم بەرۋ سالاسىنا ەڭبەك سىڭىرگەن قىزمەتكەر» قۇرمەتتى اتاعىن بەردى.
اتالعان ۇيىرمە وقۋشىلاردىڭ بىلىمگە قىزىعۋشىلىعىن ارتتىرىپ, عىلىممەن اينالىسۋعا قولايلى جاعداي جاساپ, باعىت-باعدار بەرىپ, كومەكتەسەدى. قازىرگى تاڭدا ۇيىرمەدە كەلەشەكتە ەلىمىزدى ورگە سۇيرەيتىن 12-25 جاس ارالىعىنداعى جاس زەرتتەۋشىلەر تاربيەلەنىپ جاتىر.
ينديرا يكاپوۆا,
وقۋشىلار سارايىنىڭ ديرەكتورى
تۇركىستان